[NEWS] ბოსნია უმწვრთნელოდ დარჩა, მიხაილოვიჩის აღიარება და სხვა ამბები...

    პროსინეჩკი ბოსნიიდან წავიდა    

რობერტ პროსინეჩკიბოსნიის ფეხბურთის ფედერაციის პრესსსამსახურმა გამოაცხადა, რომ ქვეყნის პირველი ნაკრების მთავარი მწვრთნელის პოსტი დატოვა რობერტ პროსინეჩკიმ. გადაწყვეტილება ორივე მხარის შეთანხმებით იქნა მიღებული.

ხორვატი სპეციალისტი უკვე სექტემბერში ითხოვდა თანამდებობიდან გაშვებას, მაგრამ მაშინ ფედერაციის ხელმძღვანელობამ არ დააკმაყოფილა მწვრთნელის განცხადება და მას სრული ნდობა გამოუცხადა.

ევრო 2020-ის შესარჩევ ტურნირში ბოსნიამ მეოთხე ადგილი დაიკავა - 10 მატჩში 13 ქულა დააგროვა. ნაკრებს რჩება ევროპის ჩემპიონატზე გასვლის შანსი, ოღონდ ამისთვის პლეი ოფის მინიტურნირი უნდა მოიგოს. ნახევარფინალში ბოსნია ჩრდილოეთ ირლანდიას შეხვდება და მოგების შემთხვევაში, ფინალში სლოვაკეთისა და ირლანდიის წყვილში გამარჯვებულს დაუპირისპირდება.


     მიხაილოვიჩი სერბეთში  წლის მწვრთნელია     

სინიშა მიხაილოვიჩისერია A-ს კლუბ“ბოლონიას“ დამრიგებელი სინიშა მიხაილოვიჩი სერბეთში წლის მწვრთნელად აღიარეს. ქვეყნის საფეხბურთო ასოციაცია საკუთარ „ოქროს ბურთს“ ჩუქნის საუკეთესო ფეხბურთელსა და საუკეთესო მწვრთნელს.

50 წლის მიხაილოვიჩს 2019 წელს ლეიკემია აღმოუჩინეს. მწვრთნელმა უკვე გაიარა ქიმიოთერაპიის სამი კურსი. ასევე განხორციელდა ძვლის ტვინის ტრანსპლანტაცია. ამასთან, მიხაილოვიჩი შეძლებისდაგვარად მონაწილეობდა გუნდის მზადებაში. ხანდახან, ის ვიდეოკავშირის მეშვეობით ატარებდა ვარჯიშებს.

2019 წლის საუკეთესო ფეხბურთელად სერბეთში აღიარეს ამსტერდამის „აიაქსის“ ნახევარმცველი დუშან ტადიჩი, რომელმაც გუნდთან ერთად მოიგო ჰოლანდიის ჩემპიონატი და თასი, აგრეთვე, გავიდა ჩემპიონთა ლიგის ნახევარფინალში.


       შვეიცარიაში კობი კუნი გარდაიცვალა      

კობი კუნი77 წლის ასაკში გარდაიცვალა შვეიცარიის ნაკრების ყოფილი მთავარი მწვრთნელი კობი კუნი, - იტყობინება ქვეყნის ფეხბურთის ფედერაციის პრესსამსახური.

მოთამაშის რანგში, კუნმა მთელი კარიერა „ციურიხში“ გაატარა, რის შემდეგაც ამ გუნდის მწვრთნელი გახდა. შვეიცარიის ნაკრებს ის 2001-08 წლებში ავარჯიშებდა. მან ნაკრები სამ დიდ ტურნირზე გაიყვანა - 2004 და 2008 წლებში ევროპის ჩემპიონატზე და 2006 წელს - მსოფლიოს ჩემპიონატზე.


     ისწავლე, სწავლის  მძებნელო... ეტო’ო ჰარვარდში მიდის     

სამუელ ეტო'ოცნობილი კამერუნელი ფორვარდი სამუელ  ეტო’ო 2020 წლიდან სახელგანთქმულ ჰარვარდის უნივერსიტეტში დაეუფლება ცოდნას. ყველა დროის ერთ-ერთი საუკეთესო აფრიკელი ფეხბურთელი ამერიკის შეერთებული შტატების ყველაზე პრესტიჟულ უნივერსიტეტში ეკონომიკისა და მენეჯმენტის სპეციალურ კურსს ერთი წლის განმავლობაში გაივლის.

სამუელ ეტო’ოს თავის კარიერაში ისეთ კლუბებში უთამაშია, როგორებიც არიან „რეალი“, „ბარსელონა“, „ინტერი“ და „ჩელსი“. კამერუნელ თავდამსხმელს აფრიკელ ფეხბურთელთა შორის ესპანეთის ჩემპიონატში ყველაზე მეტი მატჩი აქვს ჩატარებული. „ბარსელონაში“ გატარებული ხუთი სეზონის განმავლობაში, მან 100-ზე მეტი გოლის გატანა მოახერხა.

სამუელ ეტო’ო კამერუნის ეროვნული ნაკრების ყველა დროის საუკეთესო ბომბარდირია. ის ოთხჯერ (2003, 2004, 2005 და 2010) იყო დასახელებული აფრიკის საუკეთესო ფეხბურთელად.


       პოლემიკა ვინისიუშის გამო       

ვინისიუს ჟუნიორიზინედინ ზიდანს უნდა, რომ ბრაზილიელი „ვინგერი“ ვინისიუშ ჟუნიორი იჯარით გაუშვას რომელიმე კლუბში. „ზიზუ“ ბრაზილიელის თამაშით მაინცდამაინც კმაყოფილი არ არის. არადა, იყო პერიოდი, ვინისიუში „სამეფო კლუბის“ ძირითადი შემადგენლობის ფეხბურთელი გახლდათ, ახლა კი უმეტეს დროს სათადარიგოთა სკამზე ატარებს.

კატეგორიულად განსხვავებული აზრი აქვს „რეალის“ პრეზიდენტ ფლორენტინო პერესს. ის მიიჩნევს, რომ ახალგაზრდა სამხრეთამერიკელს შეუძლია, კლუბს დიდი სარგებლობა მოუტანოს. მოკლედ, პრეზიდენტი სხვანაირად ფიქრობს, მწვრთნელი კი - სხვა აზრზეა.

თავად ვინისიუშს კი, რა თქმა უნდა, სათამაშო პრაქტიკა სჭირდება. გავრცელებული ინფორმაციით, ბრაზილიელი წინააღმდეგი არ არის, იჯარით წავიდეს „ვალიადოლიდში“. ამ კლუბის პრეზიდენტი ხომ ლეგენდარული რონალდოა („კიჭა“).

ესპანური მედიასაშუალებები წერენ, რომ ზიდანი ორ რამეს უწუნებს ვინისიუშს - პირველი, ეს არის არასტაბილურობა და მეორე - საგოლე მომენტების გამოყენების დაბალი პროცენტი. ამასთან, ირკვევა ისიც, რომ „რეალი“ ბრაზილიელი ფეხბურთელის გაყიდვას არ აპირებს. ამ ეტაპზე განიხილება მხოლოდ მისი იჯარით გაშვების საკითხი.

თანაც, ეს უნდა იყოს ისეთი კლუბი, რომელიც „რეალს“ არ გაუწევს კონკურენციას უმაღლესი მიზნების, ანუ ესპანეთის ჩემპიონობისთვის ბრძოლაში.

344
მკითხველის კომენტარები / 0 /
მსგავსი ამბები
რუბრიკის სხვა სიახლეები
;