NBA. პლეი ოფი: წინ დიდი ომია

როგორც მოსალოდნელი იყო, დასავლეთი კონფერენციის ფინალში მოქმედი ჩემპიონი "გოლდენ სტეიტი" და რეგულარულის გამარჯვებული "ჰიუსტონი" შეხვდებიან. ორივემ მეოთხედფინალური სერია 4:1 მოიგო.

სტეფ კარის 28 ქულითა და კევინ დურანტის 24 ქულით, "გოლდენ სტეიტმა" 113:104 მოიგო და დაასრულა "ნიუ ორლეანის" ზღაპარი. "პელიკანებმა" ტრავმირებული დემარკუს კაზინსის გარეშე, საკმაოდ შორს გააღწიეს და "გოლდენ სტეიტთან" სერიაშიც სიმპათიურად გამოიყურებოდნენ, რაც მთავარია ბოლომდე იბრძოდნენ, როგორც ეს გუშინდელ მატჩში იყო.

"გოლდენ სტეიტმა" მხოლოდ სამი ქულით მოიგო პირველი ტაიმი, მაგრამ, როგორც ხშირად ხდება, მესამე მეოთხედში მოიპოვა უდიდესი უპირატესობა - 29:6 გაქცევით სხვაობა 26 ქულა გახდა - 88:62. ასეთი დარტყის შემდეგ, "ნიუ ორლეანმა" მაინც შეძლო თამაშში დაბრუნება, როცა სირენამდე ორი წუთით ადრე, სხვაობა შვიდ ქულამდე შეამცირა, თუმცა, მეტი ვეღარ მოახერხა.

რომ არა ეს ქამბექი, სავარაუდოდ, ბოლოსკენ მოედანზე ვიხილავდით ზაზა ფაჩულიას, მაგრამ, ამჯერად, ქართველ ცენტრს თამაშმა არ მოუწია.
"გოლდენ სტეიტისთვის" ეს იყო პლეი ოფში ზედიზედ მე-15 საშინაო მოგება, რაც "ჩიკაგო ბულზის" რეკორდის გამეორებაა, რომელიც 1990-91 წლებშია დამყარებული.

ზედიზედ მეორე მატჩში "ჰიუსტონში" საუკეთესო არა ჯეიმს ჰარდენი, არამედ კრის პოლი იყო, რომელმაც პლეი ოფში შედეგიანობის პირადი რეკორდი დაამყარა - 41 ქულა დააგროვა, რასაც 10 პასი და 7 მოხსნა დაუმატა. რაც მთავარია, თითქმის 48 წუთის განმავლობაში, პოლს არცერთი შეცდომა არ დაუშვია. 1977-78 წლების სეზონიდან მოყოლებული, როცა შეცდომები მატჩების ოფიციალურ სტატისტიკაში შეიტანეს, რაც არაერთ მოთამაშეს არ ჰქონია მინიმუმ 40 ქულა, 10 პასი და 0 დაკარგვა.

სწორედ პოლმა გადაწყვიტა მატჩის ბედი მეოთხე მეოთხედში, როცა "იუტამ" ერთ ქულამდე შეამცირა სხვაობა. ამ რთულ მომენტში "ჰიუსტონის" გამთამაშებელმა ზედიზედ რვა ქულა აიღო და სირენამდე სამი წუთით ადრე, ანგარიში 105:96 გახდა.

პოლი მე-13 სეზონია NBA-ში თამაშობს და პირველად მოხვდა კონფერენციის ფინალში. მანამდე, "კლიპერსის" მაისურით ამგვარი პატივი არ ღირსებია.

რაც შეეხება ჯეიმს ჰარდენს, მან ძალიან ცუდად ისროლა (თამაშიდან - 7/22), მაგრამ უნებლიედ, ერთი სასარგებლო საქმე გააკეთა - მასთან შეჯახებისას, ტრავმა მიიღო "იუტას" ვუნდერკინდმა დონოვან მიტჩელმა და მან ბოლო 7 წუთი ვეღარ ითამაშა. არადა, მიტჩელს მაგარი სვლა ჰქონდა აღებული - თავისი 24 ქულიდან 22 მან მესამე მეოთხედში ჩააგდო და 14:2 გაქცევის შემდეგ, "იუტას" ლიდერობა მოუტანა.

მიტჩელის ტრავმამ კიდევ უფრო გააღარიბა "იუტას" უკანა ხაზი. შეგახსენებთ, რომ "როკეტსთან" სერიაში საერთოდ არ უთამაშია რიკი რუბიოს, გუშინდელი მატჩი კი გამოტოვა დანტე ეკზამმა.

"ჰიუსტონისა" და "გოლდენ სტეიტის" სერია სამშაბათს დაიწყება. საკუთარი მოედნის უპირატესობა "როკეტსს" აქვს და შესაბამისად, პირველი ორი მატჩი ჰიუსტონში გაიმართება.

დასავლეთი

ჰიუსტონი-იუტა 112:102

21:16, 33:30, 21:32, 37:24

ჰ: პოლი (41+7 მოხსნა+10 პასი), ტაკერი (19+6 მოხსნა+3 დაფარება), ჰარდენი (18), კაპელა (5+5 დაფარება), არიზა (2+6 მოხსნა) - სასტარტო; მბა ა მუტე (8), გრინი (8), ნენე (6), გორდონი (5).

ი: მიტჩელი (24+9 პასი), ო"ნილი (17), გობერი (12+9 მოხსნა+5 დაფარება), ინგლსი (12+6 პასი), კრაუდერი (6+8 მოხსნა) - სასტარტო; ბერკსი (22), ფეივორსი (6+6 მოხსნა), ჟერებკო (3), ნეტო (0).

სერია: 4-1

გ. სტეიტი-ნ. ორლეანი 113:104

32:26, 27:30, 36:19, 18:29

გ-ს: კარი (28+7 მოხსნა+8 პასი), დურანტი (24+6 მოხსნა+7 პასი), ტომპსონი (23+6 მოხსნა), გრინი (19+14 მოხსნა), იგუოდალა (2) - სასტარტო; ლივინგსტონი (6), კუკი (5), ლუნი (4+8 მოხსნა), ბელი (2), უესტი (0).

ნ-ო: დევისი (34+19 მოხსნა+4 დაფარება), ჰოლიდეი (27+10 მოხსნა+11 პასი), მიროტიჩი (12+7 მოხსნა), მური (10), რონდო (7+7 პასი) - სასტარტო; კლარკი (9), მილერი (5), ჰილი (0).
სერია: 4:1

ყოველდღიური სპორტული გაზეთი "ლელო"
673
მკითხველის კომენტარები / 0 /
მსგავსი ამბები
რუბრიკის სხვა სიახლეები