NBA. პლეი ოფი. აღმოსავლეთ კონფერენციაში ყველა ნახევარფინალისტი გაირკვა

აღმოსავლეთ კონფერენციაში, როგორც იქნა, ყველა ნახევარფინალისტი გაირკვა. "

კლივლენდმა" გაჭირვებით, მაგრამ გატეხა "ინდიანას" წინააღმდეგობა და მეშვიდე მატჩში მოგებით დაასრულა სერია. ლებრონ ჯეიმსის გუნდის მომდევნო მეტოქე აღმოსავლეთის ჩემპიონი "ტორონტო" იქნება.

"კავალიერზი" თითქმის მთელი მატჩი წინ იყო. მასპინძლების მაქსიმალური უპირატესობა 14 ქულას შეადგენდა, თუმცა, "პეისერსი" ახერხებდა დიდი მანძილით წინ არ გაეშვა მეტოქე.

სტუმრებმა მხოლოდ ერთხელ მოახერხეს დაწინაურება, როცა მეორე და მესამე მეოთხედების მიჯნაზე 20:4 გაიქცნენ და 61:58 გახადეს ანგარიში. ეს ყველაფერი მესამე მეოთხედის დასრულებამდე 7.13 წუთით ადრე ხდებოდა.

კარგა ხანი, თამაში ქულა ქულაში გაგრძელდა, რის შემდეგაც, "კლივლენდს" მინიგაქცევა ჰქონდა - 7:0 და პრაქტიკულად, ამან გადაწყვიტა მატჩის ბედი. ბოლოსკენ "პეისერსმა" გაიბრძოლა, სირენამდე 50 წამით ადრე, სხვაობა ოთხ ქულამდე შეამცირა, მაგრამ მეტს ვერას გახდა.

ლებრონ ჯეიმსს მორიგი რეკორდები ჰქონდა. მის ანგარიშზე 45 ქულა, 7 შედეგიანი პასი, 9 მოხსნა და 4 ჩაჭრა მოდის. "კლივლენდის" ლიდერი პირველ ადგილზე გადავიდა პლეი ოფში ჩაჭრების რაოდენობით - მან გაუსწრო წინა რეკორდსმენს სკოტი პიპენს (395 ჩაჭრა).

ლებრონის მიერ დაგროვებული 45 ქულა - მეორე შედეგია NBA-ის ისტორიაშია პლეი ოფის მეშვიდე მატჩებისთვის. ჯეიმსზე წინ არის მხოლოდ სემ ჯონსი, რომელმაც 1963 წელს 47 ქულა აიღო.

დასავლეთ კონფერენციაში მეორე ნახევარფინალური სერიაც დაიწყო და პირველი მატჩი აქაც ფავორიტმა მოიგო.

ჯეიმს ჰარდენმა 41 ქულა დააგროვა და "ჰიუსტონს" "იუტასთან" 110:96 მოაგებინა. მცველმა 12-დან 7 სამქულიანი ჩააგდო, აგრეთვე, 8 მოხსნა და 7 შედეგიანი პასიც დააგროვა.

ერთხელ "იუტამ" 27-ქულიანი ჩამორჩენა 11 ქულამდე დაიყვანა. ეს მეოთხე მეოთხედის სტარტზე მოხდა. ჰარდენმა "ჯაზის" ამ მონდომებას სამი ზუსტი საჯარიმოთი, სამქულიანით და საკუთარ აცილებულზე დამატებული ტყორცნით უპასუხა.

"ჰიუსტონმა" მატჩის ბედი პირველივე ტაიმში გადაწყვიტა, როცა თამაშიდან 53.5 პროცენტის სიზუსტით ისროლა და 16-დან 10 სამქულიანი ჩააგდო. პირველი ნახევრის შემდეგ, ანგარიში 64:39 იყო.

ყოველდღიური სპორტული გაზეთი "ლელო"
956
მკითხველის კომენტარები / 0 /
მსგავსი ამბები
რუბრიკის სხვა სიახლეები
;