NBA. დურანტი საჭირო არ არის... გოლდენ სტეიტმა დასავლეთის ფინალი მოგებით გახსნა

სტივენ კარიმ და კლეი ტომპსონმა ჯამში 12 სამქულიანი ჩააგდეს და 62 ქულა დააგროვეს, რისი წყალობითაც, "გოლდენ სტეიტმა" დამაჯერებლად დაიწყო დასავლეთი კონფერენციის ფინალური სერია "პორტლენდის" წინააღმდეგ.

ჩემპიონმა ზედიზედ მეორე მატჩი ჩაატარა კევინ დურანტის გარეშე და კარიმ ზედიზედ მეორე მატჩში გაიბრწყინა. წინა შეხვედრაში "ჰიუსტონის" წინააღმდეგ, სტეფს 33 ქულა ჰქონდა, დღეს კი მისი მონაგარი 36 ქულა, 7 პასი და 6 მოხსნა იყო. კარიმ 15-დან ცხრა სამქულიანი ჩააგდო, ტომპსონმა - ცხრიდან სამი.

სერია ისე დაიწყო, რომ "პორტლენდს", სავარაუდოდ, კარგი დღე არ ელოდება და წინა წლების ისტორია განმეორდება, როცა "გოლდენ სტეიტმა" 4:1 და 4:0 მოუგო სერიები, შესაბამისად, 2016 და 2017 წლებში.

"პორტლენდის" ლიდერებს თამაში არ წაუვიდათ. "დენვერთან" სერიის მეშვიდე მატჩის გმირმა სი ჯეი მაკოლუმმა 17 ქულა აიღო, დემიან ლილარდმა 12-დან მხოლოდ ოთხი ჩააგდო და 19 ქულას დასჯერდა.
"უორიორზმა" პირველი სერიოზული გაქცევა მესამე მეოთხედში მოაწყო - 13:5 სპურტის შემდეგ, სხვაობა 17 ქულამდე გაიზარდა (67:50).

მაგრამ ეს არ ყოფილა გადამწყვეტი მომენტი. "პორტლენდმა" როდნი ჰუდისა და სტეფ კარის ძმის - სეტ კარის სამქულიანებით საკუთარი გაქცევა მოაწყო და "გოლდენ სტეიტი" მეოთხე მეოთხედს მხოლოდ ექვსქულიანი უპირატესობით შეხვდა, ბოლო 12-წუთეულის სტარტზე კი სხვაობა ოთხ ქულამდეც დავიდა.

და ამ დროს, მნიშვნელოვანი დარტყმა "პორტლენდს" არა კარიმ ან ტომპსონმა, არამედ ქუინ კუკმა მიაყენა, რომელმაც ზედიზედ ორი სამქულიანი ჩააგდო და სწორედ აქ გატყდნენ სტუმრები.

"გოლდენ სტეიტმა" თამაშიდან 50 პროცენტის სიზუსტით ისროლა და კიდევ უფრო მაღალი ჰქონდა სამქულიანების გამოყენების პროცენტი - 51.5 (17/33). "პორტლენდის" ანალოგიური მაჩვენებლები იყო - 36.1 და 25.0 (7/28) პროცენტი.

დასავლეთი

გ. სტეიტი-პორტლენდი 116:94
27:23, 27:22, 23:26, 39:23
გ-ს: სტეფ კარი (36+6 მოხსნა+7 პასი), ტომპსონი (26+3 ჩაჭრა), გრინი (12+10 მოხსნა+5 პასი+3 დაფარება), იგუოდალა (4+5 პასი), ბოგუტი (2) - სასტარტო; ჟერებკო (9), კუკი (8), ლუნი (6), ლივინგსტონი (4), მაკკინი (3), ბელი (3), ჯონსი (3).
პ: ლილარდი (19+6 პასი), ჰარკლესი (17), მაკოლუმი (17 ), კანტერი (10+16 მოხსნა), ამინუ (3) - სასტარტო; ჰუდი (17), კოლინზი (8), სეტ კარი (3).
სერია: 1-0

352
მკითხველის კომენტარები / 0 /
რუბრიკის სხვა სიახლეები
;