NBA. პლეი ოფი: 'გოლდენ სტეიტი' 'ნიუ ორლეანზე' გავიდა

"გოლდენ სტეიტმა" პლეი ოფში ზედიზედ მე-12 მატჩი მოიგო საკუთარ მოედანზე და გამარჯვებით დაასრულა სერია "სან ანტონიოსთან" - 4:1.

ასე რომ, ვიცით დასავლეთ კონფერენციის ნახევარფინალის პირველი წყვილი - მოქმედი ჩემპიონი "ნიუ ორლეანს" შეხვდება, რომელმაც მოულოდნელად 4:0 გაანადგურა "პორტლენდი".

"გოლდენ სტეიტი" თითქმის მთელი მატჩის განმავლობაში წინ იყო - "სან ანტონიო", რომელსაც ისევ გრეგ პოპოვიჩის ასისტენტი ეტორე მესინა ხელმძღვანელობდა, პირველ ტაიმში ორჯერ დაწინაურდა თითო ქულით.

ეს იყო და ეს. ამის შემდეგ, მატჩში ანგარიშიც კი არ გათანაბრებულა, თუმცა, მეოთხე მეოთხედის ბოლოს იყო "უორიორზისთვის" ერთი კრიტიკული მომენტი, როცა "სპურსმა" სხვაობა ორ ქულამდე შეამცირა - 91:93, მაგრამ ამის შემდეგ, ქულა ვეღარ აიღო.

"სან ანტონიომ" ბოლო 21 წელიწადში მხოლოდ მეხუთედ წააგო პლეი ოფის პირველ რაუნდში.

რაც შეეხება ზაზა ფაჩულიას, "გოლდენ სტეიტის" ქართველ ცენტრს "სან ანტონიოსთან" სერიაში ერთი წამითაც არ უთამაშია.


"ფილადელფია" აღმოსავლეთ კონფერენციაში პირველი გუნდია, რომელმაც ნახევარფინალში გააღწია.

"მაიამისთან" სერიის მეხუთე მატჩის პირველი ტაიმი თანაბარი გამოვიდა - საწყის 24 წუთში ლიდერი 7-ჯერ შეიცვალა და 10-ჯერ გათანაბრდა ანგარიში. გადამწყვეტი აღმოჩნდა მესამე მეოთხედში "ფილადელფიას" ორი სპურტი (9:0, 8:0), რომლის შედეგადაც, მასპინძლების უპირატესობა 18 ქულამდე გაიზარდა. ამის შემდეგ, "სიქსერზმა" იოლად შეძლო უპირატესობის შენარჩუნება.

"ფილადელფია" 2012 წლის შემდეგ, პირველად ითამაშებს კონფერენციის ნახევარფინალში.


ტრადიციულად გრძელდება "ბოსტონსა" და "მილუოკის" შორის სერია - გაიმართა მეხუთე მატჩი და მეხუთედ მოიგო მასპინძელმა.

ორივე გუნდი კატასტროფულად ესროდა თამაშიდან, განსაკუთრებით "მილუოკი", რომელმაც 87-დან 32 ბურთი ჩააგდო (36.8 პროცენტი). ოდნავ უკეთესი ჰქონდა ეს მაჩვენებელი "ბოსტონს" - 42 პროცენტი (29/69).

რაც შეეხება თამაშის მსვლელობას, "ბოსტონმა" მხოლოდ პირველი მეოთხედის სტარტზე გაუშვა წინ მეტოქე, თუმცა ლიდერობა მალე მოიპოვა და ის ბოლომდე არ გაუშვა ხელიდან. მეორე და მესამე მეოთხედებში სხვაობა ორნიშნა იყო, მეოთხეში "მილუოკიმ" ოთხ ქულამდე დაიყვანა ჩამორჩენა, მაგრამ მეტის მიღწევა ვერ შეძლო.

ყოველდღიური სპორტული გაზეთი "ლელო"
280
მკითხველის კომენტარები / 0 /
მსგავსი ამბები
რუბრიკის სხვა სიახლეები