NBA. პლეი ოფი: 'ბოსტონი' 3-2 'კლივლენდი' - ჯეიმსი დაიღალა და მარტო გაუჭირდება

სერიის მეხუთე მატჩმა გამოაჩინა, რომ ლებრონ ჯეიმსი დაიღალა და მარტო ვერ შეძლებს "კლივლენდის" ფინალში გაყვანას.

"მეფეს" სამი მეოთხედის შემდეგ, 24 ქულა ჰქონდა და თითქოს თავისი მორიგი 40-ქულიანი მატჩისკენ მიდიოდა, მაგრამ ბოლო 12-წუთეულში ძალიან ინერტულად ითამაშა, მხოლოდ ოთხჯერ ისროლა თამაშიდან, ერთხელ ჩააგდო და სულ ორი ქულა აიღო. ლებრონმა ექვსიდან ხუთი სამქულიანი ააცილა, მთლიანად "კავალიერზმა" 34 ცდიდან 9 სამქულიანი გამოიყენა, თამაშიდან კი 42 პროცენტის სიზუსტით ისროლა.

ლებრონის პარტნიორებიდან, მხოლოდ კევინ ლავმა შეძლო 10-ქულიანი ზღვარის გადალახვა, "ბოსტონში" კი ეს ხუთმა კალათბურთელმა მოახერხა.

მატჩის საუკეთესო მოთამაშე, რა თქმა უნდა, "სელტიქსის" დებიუტანტი ჯეისონ ტატუმი იყო, რომელმაც ფანტასტიკური სტატისტიკა შეაგროვა და, ალბათ, სეზონში საუკეთესო მატჩი ჩაატარა: 24 ქულა, 7 მოხსნა, 4 პასი, 4 ჩაჭრა და 2 დაფარება. ტატუმისთვის ეს იყო მეცხრე 20-ქულიანი მატჩი პლეი ოფში. ის გახდა მეექვსე დებიუტანტი ისტორიაში, ვინც თავის პირველ პლეი ოფში 300-ზე მეტი ქულა დააგროვა. მანამდე ეს შეძლეს: ელვან ადამსმა, ელჯინ ბეილორმა, ჯორჯ მიკანმა, ქარიმ აბდულ-ჯაბარმა და ჯეკ სიკმამ.

რაც შეეხება თამაშის მსვლელობას, "კლივლენდი" პირველ მეოთხედში ხუთჯერ მინიმალური სხვაობით გავიდა წინ. ამის შემდეგ, 11:12-ზე "ბოსტონმა" 15:3 გაქცევა მოახერხა და ინიციატივა ხელიდან აღარ გაუშვია. მეორე მეოთხედიდან მოყოლებული, მასპინძლების უპირატესობა ყოველთვის ორნიშნა იყო, მხოლოდ რამდენჯერმე შეძლო "კავალიერზმა" სხვაობის 9 ქულამდე შემცირება.

მეოთხე მეოთხედში "ბოსტონის" დამრიგებელს სტივენსს მხოლოდ ერთხელ მოუწია წუთშესვენების აღება - როცა "კლივლენდმა" 9:0 სპურტი შეძლო და 12 ქულამდე მიუახლოვდა მეტოქეს. თუმცა, უფრო მეტად მატჩი აღარ დაძაბულა.

მეექვსე მატჩი შაბათს, დილით გაიმართება კლივლენდში. ამ სერიაში მხოლოდ მასპინძლები იგებენ, თანაც, თითოეულ მატჩში მინიმუმ ცხრაქულიანი სხვაობა ფიქსირდება ("ბოსტონისთვის" ეს იყო ზედიზედ მეათე საშინაო მოგება პლეი ოფში). ასე რომ, დიდი ალბათობით, გუნდები კიდევ ერთხელ დაბრუნდებიან ბოსტონში - მეშვიდე მატჩის გასამართად.

აღმოსავლეთი

ბოსტონი-კლივლენდი 96:83
32:19, 21:23, 23:18, 20:23

ბ: ტატუმი (24+7 მოხსნა+4 ჩაჭრა), ბრაუნი (17), ჰორფორდი (15+12 მოხსნა), როზირი (8+6 მოხსნა+6 პასი+3 ჩაჭრა), ბეინსი (6+7 მოხსნა+3 დაფარება) - სასტარტო; მორისი (13+6 მოხსნა), სმარტი (13), ნადერი (0), იაბუსელე (0).

კ: ჯეიმსი (26+10 მოხსნა+5 პასი), ლავი (14+7 მოხსნა), ჰილი (7), სმიტი (2), ტომპსონი (1+6 მოხსნა) - სასტარტო; გრინი (8+5 მოხსნა), კლარკსონი (8), კორვერი (7), ჰუდი (5), ჟიჟიჩი (3), ნენსი (2+6 მოხსნა+4 დაფარება), ოსმანი (0), კალდერონი (0).
სერია: 3-2

ყოველდღიური სპორტული გაზეთი "ლელო"
857
მკითხველის კომენტარები / 0 /
მსგავსი ამბები
რუბრიკის სხვა სიახლეები
;