NBA-ს პლეი ოფი 2009. მაიამის მწვრთნელი: ფაჩულიას გარშემო ხალხი ცვიოდა, ბურთი იკარგებოდა

ზაზა ფაჩულია NBA-ს ჩემპიონობისკენ მეორე წრეზე მიდის. თუმცა წლეულს მას პლეი ოფის საწყის ორ ეტაპზე ძალიან ცოტა აქვს ნათამაშები. იმედი დავიტოვოთ, რომ კონფერენციის ფინალში სტივენ კერი ჩვენიანს საკმარისად დატვირთავს. მანამდე კი გავიხსენოთ ზაზას საუკეთესო მატჩი პლეი ოფებში. ეს იყო 2009 წელს, "ატლანტა"-"მაიამის" დაპირისპირება...

გულშემატკივართა სამოტივაციო წერილები

- რეგულარული ჩემპიონატი დამაჯერებლად გავიარეთ და აღმოსავლეთის კონფერენციაში მეოთხე ადგილი დავიკავეთ, - მოგვითხრობს ზაზა, - ხოლო, როცა "მაიამიმ" "ნიუ იორკს" სძლია, გაირკვა, რომ პლეი ოფის პირველ ეტაპზე ჩვენი მეტოქე სწორედ ფლორიდული გუნდი იქნებოდა. რეგულარულში მაიამელებს 4-დან 3 მატჩი მოვუგეთ, რაც მომდევნო ეტაპზე გასვლის იმედს გვაძლევდა.

- რეგულარული ჩემპიონატი პლეი ოფისგან ისე განსხვავდება, როგორც დღე და ღამე. მატულობს ინტენსიურობა, ძალისმიერი თამაში, იზრდება დატვირთვა. კომპიუტერული თამაშების ენაზე რომ ვთქვათ, მანქანა "ტურბო" რეჟიმში ირთვება... ეს არცაა გასაკვირი, რადგან მთელი მსოფლიოს ყურადღება პლეი ოფისკენაა მომართული და ჩემპიონობამდე თითოეულ გუნდს მხოლოდ 16 მოგება აშორებს. ყველა კალათბურთელი მაქსიმუმს დებს, რადგან არავინ იცის, კიდევ როდის მოუწევს პლეი ოფში თამაში.

- გამიხარდა, რომ მეტოქედ "მაიამი" გვერგო. ამ ქალაქში არასაკალათბურთო სეზონში დიდ დროს ვატარებ. იქ ბევრი მეგობარი მყავს. მაიამის ცხოვრება ნამდვილად სახალისოა, მაგრამ 2009 წელს ამის დრო არ იყო, მაიამიში სათამაშოდ და მოსაგებად ჩავედი.

   ზაზა ფაჩულია: უესტბრუკს იმიტომ წამოვადექი თავს, რომ...

- გულშემატკივრებისგან საინტერესო წერილები მივიღე. ისინი მთხოვდნენ, ისეთივე შემართებით მეთამაშა, როგორც წინა პლეი ოფში "ბოსტონ სელტიკსთან". თუმცა ვფიქრობ, მთელი სეზონის განმავლობაში სწორედ ასეთი მონდომებით ვირჯებოდი.

რეგულარულის ბოლოს ზურგი ვიტკინე. რამდენიმე დღე მაწუხებდა, მაგრამ დავასვენე, ვიმკურნალე და "მაიამი ჰიტთან" საბრძოლველად მოვემზადე.

ათრაუნდიანი ბრძოლა ტაისონთან

სიტყვა "ბრძოლა" უნდა გავიაზროთ როგორც პირდაპირი, ასევე გადატანითი მნიშვნელობით. გადატანითია, როცა საქმე საკალთბურთო მატჩს, ტაქტიკურ დაპირისპირებას ეხება. პირდაპირი მნიშვნელობით - ხელჩართული! ფაჩულიასთვის ორივე ერთია - ხელსაც რთავს, გონებასაც და ტაქტიკასაც. არ უნდა გაგვიკვირდეს, "მაიამი ჰერალდში" ასეთი რამ რომ ეწერა: "ზაზა ფაჩულიას "ჰიტთან" მატჩის შემდეგ თვალი ისეთი დალურჯებული ჰქონდა, გეგონებოდათ, მაიკ ტაისონთან ათრაუნდიანი ბრძოლა ჰქონდა გადატანილი".

ზაზა გაკვირვებული იყო:

- თამაშში ისე ვიყავი ჩაფლული, რომ ნამდვილად არ მიგრძვნია, ვინ მომაყენა ტრავმა. თვალზე ხელი შემთხვევით დავიდე და შესიება ვიგრძენი. მომდევნო შეხვედრა თვალჩალურჯებულმა ვითამაშე.

"მაიამისთან" კონფერენციის მეოთხედფინალური დაპირისპირება იყო 2008-09 წლების სეზონის მთავარი მოვლენა, ხოლო სერიის მეოთხე მატჩი - წლის ჰიტი. ზაზასთვის. "ატლანტასთვისაც".

- სერიაში ანგარიშია 1:2. "მაიამისთან" მესამედაც თუ წავაგეთ, 1:3 ჩამოვრჩებით და ნახევარფინალს უნდა დავემშვიდობოთ, - თქვა ზაზა ფაჩულიამ "ჰიტთან" მეოთხე თამაშის წინ და...

...საპლეიოფო კარიერის საუკეთესო მატჩი გამართა. პლეი ოფში პირველად ითამაშა 34 წუთი, პირველად ჩააგდო 12 ქულა, პირველად მოხსნა 18-ჯერ და "ატლანტას" 1997 წლის შემდეგ პირველად მოაგებინა გასვლითი საპლეიოფო მატჩი (ჯორჯიელებმა 1997 წლის 8 მაისს მაიკლ ჯორდანის "ჩიკაგო" დაამარცხეს). "ატლანტა"-"მაიამის" სერიაში ანგარიში გათანაბრდა - 2:2.



ეს წარმოუდგენელია

ამერიკელ ჟურნალისტებს ჩვენზე უკეთ რომ ეხერხებათ სპორტსმენის ცაში აყვანა, თავადაც დარწმუნდებით. დავიწყოთ NBA-ს ოფიციალურ ვებ-საიტზე გამოქვეყნებული მიმოხილვით, რომელშიც პირველი ფრაზა ქართული გვარით იწყება:

"ზაზა ფაჩულიას მარჯვენა თვალი ჩალურჯებული ჰქონდა. მის სახეს აშკარად ეტყობოდა ბრძოლის ნაკვალევი...

- როკი ბალბოას ვგავარ, - იხუმრა ქართველმა.

იგი მაიამიში მართლაც როკივით იბრძოდა. სწორედ მან მოუტანა "ჰოქსს" გასვლითი გამარჯვება და სერიაში ანგარიში გაათანაბრა.

- ზაზა შესანიშნავი იყო. მთელი მატჩი ენერგიულად ჩაატარა. გადარჩენისთვის სწორედ ეს გვჭირდებოდა, - განაცხადა მატჩის შემდეგ "ატლანტას" თავკაცმა მაიკ ვუდსონმა. გაკვირვებული იყო "ჰიტის" მთავარი მწვრთნელი ერიკ სპოელსტრა:

- ატლანტელ ცენტრს ყველაფერი გამოსდიოდა. მის გარშემო ხალხი ცვიოდა, ბურთები იკარგებოდა. ფაჩულიამ მატჩის შედეგზე დიდი გავლენა მოახდინა. 18 მოხსნა... ეს წარმოუდგენელია.

- როცა ასეთი შეფასებები მესმის, ყოველთვის ერთს ვამბობ – გმადლობთ, - ეს უკვე ზაზას სიტყვებია.
სერიამ ატლანტაში გადაინაცვლა და საბოლოდ ჯორჯიელთა მინიმალური გამარჯვებით დასრულდა - 4:3.

ლებრონი

კონფერენციის ნახევარფინალში "ჰოქსს" კვლავ მომავალი ჩემპიონი, ამჯერად არა "ბოსტონი" არამედ, ლებრონ ჯეიმსის "კლივლენდი" დაუპირისპირდა.

- "კლივლენდთან" 0:4 წავაგეთ, - პირდაპირია ფაჩულია, - მარცხის მიზეზი ფსიქოლოგიაში იყო: ვფიქრობდით - შეგვიძლია თუ არა "კავალიერსის" ძლევა, ნაცვლად იმისა, რომ დარწმუნებით გვეთქვა - "კლივლენდს" დავამარცხებთ! შეიძლება, სერიის მოგება მაინც ვერ მოგვეხერხებინა, მაგრამ "კავსთან" უკეთესად თამაში შეიძლებოდა.

ჯორჯიელთა 27-ე ნომერს ცდა არ დაუკლია, არც "კავალერიას" შეეპუა და არც თემიდას:

"ატლანტა"-"კლივლენდის" მესამე მატჩის ბოლო მეოთხედს ზაზა ფაჩულია გასახდელში შეხვდა. იგი მესამე პერიოდის დასრულებამდე 1:33 წუთით ადრე მსაჯმა ბილ სნუპერმა მოედნიდან გააძევა. მიზეზი: იატაკზე დავარდნილმა ზაზამ მსაჯისკენ ფეხზე წამოდგომამდე გაიწია, თუმცა იგი ფლიპ მარეიმ მაისურით დაიჭირა და არბიტრამდე არ მიუშვა. ზაზამ მსაჯს ხმა მაინც მიაწვდინა და მისგან ჯერ ერთი ტექნიკური დაიმსახურა, შემდეგ - მეორე და მოედნის დატოვებამ მოუწია.

   კარგი თუ ცუდი? როგორი იყო რეგულარული ზაზა ფაჩულიასთვის?

მხოლოდ ქართველი როდი გაცხარდა, ერთ-ერთმა გულშემატკივარმა არბიტრის მიმართულებით საკლასო რვეულის ფორმისა და სისქის საგანი ისროლა...
მატჩისშემდგომ პრესკონფერენციაზე "ჰოქსის" თავკაცმა მაიკ ვუდსონმა საუბარი ზაზას გაძევებით დაიწყო:

- იმ ეპიზოდში მართლები ჩვენ ვიყავით. მატჩის ვიდეოჩანაწერი არ მინახავს, მაგრამ მოედნის კიდიდან როგორც შევნიშნე, ზაზა ფაჩულიამ სუფთად დაუფარა... თუმცა მან ემოციები ზედმეტად გამოამჟღავნა. ამ ეპიზოდამდე მატჩი ქულა-ქულაში მიდიოდა, შემდეგ კი მეტოქემ აშკარად გვაჯობა.
გაძევებაზე კომენტარი არც ფაჩულიამ დაიზარა:

- გავბრაზდი იმიტომ, რომ მეგონა, მსაჯი ფოლს მეტოქეს მისცემდა, მაგრამ მან მე დამაჯარიმა. შეიძლება ზედმეტადაც ავღელდი...
იმ მატჩში ლებრონ ჯეიმსმა 47 ქულას მოუყარა თავი.

- ჯეიმსი MVP-ად შემთხვევით არავის აურჩევია. იგი ლიგის საუკეთესო კალათბურთელია, - სიტუაციას მოკლედ და რეალურად აფასებდა ზაზა.

ფრთხილად, ზაზას იდაყვია!

კლივლენდურ პრესაში ფაჩულიას შესახებ გამოქვეყნდა სტატია, რომელშიც იგი მეტოქეთათვის მეტად საშიშ კალათბურთელადაა წარმოდგენილი:
"ატლანტელთა მეფარეს, ზაზა ფაჩულიას NBA-ში სახიფათო იდაყვის მქონე მოთამაშის რეპუტაცია აქვს. იგი მოხსნისთვის ფარისკენ რომ მიიწევს, გზად არავის ინდობს. ამაში დაგვეთანხმება "მაიამის" ფორვარდი ჯერმეინ ონილი, რომელსაც ზაზა მეხუთე მატჩში იდაყვით "გაუმასპინძლდა" და მომდევნო თამაში გამოატოვებინა.

ქართველი ცენტრისგან ილგაუსკასსაც და ვარეჟაოსაც მოხვედრიათ. ორი წლის წინათ ზაზასთან შეჯახებისას ჟიდრუნას ილგაუსკასმა სერიოზული ტრავმა მიიღო, ხოლო ანდერსონ ვარეჟაოს ქართველმა ისეთი უთავაზა, რომ დაზარალებულს შესახორცებლად გაკერვა დასჭირდა.

ილგაუსკასი:

- იმის გამო, რომ ზაზა ფაჩულიას იდაყვს მოვერიდო, ჩემი სათამაშო სტილის შეცვლას არ ვაპირებ. მიმაჩნია, რომ ქართველი არც ისეთი უხეშია, როგორიც დიკემბე მუტომბო.

"ატლანტამ" "კლივლენდთან" სერია 0:4 რომ დათმო, უკვე მოგახსენეთ. ეს იყო 2009 წლის თავგადასავლებით აღსავსე პლეი ოფი...

3147
მკითხველის კომენტარები / 0 /
მსგავსი ამბები
რუბრიკის სხვა სიახლეები