NBA. ფლეი ოფი: ფინალისტების დასახელება შეიძლება

ეროვნული საკალათბურთო ასოციაციის პლეი ოფის მეოთხედფინალში ჯერ არცერთი სერია არ დასრულებულა, მაგრამ უკვე შეიძლება ორივე კონფერენციაში ფინალისტების დასახელება.

აღმოსავლეთში "ბოსტონი" და "კლივლენდი" 3:0-ს იგებენ თავიანთ სერიებს, NBA-ის ისტორიაში კი არასოდეს ყოფილა შემთხვევა, რომელიმე გუნდს ასეთი ანგარიშის შემდეგ წაეგოს სერია.

რაც შეეხება დასავლეთ კონფერენციას, აქ გუშინ ორივე წყვილში მეოთხე მატჩები გაიმართა. "ჰიუსტონმა" და "გოლდენ სტეიტმა" სტუმრად მოიგეს, 3:1 დაწინაურდნენ და შემდეგ მატჩებს საკუთარ მოედანზე ჩაატარებენ. ასე რომ, მათი შეხვედრაც დასავლეთის ფინალში თითქმის გარდაუვალია.

მეოთხე მატჩში "როკეტსმა" ერთხელ წინ გასვლის საშუალებაც არ მისცა "იუტას". თუმცა, ისე იოლადაც ვერ გაიმარჯვა, როგორც წინა შეხვედრაში, როცა უკვე პირველი ტაიმის შემდეგ 70:40-ს იგებდა. არადა, ამის შანსი გუშინდელ მატჩშიც არსებობდა, როცა სტუმრებმა მეორე მეოთხედი 8:0 გაქცევით დაიწყეს და 15 ქულით დაწინაურდნენ. თუმცა, "იუტამ" ძალიან შორს არ გაუშვა მეტოქე და პირველი ტაიმი მხოლოდ 10 ქულით წააგო - 48:58.

მთელი მესამე მეოთხედი "ჰიუსტონი" ორნიშნა უპირატესობას ინარჩუნებდა, ერთხელ 19 ქულითაც გავიდა წინ, მაგრამ მაინც მიეცა ოდნავ ნერვიულობის საბაბი, როცა სირენამდე 6 წუთით ადრე, "იუტამ" სხვაობა 5 ქულამდე შეამცირა. თუმცა, "ჯაზის" ეს გაქცევა კლინტ კაპელამ და ტრევორ არიზამ შეაჩერეს, რომლებმაც ზედიზედ ხუთი ქულა აიღეს და სხვაობა ისევ ორნიშნა გახადეს. "იუტას" თამაშის გადარჩენის შანსი აღარ ჰქონია.

"გოლდენ სტეიტი" დროულად მოვიდა გონს მესამე მატჩში წაგების შემდეგ და მეოთხე შეხვედრაში საჩემპიონო თამაში აჩვენა. "მეომრების" განწყობა სტარტიდანვე გამოჩნდა, როცა მატჩი მათი 16:2 გაქცევით დაიწყო. მეოთხედი სტუმრებმა 15 ქულით მოიგეს, მაგრამ მეორე 12-წუთეულში "ნიუ ორლეანმა" შეძლო თამაშში დაბრუნება - სხვაობა 5 ქულამდე შეამცირა, ტაიმი კი მხოლოდ 7 ქულით წააგო.

მაგრამ, ისევე როგორც პირველი ტაიმი, მეორეც სტუმრებმა გაქცევით დაიწყეს - 10:2 და სხვაობა 15 ქულამდე ავიდა. მეორედ ქამბექის საშუალება "გოლდენ სტეიტმა" მეტოქეს აღარ მისცა და სირენამდე დიდი ხნით ადრე გადაწყვიტა მატჩის ბედი, რამაც საშუალება მისცა ზაზა ფაჩულიას ბოლო სამწუთ-ნახევარი გაეტარებინა მოედანზე. ქართველს თამაშიდან არ უსვრია, ორიდან ერთი საჯარიმო ჩააგდო, თითო მოხსნა და ჩაჭრა მიითვალა და მატჩი "+3"-ით დაასრულა.

მნიშვნელოვანი მიღწევა ჰქონდა "უორიორზის" ლიდერს სტეფ კარის. მან ოთხი სამქულიანის გამოყენება მოახერხა და პლეი ოფში ზუსტი შორეული ტყორცნების რაოდენობა 326-მდე აიყვანა. კარიმ გაუსწრო მანუ ჯინობილის და მესამე ადგილზე გადავიდა ყველა დროის სიაში. მასზე წინ მხოლოდ ლებრონ ჯეიმსი (346 ზუსტი სამქულიანი) და რეი ალენი (385) არიან.

დასავლეთი

ნ. ორლეანი-გ. სტეიტი 92:118
22:37, 32:24, 19:33, 19:24

ნ-ო: დევისი (26+12 მოხსნა), მური (20), ჰოლიდეი (19+7 მოხსნა), მიროტიჩი (7+11 მოხსნა), რონდო (6+11 მოხსნა+6 პასი) - სასტარტო; კლარკი (11+3 ჩაჭრა), ჰილი (3), მილერი (0), დიალო (0), ლიგინსი (0).

გ-ს: დურანტი (38+9 მოხსნა+5 პასი), კარი (23), ტომპსონი (13+7 მოხსნა), გრინი (8+9 მოხსნა+9 პასი+4 ჩაჭრა), იგუოდალა (6+7 მოხსნა+6 პასი+3 ჩაჭრა) - სასტარტო; კუკი (12), ლუნი (7), ლივინგსტონი (4), უესტი (4), მაკგი (2), ფაჩულია (1), იანგი (0), ბელი (0).
სერია: 1-3

იუტა-ჰიუსტონი 87:100
23:30, 25:28, 17:21, 22:21

ი: მიტჩელი (25+9 მოხსნა+4 ჩაჭრა), ინგლსი (15+8 მოხსნა), გობერი (11+10 მოხსნა+3 დაფარება), ო"ნილი (8), კრაუდერი (5) - სასტარტო; ეკზამი (9), ნეტო (9), ფეივორსი (5), ჟერებკო (0), ბერკსი (0).

ჰ: პოლი (27+12 მოხსნა+6 პასი), ჰარდენი (24+4 ჩაჭრა), კაპელა (12+15 მოხსნა+6 დაფარება), ტაკერი (11+7 მოხსნა), არიზა (6) - სასტარტო; გორდონი (9), გრინი (6), მბა ა მუტე (3), ნენე (2).
სერია: 1:3

ყოველდღიური სპორტული გაზეთი "ლელო"
1173
მკითხველის კომენტარები / 0 /
მსგავსი ამბები
რუბრიკის სხვა სიახლეები
;