NBA: მემფისური ემოცია - კარი და დურანტი გააძევეს [VIDEO]

მძიმე მატჩი გამოუვიდა ზაზა ფაჩულიას "გოლდენ სტეიტ უორიორსს" მემფისში. მასპინძლები თავიდანვე დაწინაურდნენ, მართალია, დიდი სხვაობით წინ გაჭრას ვერ ახერხებდნენ, მაგრამ შეხვედრა სტაბილურად ჩაატარეს და ზაზას თანაგუნდელებს მოგების შანსი არ დაუტოვეს. საბოლოოდ "მემფისმა" 10 ქულის სხვაობით გაიმარჯვა - 111:101.

მარკ გასოლი და მისი თანაგუნდელები კარგად მომზადებულები აღმოჩნდნენ ჩემპიონებთან თამაშისთვის - ისინი როგორც ფარქვეშ, ასევე პერიმეტრზე ამოსუნთქვის საშუალებას არ აძლევდნენ "გოლდენ სტეიტის" კალათბურთელებს. გამარჯვებაც უმთავრესად "მემფისის" კარგმა დაცვამ განაპირობა.

მატჩი ის იყო, უნდა დასრულებულიყო, რომ ემოციები ვერ მოთოკა სტეფ კარიმ, ბურთის ჩაგდების შემდეგ მსაჯს შეუყვირა, თავისი კბილების დამცავი ესროლა და არბიტრმაც დაუყოვნებლივ გააძევა. ამას მოჰყვა კევინ დურანტის უკურეაქცია და არბიტრმა ისიც კარის მიაყოლა. "გოლდენ სტეიტის" ლიდერები მოედნიდან დაცვის თანამშრომლების თანხლებით გავიდნენ. გზად დურანტმა მსაჯებს შუა თითი უჩვენა.

მანამდე კარიმ 37 ქულის ჩაგდება მოასწრო, დურანტმა - 29-ის. 

"მემფისის" საუკეთესო კალათბურთელი ცენტრი მარკ გასოლი იყო, რომელმაც 34 ქულას 14 მოხსნა მიამატა. მისი მეურვეობა 12 წუთით მოუწია ზაზა ფაჩულიას, უჯარიმოდ ესპანელის გაჩერება მასაც გაუჭირდა, შედეგად მარკმა 17-დან 16 საჯარიმო ტყორცნა გამოიყენა. ქართველმა ცენტრმა 12 წუთში 6 მოხსნა და 2 ჩაჭრა მოაგროვა. იგი ოთხჯერ დაჯარიმდა, სამჯერ გასოლის წინააღმდეგ. 

"უორიორსი" მომდევნო მატჩს "დალასთან" სტუმრად, 24 ოქტომბერს გამართავს.

2375
მკითხველის კომენტარები / 0 /
მსგავსი ამბები
რუბრიკის სხვა სიახლეები