NBA. 'კლივლენდი' 'ინდიანა': ფლეი ოფის სენსაციური დასაწყისი

სენსაციურად დაიწყო "კლივლენდისა" და "ინდიანას" სერია. ლებრონ ჯეიმსმა კარიერაში პირველად წააგო პლეი ოფის პირველი წრის სერიის პირველი მატჩი.

ამაში მთავარი დამნაშავე "ინდიანას" ლიდერი ვიქტორ ოლადიპოა, რომელმაც ცხრიდან ექვსი სამქულიანი ჩააგდო, სულ 19-დან 11 ტყორცნა გამოიყენა და 32 ქულა დააგროვა, რასაც 6 მოხსნა, 4 პასი და 4 ჩაჭრა დაუმატა.

"პეისერსი" მთელი მატჩის განმავლობაში დომინირებდა, "კლივლენდმა" კი თამაშიდან 45.6 პროცენტის სიზუსტით ისროლა. "კავალიერზს" ვერ უშველა ლებრონის სამმაგმა დუბლმა - 24 ქულა, 12 პასი და 10 მოხსნა.

მასპინძლები ერთხელაც არ ყოფილან წინ. პირველივე მეოთხედში 20 ქულით ჩამორჩნენ და მაქსიმუმი რაც მოახერხეს - მესამე მეოთხედში 7 ქულამდე დაიყვანეს ჩამორჩენა.

ტრავმებით დასუსტებული "ბოსტონი" სულაც არ მიიჩნევა "მილუოკისთან" სერიაში ფავორიტად. ეს გამოჩნდა კიდეც სერიის პირველ მატჩში, რომელიც ოვერტაიმში დასრულდა. "სელტიქსმა" დამატებით დროში გატეხა "ბაქსის" წინააღმდეგობა. თამაშის სიმძიმემ "ბოსტონის" ხუთ კალათბურთელზე გადაიარა, დანარჩენმა გუნდმა კი 6 (!) ქულა დააგროვა.

პოლ ჯორჯმა "ოკლაჰომას" რეკორდი დაამყარა პლეი ოფის მატჩებისთვის - რვა სამქულიანი მოათავსა კალათში. სულ ექსინდიანელმა 20-დან 13 ტყორცნა ჩააგდო და 11-დან მხოლოდ სამი სამქულიანი ააცილა.

ამან მას 36 ქულა მოუტანა. ამასთან, ჯორჯი არ იყო მოედანზე ბოლო წუთი, რადგან მუხლის ტრავმა მიიღო. არადა, ბოლოსკენ "იუტამ" ინტრიგა დაუბრუნა შეხვედრას, როცა 18-ქულიანი ჩამორჩენა 6 ქულამდე დაიყვანა, თუმცა, დრო აღარ ეყო.

რეგულარული ჩემპიონატის გამარჯვებულმა "ჰიუსტონმა" მოგებით დაიწყო პლეი ოფი, თუმცა, ძალიან გაუჭირდა ამის გაკეთება. "როკეტსი" რთული სიტუაციიდან მომავალმა MVP-მ ჯეიმს ჰარდენმა გამოიყვანა.

მეოთხე მეოთხედში "მინესოტამ" შეძლო ერთი ქულით წინ გასვლა და სწორედ ამ დროს აიღო თავის თავზე თამაში ჰარდენმა. მან ზედიზედ 12 ქულა ჩააგდო და რვა ქულით გაიყვანა წინ თავისი გუნდი, რის შემდეგაც, სტუმრები მეტოქეს სახიფათო მანძილზე აღარ მიახლოებიან.

საბოლოოდ, ჰარდენმა მატჩი 44 ქულით დაასრულა. მისი შედეგიანობა ძალიან მნიშვნელოვანი იყო, რადგან სროლები არ წაუვიდათ კრის პოლის, ერიკ გორდონსა და ტრევორ არიზას - 30-დან მხოლოდ 9 ტყორცნა ჩააგდეს. პოლი ძალიან სუსტად გამოიყურებოდა - 6 შეცდომა დაუშვა და ექვსიდან ხუთი სამქულიანი ააცილა.

ყოველდღიური სპორტული გაზეთი "ლელო"
445
მკითხველის კომენტარები / 0 /
მსგავსი ამბები
რუბრიკის სხვა სიახლეები