NBA. პლეი ოფი: 'მეფე' მარტო მიათრევს 'კლივლენდს'

აღმოსავლეთი კონფერენციის ფინალურ სერიაში, ჯერჯერობით, მასპინძელი გუნდები იმარჯვებენ, რაც გასაკვირი არ არის.

"ბოსტონს" წლევანდელ პლეი ოფში ცხრიდან ცხრა მოგება აქვს საკუთარ მოედანზე, სტუმრად კი მეექვსე მატჩში მეხუთედ წააგო.

მეორე კანონზომიერება ლებრონ ჯეიმსის ფანტასტიკური თამაშია. "მეფე" მარტო მიათრევს "კლივლენდს" მორიგი ფინალისკენ და მის შეჩერებას ვერავინ ახერხებს. ჯეიმსმა ამ პლეი ოფში მეექვსე 40-ქულიანი მატჩი ჩაატარა და გაუთანაბრდა ალენ აივერსონის 2001 წლის შედეგს. ამ დუეტზე წინ მხოლოდ ორი კალათბურთელია: მაიკლ ჯორდანი, რომელმაც 1989 წელს პლეი ოფში შვიდ მატჩში დააგროვა მინიმუმ 40 ქულა და ჯერი უესტი (8 მატჩი, 1965 წელი).

გარდა ამისა, მეოთხე მატჩის შემდეგ, ლებრონი პლეი ოფის აბსოლუტური რეკორდსმენი გახდა ტყორცნების რაოდენობით. ჯეიმსს 2379 ზუსტი ტყორცნა დაუგროვდა და დაამხო ქარიმ აბდულ-ჯაბარის რეკორდი (2356), რომელიც დაახლოებით 30 წლის წინ იყო დამყარებული.

ჯეიმსმა, ამჯერად, ნაკლებად მოიცალა პარტნიორებისთვის და მხოლოდ სამი შედეგიანი პასი მიითვალა. ლებრონი მუდმივად შეტევაში მიდიოდა, ამიტომაც მოუწია 16 საჯარიმოს შესრულებამ, ხოლო სამწამიანიდან 26 ქულა აიღო.

თუმცა, "კლივლენდის" სხვა მოთამაშეებსაც საკმაოდ სოლიდური წვლილი ჰქონდათ. ცენტრმა ტრისტან ტომპსონმა ისევ დიდი სათამაშო დრო მიიღო და 13 ქულითა და 12 მოხსნით ორმაგი დუბლი შეასრულა, ამასთან, ისევ შეუქმნა პრობლემები ელ ჰორფორდს. კაილ კორვერმა 14 ქულას 3 დაფარება დაუმატა...

მაგრამ, გადამწყვეტ სიტყვას ყოველთვის ლებრონი ამბობდა. მაგალითად, მეოთხე მეოთხედში, როცა "ბოსტონმა" თითქმის მოახერხა თამაშში დაბრუნება და სხვაობა შვიდ ქულამდე შეამცირა. ჯეიმსმა ამას ბოლო ოთხწუთ-ნახევარში 7 ქულის აღებით უპასუხა და სწორედ მან ჩააგდო სამქულიანი სირენამდე 1.43 წუთით ადრე და სხვაობა 14 ქულამდე აიყვანა.

აღმოსავლეთი

კლივლენლდი-ბოსტონი 111:102
34:18, 34:35, 21:23, 22:26
კ: ჯეიმსი (44), ტომპსონი (13+12 მოხსნა), ჰილი (13), ლავი (9+11 მოხსნა), სმიტი (9) - სასტარტო; კორვერი (14), ნენსი (7), გრინი (2), კლარკსონი (0), ოსმანი (0).

ბ: ბრაუნი (25+6 მოხსნა), ტატუმი (17), როზირი (16+6 მოხსნა+11 პასი), ჰორფორდი (15+7 მოხსნა), მორისი (10) - სასტარტო; სმარტი (8), ბეინსი (8+7 მოხსნა), ოჯელეი (3).
სერია: 2-2

ყოველდღიური სპორტული გაზეთი "ლელო"
904
მკითხველის კომენტარები / 0 /
მსგავსი ამბები
რუბრიკის სხვა სიახლეები
;