[NBA 2019/20] როგორი იქნება ახალი სეზონი?

ეროვნულმა საკალათბურთო ასოციაციამ წარმოადგინა 2019-20 წლების სეზონის განრიგი. რეგულარული ჩემპიონატი დაიწყება 22 ოქტომბერს და დასრულდება 2020 წლის 15 აპრილს.

კიდევ უფრო შემცირდა იმგვარი სიტუაციების რაოდენობა, როცა კლუბებს ზედიზედ ორი დღე უწევთ თამაში (ასეთ დროს, კლუბები ერთ-ერთ მატჩში ვარსკვლავებს ასვენებენ) - ახლა ეს იქნება საშუალოდ 12.4 მატჩი გუნდზე. შარშან იყო 13.3, ხუთი წლის წინ - 19.3.

ზედიზედ მესამე სეზონია არც ერთ გუნდს არ მოუწევს ხუთ დღეში ოთხი მატჩის ჩატარება.

აღმოსავლეთ სანაპიროზე მეტი აუდიტორიის მოზიდვისთვის, ლიგა შეამცირებს მატჩების რაოდენობას, რომელიც ნიუ იორკის დროით 22 საათსა და 30 წუთზე იწყება. ევროპელი გულშემატკივრებისთვის ეს პირიქით, არც ისე კარგია: ადრე შეიძლებოდა გაღვიძება 7 საათსა და 30 წუთზე და რომელიმე მატჩის სრულად ნახვა. ახლა, უფრო მეტი მატჩი დაიწყება ერთი ან ორი საათით ადრე.

მეტი მატჩები ევროპისთვის

მაგრამ ევროპელი და აფრიკელი გულშემატკივრებისთვის, აგრეთვე, ფანებისთვის ახლო აღმოსავლეთიდან, NBA კაპიტალურად ცვლის განრიგს უქმეებზე. ახლა, პრაქტიკულად ყოველ შაბათს და კვირას, თამაშების ნაწილი დაიწყება დღისით, რათა ევროპაში მათი ყურება ნორმალურ დროს შეიძლებოდეს და საჭირო აღარ იყოს ღამის გატეხვა. სეზონის განმავლობაში, 48 მატჩი გაიმართება ევროპული დროის პრაიმ-ტაიმში.

22 ოქტომბერი. "ტორონტო"-"ნიუ ორლეანი". ჩემპიონი 2019 წლის დრაფტის პირველი ნომრის ზაიონ უილიამსონის წინააღმდეგ.

"კლიპერსი"-"ლეიკერსი". აღარ არის საჭირო შობის ლოდინი, რომ ვნახოთ ლოს ანჯელესის დერბი. სულ რეგულარულ ჩემპიონატში ოთხი ასეთი დერბია და პირველი ჩემპიონატის პირველივე დღეს შედგება. ლებრონ ჯეიმსი და ენტონი დევისი შარშანდელი ფინალის MVP-ის კავაი ლეონარდის, პოლ ჯორჯისა და მათი ახალი გუნდის წინააღმდეგ.

პირველი კვირა, 23 ოქტომბერი. "ფილადელფია"-"ბოსტონი". ორივე გუნდში სუპერახალბედები არიან. ისეთები არა, როგორც დურანტი და დევისი არიან, მაგრამ ელ ჰორფორდსა და კემბა უოკერსაც ბევრი არაფერი დაეწუნებათ.

"პორტლენდი"-"დენვერი". შარშანდელი პლეი ოფის ერთ-ერთი ყველაზე სანახაობრივი დუელის გამეორება. "პორტლენდმა" მაშინ შვიდ მატჩში მოიგო.

24 ოქტომბერი. "ჰიუსტონი"-"მილუოკი". ბოლო სამი სეზონის საუკეთესო მოთამაშეები: რასელ უესტბრუკი, ჯეიმს ჰარდენი და იანის ანტენტოკუნმპო - ერთ მატჩში.

"გოლდენ სტეიტი"-"კლიპერსი". ისევ კავაი "უორიორზის" წინააღმდეგ, როგორც 2019 წლის ფინალში. გარდა ამისა, ეს იქნება "გოლდენ სტეიტის" პირველი მატჩი სან ფრანცისკოში ახალ არენაზე.

25 ოქტომბერი. "ნიუ ორლეანი"-"დალასი". შარშანდელი სეზონის საუკეთესო ახალბედა ლუკა დონჩიჩი 2020 წლის პოტენციური ახალბედას ზაიონ უილიამსონის წინააღმდეგ.

შობა

"ტორონტო"-ბოსტონი". პირველი საშინაო მატჩი შობაზე "რეპტორზისთვის". გუნდს ეს პატივი ჩემპიონის რანგში ერგო.

"ფილადელფია"-"მილუოკი". აშშ-ის პირველ დედაქალაქში საშობაო მატჩი 1988 წლის შემდეგ არ ყოფილა.

"გოლდენ სტეიტი"-"ჰიუსტონი". კლასიკა. ბოლო ხუთი პლეი ოფიდან ისინი ოთხჯერ შეხვდნენ ერთმანეთს.

"ლეიკერსი"-"კლიპერსი". ტრადიცია.

"დენვერი"-"ნიუ ორლეანი". ბოლო საშობაო მატჩი აქ 1994 წელს იყო.

კიდევ რა უნდა მოვინიშნოთ

27 ნოემბერი. ერთბაშად ორი ტოპ-მატჩი და ორი დაბრუნება: "ბოსტონი"-"ბრუკლინი" (კაირი ირვინგი გადასვლის შემდეგ პირველად ითამაშებს "სელტიქსის" მოედანზე) და "ნიუ ორლეანი"-"ლეიკერსი" (ენტონი დევისი მშობლიური კლუბის წინააღმდეგ, სადაც მისმა მთელმა კარიერამ გაიარა).

11 დეკემბერი. "ტორონტო"-"კლიპერსი". კავაი ლეონარდი, რომელმაც ივნისში ჩემპიონობა მოუტანა კანადას, პირველად ითამაშებს თავის ყოფილ საშინაო არენაზე.

9 იანვარი. "ოკლაჰომა"-"ჰიუსტონი". კიდევ ერთი დაბრუნება. რასელ უესტბრუკი - პირველად "თანდერის" მოედანზე სტუმრის როლში.

20 იანვარი. მარტინ ლიუთერ კინგის დღე - ტრადიციულად მჭიდროა NBA-ის კალენდარში. ყველაზე შთამბეჭდავი იქნება: დასავლეთის შარშანდელი ფინალის გამეორება - "პორტლენდი"-"გოლდენ სტეიტი" და 2019 წლის დრაფტის პირველი ორი ნომრის დუელი: ჯა მორანტი და "მემფისი ზაიონ უილიამსონისა და "ნიუ ორლეანის" წინააღმდეგ.

24 იანვარი. მატჩი პარიზში. "მილუოკი"-"შარლოტი".

14-16 თებერვალი. "ყველა ვარსკვლავის უქმეები" ჩიკაგოში. როგორც ყოველთვის: პარასკევი - ახალბედების მატჩი, შაბათი - კონკურსები, კვირა - "ყველა ვარსკვლავის მატჩი".

5 მარტი. "გოლდენ სტეიტი"-"ტორონტო". 2019 წლის ფინალისტების პირველი შეხვედრის ლოდინი დიდი ხანი მოგვიწევს.

488
მკითხველის კომენტარები / 0 /
მსგავსი ამბები
რუბრიკის სხვა სიახლეები
;