NBA. გუნდების საუკეთესო მოთამაშეები მოახლოებული სეზონის წინ 

ეროვნული საკალათბურთო ასოციაციის კლუბების შემადგენლობები ფაქტობრივად დაკომპლექტებულია. კიდევ იქნება გარიგებები, მაგრამ ლიგის მთავარი ვარსკვლავები თავიანთ ადგილებზე დარჩებიან.

ეროვნულ საკალათბურთო ასოციაციაში, უბრალოდ, არ შეიძლება წარმატების მიღწევა უმაღლესი დონის ვარსკვლავების გარეშე. ზოგიერთ გუნდს გაუმართლა ერთბაშად ორი ვარსკვლავის გაფორმებით, რითაც სხვებს არ შეუძლიათ დაიკვეხნონ. ვებგვერდ fadeawayworld-ის მიმომხილველებმა გამოყვეს NBA-ის თითოეულ გუნდში საუკეთესო მოთამაშე.

პარასკევის ნომერში აღმოსავლეთი კონფერენციის გუნდებს დავუყევით, ახლა, დასავლეთის ჯერია...

1. დალასი -ლუკა დონჩიჩი
„დალასმა“ ბრილიანტი იპოვა ლუკა დონჩიჩის სახით. ეს არის NBA-ის ყველაზე გამოცდილი ახალბედა ახალგაზრდა, რომელიც ლიგაში მისვლამდე ევროლიგაში თამაშობდა უმაღლეს დონეზე. ის წლის დებიუტანტი გახდა. მისი კარიერა მხოლოდ ახლა იწყება.

დონჩიჩს ცოტ-ცოტა ყველაფრის გაკეთება უწევს, მაგრამ მისი თამაში თავდასხმაში განსაკუთრებით ძლიერ არის გამოხატული. მომავლისთვის, „მავერიქსს“ ახალგაზრდა ვარსკვლავების ძლიერი დუეტი ეყოლება დონჩიჩისა და კრისტაპს პორზინგისის სახით.

2. დენვერი -ნიკოლა იოკიჩი
იმის გათვალიწინებით, რასაც ის მოედანზე აკეთებს, დღეს რთული დასაჯერებელია, რომ ნიკოლა იოკიჩი დრაფტის მეორე რაუნდში არჩიეს. იოკიჩი ძალიან ხანმოკლე დროში მსოფლიოს ერთ-ერთი საუკეთესო ცენტრი გახდა.

სერბი ერთ-ერთი საუკეთესო პლეიმეკერია NBA-ის ისტორიაში მაღალ კალათბურთელებს შორის. მან რეალურად გააძლიერა „დენვერი“. კარგი პასის მქონე ცენტრის ყოლა, რომელსაც სამქულიანების სროლა და სხვებისთვის მომენტების შექმნა ეხერხება, მართლაც ანიჭებს ამ გუნდს უპირატესობას.

3. გოლდენ სტეიტი - სტეფ კარი
„გოლდენ სტეიტმა“ დაკარგა კევინ დურანტი და დემარკუს კაზინსი, მაგრამ, სინამდვილეში, ეს ყოველთვის სტეფ კარის გუნდი იყო. ის არსად წავა კარიერის ბოლომდე - ამაში ეჭვი არავის ეპარება.

ახლა, ყველაფერი ლიგის ორგზის MPV-ზეა დამოკიდებული. მან უნდა დაამტკიცოს, რომ კრიტიკოსები ცდებოდნენ. ამისთვის კი მარტომ უნდა ათრიოს ახალ სეზონში „უორიორზი“ და დატოვოს გუნდი საჩემპიონო რბოლაში.

4. ჰიუსტონი - ჯეიმს ჰარდენი
ჯეიმს ჰარდენმა ისტორიულად საუკეთესო სეზონი ჩაატარა. შეიძლება იმის მტკიცება, რომ მას ზედიზედ ოთხი სეზონი ეკუთვნოდა MVP-ის სტატუსი. ის ტოტალურად დომინირებდა შეტევაში.

დაცვა ყოველ ჯერზე პრობლემა იქნება ჰარდენისთვის, როცა ის მოედანზე გავა, მაგრამ მთელი თავისი ნაკლოვანებებით, ის მაინც საუკეთესო უკანახაზელია ლიგაში.

5. კლიპერსი - კავაი ლენარდი
„კლიპერსმა“ მთელი ასოციაცია შეაზანზარა, როცა ზაფხულში კავაი ლეონარდი და პოლ ჯორჯი შეიძინა. ვარსკვლავებმა შეავსეს ისედაც შთამბეჭდავი ბირთვი პატრიკ ბევერლის, მონტრეზლ ჰარელისა და ლუ უილიამსის სახით.

ლეონარდი - არა მხოლოდ „კლიპერსის“ საუკეთესო მოთამაშე, არამედ, პირდაპირ დღეს მსოფლიოს საუკეთესო კალათბურთელია. მან ისტორიაში პირველ ჩემპიონობამდე მიიყვანა „ტორონტო“ და შესწევს უნარი რეგულარულად შეაჩეროს მსოფლიოს საუკეთესო მსროლელები.

6. ლეიკერსი - ლებრონ ჯეიმსი
ლებრონ ჯეიმსი აქტიური იქნება მომდევნო სეზონში. მის განკარგულებაში იყო მთელი ზაფხული, რათა პირველად 15 წლის განმავლობაში, სრულფასოვნად დაესვენა. ბევრს მიაჩნია, რომ მომდევნო სეზონში კარიერაში ლებრონ ჯეიმსის საუკეთესო ვერსია წარსდგება ჩვენ წინაშე.

ლებრონი ყოველთვის შედიოდა ლიგის ხუთ საუკეთესო კალათბურთელს შორის. მას აუცილებლად ვნახავთ MVP-ის პრიზისთვის რბოლაში, მით უმეტეს, რომ საკმაოდ საინტერესო შემადგენლობა შეკრიბა ზაფხულში ენტონი დევისისა და დემარკუს კაზინსის მეთაურობით.

7. მემფისი -იონას ვალანჩუნასი
დღეისთვის, „მემფისი“ სავსეა ახალგაზრდა მოთამაშეებით. პოტენციალით იონას ვალანჩუნასი არ შედის სამ ლიდერს შორისაც კი, მაგრამ ის ყველაზე გამოცდილი და პროდუქტიულია „მემფისის“ მოქმედ მოთამაშეებს შორის.

ითამაშებს თუ არა ის წამყვან როლს მომდევნო სეზონში - ეს ჯერჯერობით უცნობია, მაგრამ „მემფისის“ მომავალი ოპტიმისტურია ჯარენ ჯექსონთან, ჯა მორანტთან, გრეისონ ალენთან და ბრენდონ კლარკთან ერთად.

8. მინესოტა - კარლ-ენტონი თაუნსი
კარლ-ენტონი თაუნსი ერთ-ერთი ყველაზე ნიჭიერი მაღალია ლიგაში. ის წარმოადგენს ძველი სკოლის ცენტრისა და იმ თანამედროვე მაღლების ნაზავს, რომლებსაც კარგი შორეული ტყორცნა აქვთ. ამას ისე ხშირად ვერ ნახავთ.

„მინესოტას“ მართლაც სჭირდება თაუნსი. მან უნდა მიიღოს ლიდერის როლი და სტაბილური გახადოს დაცვაში თამაში, სადაც, ჯერჯერობით, პერიოდული ჩავარდნები აქვს.

9. ნიუ ორლენი - ჯრიუ ჰოლიდეი
პირდაპირ დღეს ჰოლიდეი „პელიკანსის“ ლიდერია - მას შემდეგ, რაც ენტონი დევისი, როგორც იქნა, გაცვალეს რამდენიმე ნიჭიერ ახალგაზრდა

მოთამაშეზე. ახლა, „ნიუ ორლეანს“ ერთ-ერთი ყველაზე პერსპექტიული შემადგენლობა ჰყავს ლიგაში.
ჰოლიდეი არის მოთამაშე, რომელსაც იოლად შეუძლია საშუალო ორმაგი დუბლის შესრულება (ქულა+პასი). მას ძალუძს ითამაშოს უკანა ხაზზე ორივე პოზიციაზე. მას გააჩნია კარგი შანსი - მომავალ სეზონში ისევ გახდეს „ყველა ვარსკვლავის მატჩის“ მონაწილე.

10. ოკლაჰომა - კრის პოლი
ახლა, კრის პოლი გახდა „ოკლაჰომას“ მთავარი ვარსკვლავი, რადგან ამ გუნდში აღარ არიან რასელ უესტბრუკი და პოლ ჯორჯი. შესაძლოა, პოლი აღარ არის ისეთი, როგორიც კარიერის საუკეთესო წლებში, მაგრამ მაინც რჩება ყველაზე ნიჭიერ მოთამაშედ „თანდერის“ ამჟამინდელ შემადგენლობაში. ელოდებიან, რომ გუნდი სეზონის დაწყებამდე გაცვლის მას, რადგან „ოკლაჰომა“ იმედოვნებს გარდაქმნის პროცესის გაგრძელებას.

ერთ დროს, პოლი ერთ-ერთი ყველაზე პატივსაცემი და სახიფათო გამთამაშებელი იყო ლიგაში, რადგან მოედნის ორივე მხარეს შეეძლო გავლენა ჰქონოდა თამაშზე, მაგრამ ბოლო წლებში სიჩქარე და „ფეთქებადობა“ დაკარგა.

11. ფინიქსი - დევინ ბუკერი
დევინ ბუკერმა ლიგაში უკვე ოთხი წელი გაატარა, მაგრამ ჯერ 23 წელიც არ შესრულებია. ასე რომ, ის ჯერ შორს არის თავისი კარიერის პიკისგან და წლებთან ერთად სულ უფრო უკეთესი გახდება.

ბუკერი - ეს არის სიჩქარის მანქანა, რომელიც ძალიან იოლად ტოვებს მცველებს უსაქმოდ. ბოლო სეზონებში ის გაუმჯობესდა, როგორც გამთამაშებელი და დაცვაში თამაშის დახვეწის მხრივ, წინ რამდენიმე ნაბიჯიც გადადგა. ოდესღაც, ის ლიგის საუკეთესო ბომბარდირი გახდება.

12. პორტლენდი - დემიან ლილარდი
დემიან ლილარდი ყოველთვის ისე თამაშობს, თითქოს ეს მისთვის ცხოვრების მატჩი იყოს. ეს არის ერთ-ერთი მთავარი მიზეზი, რის გამოც ის არ შეიძლება არ გძულდეს ან პატივისცემით არ განიმსჭვალო მის მიმართ, თუნდაც არ უვარგოდეს დაცვითი თვისებები.

ლილარდს ნებისმიერი დისტანციიდან შეუძლია ქულების დაგროვება. დროდადრო ის ამტკიცებს, რომ ერთ-ერთი ყველაზე ცივსისხლიანი მექულეა მატჩების გადამწყვეტ მომენტებში. რაც არ უნდა მოხდეს, ის კვლავაც ტოვებს „პორტლენდს“ კონკურენტუნარიან დონეზე.

13. საკრამენტო - დეარონ ფოქსი
დეარონ ფოქსის კარიერა არც ისე კარგად დაიწყო, მაგრამ ლიგაში რიგით მეორე სეზონში მან იპოვა თავისი თამაში და „საკრამენტო“ პერსპექტიულ პროექტად აქცია.

ფოქსი უკვე შესანიშნავი მცველია. ის სწრაფია, ძლიერი და ჭკვიანი გამთამაშებელი. ის შესანიშნავად უძღვება თავის ძირითად როლს და იხვეწება, როგორც სამქულიანების მსროლელი. ასე რომ, კალიფორნიაში შეიძლება კიდევ ერთი სახიფათო გუნდი გამოჩნდეს.

14. სან ანტონიო - დემარ დეროზანი
დღეს დეროზანი ძალიან გაბრაზებულია, რადგან ის, მისი თქმით, „მსხვერპლად შესაწირ ბატკნად“ გამოიყენებოდა „ტორონტოს“ მიერ, რომელიც შარშან ჩემპიონი გახდა სწორედ დეროზანის კავაი ლეონარდზე გაცვლით.

მიუხედავად ამისა, დეროზანი არ იყო ერთადერთი მიზეზი - რატომ ვერ ახერხებდა „ტორონტო“ დიდი ხანი პლეი ოფში წარმატების მიღწევას. ის შესანიშნავი მსროლელია, გამთამაშებელი და მცველი, მაგრამ სამქულიანის ცუდი შესრულება ყოველთვის იყო დემარის პრობლემა.

15. იუტა - რუდი გობერი
„იუტა“ კარგად დაკომპლექტებულია და სერიოზული საფრთხე იქნება თავისი მიმდინარე შემადგენლობით. მაიკ კონლი, დონოვან მიტჩელი, ბოიან ბოგდანოვიჩი და ჯო ინგლსი - მათი არდაფასება შეცდომა იქნება, მაგრამ, სწორედ რუდი გობერი თამაშობს ამ გუნდში მთავარ როლს.

გობერი - ეს არის დაცვის მონსტრი, რომელიც ამთლიანებს „ჯაზის“ თამაშს. გობერი - ლიგის საუკეთესო მცველია. მან ასევე დიდ წარმატებებს მიაღწია თავდასხმაში. თუ ის ჯანმრთელი იქნება, შეიძლება, ბოლოს და ბოლოს, მოხვდეს მომდევნო სეზონში „ყველა ვარსკვლავის მატჩში“.

ყოველდღიური სპორტული გაზეთი "ლელო"
765
მკითხველის კომენტარები / 0 /
მსგავსი ამბები
რუბრიკის სხვა სიახლეები
;