NBA. პლეი ოფი: ცენტრები საჭირო არ არის

სტეფ კარიმ ვერ მოასწრო ბოლომდე აღდგენა "ნიუ ორლეანთან" სერიის პირველი მატჩისთვის და "გოლდენ სტეიტმა" ისევ მის გარეშე ითამაშა.

ამჯერად, სტივენ კარმა ცენტრის პოზიციაზე დრეიმონდ გრინი დააყენა, ფორვარდად სასტარტოში ნიკ იანგი გამოიყვანა, კარის ადგილას კი ისევ ანდრე იგუოდალა ვიხილეთ. ამ სვლამ გაამართლა: გრინმა ამ პლეი ოფში თავისი საუკეთესო მატჩი ჩაატარა და სამმაგი დუბლი შეასრულა - 16 ქულა, 15 მოხსნა და 11 პასი. ხოლო, როცა ამ ფორვარდს სამმაგი დუბლი აქვს, "გოლდენ სტეიტი" არ აგებს - 26 მოგება და 0 წაგება.

ბრძოლა მატჩში მხოლოდ პირველ მეოთხედში იყო, რომელიც მასპინძლებმა ერთი ქულით მოიგეს. "უორიორზმა", რომელიც, როგორც წესი, მესამე მეოთხედში ასრულებს ხოლმე საქმეს, ამჯერად, მეორე მეოთხედში გაარკვია მატჩის ბედი - ეს 12-წუთეული გუნდმა 41:21 მოიგო.

გრინს მხარი აუბეს კევინ დურანტმა და კლეი ტომპსონმა, რომლებმაც 53 ქულა დააგროვეს, მაგრამ ცალკე აღნიშვნის ღირსია კევონ ლუნის თამაში. მართალია, ამ კალათბურთელმა მხოლოდ სამი ქულა დააგროვა, მაგრამ მისმა გუნდმა 34 ქულით მოუგო დროის ის მონაკვეთი, როცა ლუნი მოედანზე იყო. მას "ნიუ ორლეანის" ლიდერ ენტონი დევისის წინააღმდეგ დაცვა უწევდა და ეს მისია წარმატებით შეასრულა.

სამწუხაროდ, ჯერ ისევ არ უთამაშია ამ პლეი ოფში ზაზა ფაჩულიას. "გოლდენ სტეიტი" კვლავ ქართველი ცენტრის გარეშე გადის ფონს.
სერიის მეორე მატჩში სტეფ კარის მოედანზე დაბრუნებას ველოდებით.

ყოველდღიური სპორტული გაზეთი "ლელო"
1090
მკითხველის კომენტარები / 0 /
მსგავსი ამბები
რუბრიკის სხვა სიახლეები
;