NBA: ზაზა ფაჩულია კონფერენციის ფინალშია!

 ზაზა ფაჩულიას "გოლდენ სტეიტმა" დასავლეთის კონფერენციის ნახევარფინალი 4:1 მოიგო და ფინალშია! ოკლენდელებმა "სან ანტონიოს" შემდეგ "ნიუ ორლეანსაც" დამაჯერებლად აჯობეს და თამამი ნაბიჯებით მიიწევენ ჩემპიონობისკენ. 

კონფერენციის ნახევარფინალის მეხუთე შეხვედრა "მეომართა" მოედანზე გაიმართა. პირველ ტაიმში "პელიკანებმა" არაფერი დაუთმეს, მესამე პერიოდში კი შარშანდელი "გოლდენ სტეიტი" ვიხილეთ, რომელიც თამაშის ბედს 12 წუთში წყვეტდა. ასე მოხდა ამჯერადაც - მესამე რაუნდი მასპინძლებმა 36:19 მოიგეს და კითხვი ნიშნებიც აქ გაქრა. საბოლოოდ 113:104.

"გოლდენ სტეიტის" მწვრთნელს სტივენ კერს გასული სეზონის შემდეგ საინტერესო მაგალითი ჰქონდა: კევინ დურანტმა ტრავმა მიიღო და დაახლოებით ერთი თვე დაისვენა. პლეი ოფში კი ახალი ენერგიით დაბრუნდა და ფინალების საუკეთესოდაც დასახელდა.

   ⇒სტივენ კერი: ზაზა ფაჩულიას პლეი ოფში იმიტომ არ ვათამაშებდი, რომ...

ამჯერად სტეფ კარიმ დაისვენა ერთი თვე. მასაც ტრავმა ჰქონდა. "სან ანტონიოსთან" პირველი ეტაპიც გამოტოვა, პელიკანებთან კი, უკვე ძველი სტეფი იყო - 28 ქულა (6-დან 3 სამიანი), 8 პასი, 7 მოხსნა. 24 ქულა ჰქონდა კევინ დურანტს, 23 - კლეი ტომპსონს. დრეიმონდ გრინს კი სამმაგ დუბლამდე კინკილა პასი დააკლდა - 19 ქულა, 14 მოხსნა, 9 პასი. ზაზა ფაჩულიას არ უთამაშია.

გამარჯვების მეტი არაფერი დაჰკლებია პელიკანელ ჰოლიდეის - 27 ქულა, 10 მოხსნა, 11 პასი. 34 ქულით დაარულა სეზონი ენტონი დევისმა.

დასავლეთის კონფერენციის ფინალში, როგორც მოსალოდნელი იყო ორი სუპერგუნდი შეხვდება. "გოლდენ სტეიტზე" უკვე მოგახსენეთ, მისი მეტოქე "ჰიუსტონი" იქნება, რომელმაც რეგულარულ ეტაპზე აჯობა ზაზას თანაგუნდელებს და ახლა მოედნის უპირატესობასაც ფლობს. სერიის პირველი მატჩი 15 მაისს ჰოუსტონშია დაგეგმილი.

თავის მხრივ "როკეტსმა" კონფერენციის ნახევარფინალში იგორ კოკოშკოვის "იუტას" აჯობა - 3:1.

1105
მკითხველის კომენტარები / 0 /
მსგავსი ამბები
რუბრიკის სხვა სიახლეები