NBA: ზაზა ფაჩულიას 'გოლდენ სტეიტმა' კონფერენციის ფინალი ჰიუსტონში მოგებით გახსნა

ნაციონალურ საკალათბურთო ასოციაციაში კონფერენციის ფინალები დაიწყო. შეგახსენებთ, რომ ზაზა ფაჩულიას "გოლდენ სტეიტმა" რეგულარულ ეტაპზე პირველობა "ჰიუსტონს" დაუთმო და პლეი ოფში მოედნის უპირატესობა სწორედ ტეხასელთა მხარესაა. ამიტომ, სერიის პირველი მატჩი სწორედ ჰიუსტონში დაიწყო და...

..."გოლდენ სტეიტის" გამარჯვებით დასრულდა - 119:106. მასპინძლებს მხოლოდ პირველ ტაიმში ჰქონდათ უპირატესობა, რის შემდეგაც კევინ დურანტი "ტურბო რეჟიმში" ჩაირთო და მისი შეჩერება ვერავინ შეძლო. მეორე მხარეს "ბაბუაწვერა", ჯეიმს ჰარდენი იყო სუპერენერგიით. მატჩი სწორედ დურანტისა და ჰარდენის დუელად იქცა. პირადი შებრძოლება ჯეიმსმა მოიგო - 41 ქულა. კევინს 37 ჰქონდა. 

დურანტმა თამაშიდან 27-დან 14 ჩააგდო, ჰარდენმა 24-დან 14. სხვაობა იცით რა იყო? - KD-ს პარტნიორებმაც აუბეს მხარი, ტომპსონი, გრინი, იგუოდალა და კარი ხომ სწორედ ასეთ მატჩებში გრძნობენ თავს, როგორც თევზი წყალში. კლეი ტომპსონმა 28 ქულა ჩააგდო, კარიმ - 18 ქულა და 8 მოხსნა...

მწვრთნელმა, სტივენ კერმა ამჯერადაც ტანდაბალი ხუთეულით ითამაშა. თამაშის ხასიათიდან გამომდინარე ტანმაღალი და მძიმე მეფარეები არ გამოიყენა. თავად განსაჯეთ: ზაზა ფაჩულიას, ჯორდან ბელსა და ჯავალ მაკგის საერთოდ არ უთამაშიათ. დევიდ ვესტს მხოლოდ 4 წუთი ერგო.

ასე და ამგვარად, "გოლდენ სტეიტმა" "ჰიუსტონს" მოედნის უპირატესობა პირველივე მატჩში წაართვა. მეორე შეხვედრა 17 მაისს ისევ ჰიუსტონში გაიმართება.

"მეომრები" რეკორდზე მიდიან: ბოლო 18 საპლეიოფო სერიიდან სტუმრად მინიმუმ ერთი მატჩი აქვთ მოგებული. ამ მაჩვენებლით აბსოლუტური რეკორდი "მაიამის" აქვს, რომელმაც ერთმანეთის მიყოლებით 19 სერიაში მოახერხა სტუმრად გამარჯვება.

სტეფ კარიმ კი რეკორდი დაამრგვალა: ეს მისთვის მე-80 საპლეიოფო მატჩი იყო, რომელშიც მინიმუმ ერთი სამიანი მაინც აქვს ჩაგდებული. მან ჰიუსტონში 5-დან 1 სამქულიანი გამოიყენა.

635
მკითხველის კომენტარები / 0 /
მსგავსი ამბები
რუბრიკის სხვა სიახლეები