MARCA: გიორგი ჩაკვეტაძემ შესაძლოა, 'ტოტენჰემში' ჩაანაცვლოს ერიკსენი, Sport.de: 'ბაიერნი' აპირებს, კიდევ ერთხელ მიმართოს 'გენტს'

ევროპული მედია კვლავ ეხმაურება გიორგი ჩაკვეტაძის თემას. როგორც გერმანული ინტერნეტგამოცემა სპორტ.დე წერს, "ბაიერნი" აპირებს კიდევ ერთხელ მიმართოს "გენტს" ქართველი ტალანტის შეძენის წინადადებით...

"რეკორდმაისტერმა" ეს ერთხელ უკვე გააკეთა, როცა გიორგი ჩაკვეტაძე თბილისის "დინამოდან" ბელგიურ კლუბში ახალი გადასული იყო. თუმცა "გენტის" უფროსობას მაშინ 6 მილიონი ევრო (თავად 1.5 მილიონ ევროდ იყიდეს "დინამოსგან") ეცოტავა, მით უმეტეს, ჩაკვეტაძეში ისინი უფრო მომავლის ფეხბურთელს ხედავენ და მასში გაცილებით მეტის გამომუშავებას გეგმავენ.

თუმცა არ არის გამორიცხული, "გენტმა" ცდუნებას ვერ გაუძლოს და საქართველოს ნაკრების ახალი ლიდერის ბოლოდროინდელი წარმატების კვალდაკვალ, დათანხმდეს მასში თუნდაც 10 მილიონი ევროს (ამ თანხას ასახელებენ სწორედ ცალკეული გამოცემები) აღებას.

რაც შეეხება "ბაიერნს", ფაქტია, მიუნხენურ გიგანტს უკვე უდგას დღის წესრიგში ფრანკ რიბერისა და არიენ რობენის შეცვლის საკითხი. შეიძლება გადაჭარბებაში ჩაგვითვალოთ, მაგრამ ნუ გავმორიცხავთ, იქ ული ჰიონესი და კარლ-ჰაინც რუმენიგე უკვე ფიქრობენ რომელიმე მათგანის ჩაკვეტაძით ჩანაცვლებაზე.

ცნობილია, რომ ქართული ფეხბურთის ვარსკვლავს "ბარსელონა" ("მარკას" ინფორმაციით, კატალონიური გრანდის სკაუტები თბილისშიც ბრძანდებოდნენ და ყაზახეთთან ჩაკვეტაძის ბენეფისიც ნახეს), "ტოტენჰემი", "ბორნმუთი" და "შახტარი" უპირებენ გადაბირებას.
ახლა სწორედ "ტოტენჰემის" თემაზე უნდა გადავიდეთ...

ქართველს ტოტენჰემში ერიკსენის შემცვლელად მოიაზრებენ

"გიორგი ჩაკვეტაძემ, შესაძლოა, "ტოტენჰემში" ხანგრძლივი პერიოდით ჩაანაცვლოს კრისტიან ერიქსენი", - ამ სათაურით აქვეყნებს ესპანური "მარკა" წერილს ქართველ ფეხბურთელზე, რომელიც, თურმე, ბოლო დღეებში მსოფლიო მედიაში ყველაზე პოპულარული და კითხვადი მოთამაშეა ლუკა მოდრიჩის შემდეგ.
"ჩაკვეტაძე ერიქსენის მსგავს პოზიციაზე თამაშობს. ამ კვირაში "ტოტენჰემმა" ქართველი ტალანტის გადასაბირებლად ნაბიჯები გადადგა. "ტოტენჰემი"

ერთ-ერთი წამყვანი ევროპული კლუბია, რომელიც ბოლო კვირების განმავლობაში თინეიჯერების გადაბირებაზე აქტიურად მუშაობს", - წერს ესპანური გამოცემა.
მისივე ცნობით, ინტერესი ჩაკვეტაძის საკლუბო და სანაკრებო გამოსვლებმა გამოიწვია:

"19 წლის მოთამაშე ბელგიურ "გენტში" მშვენიერ ფეხბურთს თამაშობს და ამან რამდენიმე კლუბის ყურადღება მიიპყრო. მიმდინარე სეზონში მან ბელგიურ გუნდში 4 გოლი გაიტანა და ამდენივე საგოლე პასი შეასრულა. ასევე კარგად თამაშობს ის საკუთარი ქვეყნის ნაკრებში".

"მარკა" წერს, რომ ლონდონელები 19 წლის ქართველს ერთ-ერთი წამყვანი მოთამაშის შემცვლელად განიხილავენ: "ჩაკვეტაძის მიმართ "ტოტენჰემის" ყურადღება საინტერესო დროს ემთხვევა. ისე ჩანს, რომ "მამლებს" თავიანთი წამყვანი ნახევარმცველის, კრისტიან ერიკსენის შესანარჩუნებლად დიდი ბრძოლა მოუწევთ.

დანიელი უკვე ასოცირდება ისეთ კლუბებთან, როგორებიცაა "რეალი", "ბარსელონა", "იუვენტუსი" და პსჟ. სულ ახლახან "სანი" წერდა, რომ ერიკსენის ტრანსფერში "რეალი" 40 მილიონ ევროს იძლეოდა. ამტკიცებენ, რომ "ტოტენჰემი" მას ახალი კონტრაქტსა და ხელფასის გაზრდას სთავაზობს. თუმცა, იმასაც ამბობენ, რომ მოლაპარაკებები ჩიხში შევიდა. ასეა თუ ისე, დროული იქნება, "ტოტენჰემმა" დანიელის შემცვლელის ძებნა დაიწყოს.

კლუბი წარსულშიც წააწყდა ისეთ ფაქტებს, რომ წამყვანი მოთამაშეები ლუკა მოდრიჩი და გარეთ ბეილი ვერ შეინარჩუნა. არიან გუნდები, რომელთაც ლიდერების შენარჩუნება არ შეუძლიათ. შესაძლოა, ჩაკვეტაძე "ტოტენჰემში" ერიკსენის გრძელვადიანი შემცვლელიც იყოს".

საუკეთესო გოლი საქართველოდან

ტელეკომპანია შკყშპორტს-ზე მიმდინარეობს უეფას ერთა ლიგის საუკეთესო გოლის გამოსავლენი გამოკითხვა, სადაც ნომინანტებს შორის არიან გარეთ ბეილი, რაჰიმ სტერლინგი, ისკო და ასე შემდეგ. ერთა ლიგის ჯგუფური ეტაპის 10 საუკეთესო გოლში ორი - ქართველისაა: გიორგი ჩაკვეტაძის და ჯაბა კანკავასი.

"რაჰიმ სტერლინგი, გარეთ ბეილი თუ ისკო? შეარჩიეთ ერთა ლიგის საუკეთესო გოლი", - ასე მიმართა skysports.com .ცომ-მა გულშემატკივრებს და საუკეთესო გოლების ჩამონათვალი შესთავაზა.

"რომელი იყო საუკეთესო გოლი ერთა ლიგის თამაშებში? ნახეთ ჩვენი სია და ხმა მიეცით: რაჰიმ სტერლინგის შესანიშნავი გოლი ესპანეთთან (მისი პირველი გოლი ინგლისის ნაკრებში ბოლო სამ წელიწადში) თუ გარეთ ბეილის "შედევრი" ირლანდიის კარში? კონკურსში მხოლოდ უეფას ახალი გათამაშების მაღალი დივიზიონებით არ შემოვიფარგლეთ. სიაში ასევე შევიყვანეთ მარკოს პიზელი, მილოტ რაშიცა, გიორგი ჩაკვეტაძე და ჯაბა კანკავა", - წერს საიტი.

მაგრამ "დამატებით" სიაში მოხვედრილმა ქართველებმა სკყსპორტს.ცომ-ის მიერ შერჩეულ საუკეთესოთა სამეულიდან ორი - ბეილი და ისკო ამოაგდეს, ხოლო ჩაკვეტაძის მიერ ასტანაში ყაზახეთთან გატანილი გოლი ისეთი დიდი უპირატესობით ლიდერობს, გამარჯვება გარანტირებული აქვს, კანკავას მიერ ლატვიასთან სტუმრად გატანილი გოლი კი მესამე ადგილზეა. მონაცემები აღებულია 7696 გამოკითხულიდან.
მერაბ მამულაშვილი

გამოკითხვის მიმდინარე შედეგები

1. გიორგი ჩაკვეტაძე (ყაზახეთი-საქართველო) 84%
2. რაჰიმ სტერლინგი (ინგლისი-ესპანეთი) 6%
3. ჯაბა კანკავა (ლატვია-საქართველო) 4%
4. გარეთ ბეილი (უელსი-ირლანდია) 2%
5. მარკოს პიზელი (სომხეთი-ლიხტენშტაინი) 1%
6. ისკო (ესპანეთი-ხორვატია) 1%
7. მილოტ რაშიცა (ფარერები-კოსოვო) 1%
8. ალფრედ ფინბოგასონი (ისლანდია-შვეიცარია) 1%
9. როლანდას ბარავიკასი (ლიეტუვა-ჩერნოგორია) 0%
10. ულე სელნესი (ნორვეგია-სლოვენია) 0%

ყოველდღიური სპორტული გაზეთი "ლელო"
2083
მკითხველის კომენტარები / 0 /
მსგავსი ამბები
რუბრიკის სხვა სიახლეები
;