NBA-ს სტარტი ჰეივორდის საშინელმა ტრავმამ გააფუჭა [VIDEO]

- ლებრონ ჯეიმსი მატჩში ყველაზე შედეგიანი იყო 29 ქულით. "კლივლენდის" ლიდერმა კარიერაში მეათედ შეძლო სეზონის გახსნის მატჩში მინიმუმ 25 ქულის დაგროვება. უფრო მეტი ასეთი თამაში ჰქონიათ - მაიკლ ჯორდანსა (11) და დომინიკ უილკინსს (11).

- ჯეისონ ტატუმი "სელტიქსის" პირველი მოთამაშეა ლარი ბერდის (1979) შემდეგ, რომელმაც კარიერის სადებიუტო მატჩში ორმაგი დუბლი მიითვალა.

"ბოსტონის" რიგებში დებიუტიდან რამდენიმე წუთის შემდეგ, გორდონ ჰეივორდი ცუდად დახტა მოედანზე, რამაც ტრაგიკული შედეგი მოიტანა. თანაგუნდელები, "კლივლენდის" კალათბურთელები, მწვრთნელები, კომენტატორები, გულშემატკივრები ერთხმად გაჩუმდნენ, როცა ჰეივორდმა ტკივილისგან ყვირილი დაიწყო.

მისი ფეხი ამოტრიალებული იყო, რაც კოჭის მოტეხილობაზე მიუთითებდა. ეს კი იმას ნიშნავდა, რომ "კელტების" გენერალური მენეჯერის დენი ეინჯის განახლებული სისტემა, ფაქტობრივად, კრახის წინაშე აღმოჩნდა.

"ბოსტონის" ხელმძღვანელობის ვარაუდით, ჰეივორდი კარგად უნდა შერწყმოდა კოლეჯის დროინდელ მწვრთნელს ბრედ სტივენსს და დახმარებოდა კაირი ირვინგს განახლებული და ამბიციური "სელტიქსის" ტრიუმფში. ჰეივორდმა კლუბთან მაქსიმალური კონტრაქტი გააფორმა (128 მილიონი დოლარი). იმისთვის, რომ კალათბურთელს ეს ხელფასი მიეღო, ეინჯი იძულებული გახდა ეივერი ბრედლი "დეტროიტში" გაეცვალა, აგრეთვე რამდენიმე მნიშვნელოვანი მოთამაშე თავისუფალი აგენტის სტატუსით გაეშვა.

ბრედლისა და სხვების წასვლის შემდეგ, ეინჯმა, ალბათ, ყველაზე თამამი სვლა გააკეთა თავის კარიერაში - კაირი ირვინგში გაცვალა აიზია ტომასი, ჯეი კრაუდერი, ანტე ჟიჟიჩი და 2018 წლის დრაფტის პირველი რაუნდის არჩევანი. მაგრამ ახლა ეინჯის ყველა ოცნებას ტიტულზე ძალიან დიდი საფრთხე დაემუქრა.

ცხადია, რომ ჰეივორდი დიდი ხნით გამოვიდა მწყობრიდან და საინტერესოა - რა გარდაქმნებს მიმართავს "ბოსტონის" შეფობა გუნდის გადასაწყობად: ტრეიდი, თავისუფალი აგენტის აყვანა ან მეტი ნდობა ახალგაზრდებს?

რაც შეეხება სეზონის პირველ მატჩს, დებიუტში მიღებული შოკის მიუხედავად, "სელტიქსმა" დიდი წინააღმდეგობა გაუწია სტუმრად "კლივლენდს". პირველი ნახევარი მასპინძლებმა სოლიდური სხვაობით მოიგეს - 54:38, მაგრამ მესამე მეოთხედში "ბოსტონმა" შთამბეჭდავი გაქცევა მოაწყო და ბოლო 12-წუთეულისთვის სხვაობა ერთ ქულამდე შეამცირა - 71:72. გამარჯვებული ბოლოს გაირკვა, როცა "კლივლენდს" ლებრონ ჯეიმსისა და კევინ ლავის ზუსტმა ტყორცნებმა მოაგებინეს.

კლივლენდი-ბოსტონი 102:99

29:19, 25:19, 18:33, 30:28

კ: ჯეიმსი (29+16 მოხსნა+9 პასი), ლავი (15+11 მოხსნა), როუზი (14), კრაუდერი (11), სმიტი (10).

ბ: ბრაუნი (25), ირვინგი (22+10 პასი), ტატუმი (14+10 მოხსნა), სმარტი (12+9 მოხსნა), ჰორფორდი (9+7 მოხსნა).

ყოველდღიური სპორტული გაზეთი "ლელო"

651
მკითხველის კომენტარები / 0 /
მსგავსი ამბები
რუბრიკის სხვა სიახლეები