NBA. ხუთი ცხრიანი: ზაზა 9, ემბიიდი 39, დეტროიტი 99, ფილა 109

ზაზა ფაჩულიას "დეტროიტ" პისტონსი "ფილადელფიას" ესტუმრა და მეტად არათანაბარ მატჩში 99:109 დამარცხდა. ვიდრე შეხვედრის მსვლელობაზე მოგახსენებდეთ, გეტყვით, რომ ზაზამ 16 წუთში 9 ქულა, 3 მოხსნა, 3 პასი და 1 ჩაჭრა მოაგროვა. მან 4-4 ორქულიანი და საჯარიმო სტყორცნა და 3-3 ჩააგდო.

ზაზას და "დეტროიტის" სასტარტო ცენტრ ანდრე დრამონდს 5-5 ფოლი ჰქომდათ, რაც უმთავრესად "ფილას" კამერუნელი ცენტრის ჯოელ ემბიიდის დამსახურებაა. მისი შეჩერება, განსაკუთრებით პირველ ტაიმში ვერავინ შეძლო - დიდ შესვენებაზე 32 ქულით გავიდა. ემბიიდს 19-დან 17 ტყორცნა ჰქონდა გამოყენებული. მისმა გუნდმა კი პირველი ტაიმი 69:47 მოიგო.

მეორე ნახევარში "ფილადელფია" რამდენჯერმა "გაშტერდა", გადიოდა 4-5 წუთი, ქულას ვერ აგდებდა. ზაზა ფაჩულიაც კარგად დაუდგა ემბიიდს, მართალია, ჯარიმის ზღვარზე ეთამაშებოდა და მსაჯებიც ყოველ მცირე შეხებაზე სტვენდნენ, მაგრამ ზაზამ ჯარიმებიც მიაღებინა და ბურთიც არაერთხელ დააკარგვინა. 

თუმცა ამას შეხვედრის შედეგზე გავლენა აღარ მოუხდენია. მეოთხე პერიოდში "დეტროიტმა" სხვაობა 5 ქულამდეც შეამცირეს, მაგრამ ეს იყო და ეს "ფილადელფიას" გამარჯვება ხელიდან არ გაუშვია. ამის მთავარი მიზეზი, რა თქმა უნდა ემბიიდი იყო, მაგრამ მაშინაც კი, როცა "პისტონსი" დაცვაში კარგად გამოიყურებოდა და მასპინძლები შეტევას შეტევაზე აფუჭებდნენ, დეტროიტელებს ქულების მოგროვება უჭირდათ. როდესაც ფარქვეშიდან ქულების ჩაგდება ჭირს, პერიმეტრი უნდა აამოქმედო, სტუმრებს კი ერთი კალათბურთელი არ აღმოაჩნდათ, სამქულიანებით თამაშის შემოტრიალებას რომ შეეცდებოდა.

ემბიიდმა საბოლოოდ 39 ქულა ჩააგდო, ხოლო "დეტროიტის" ლიდერი ბლეიქ გრიფინი იყო, რომელმაც 38 ქულას 13 მოხსნა მიამატა.

"პისტონსს" 4-4 მოგება წაგება აქვს. მომდევნო მატჩს 6 ნოემბერს "მაიამისთან" შინ გამართავს.

317
მკითხველის კომენტარები / 0 /
მსგავსი ამბები
რუბრიკის სხვა სიახლეები