[NEWS] გვარდიოლას რადიკალიზმი... კავანი და ატლეტიკო... მესი თუ მბაპე... და კიდევ ბევრი სიახლე...

კავანი  ატლეტიკოს  შეუთანხმდა

ედინსონ კავანი „პარი სენ-ჟერმენის“ ფორვარდი ედინსონ კავანი სულ მალე მადრიდის „ატლეტიკოს“ ფეხბურთელი გახდება. ამის შესახებ დაწერა თავის „ტვიტერზე“ ცნობილმა იტალიელმა ჟურნალისტმა ჯანლუკა დი მარციომ.

ელოდებიან, რომ ურუგვაელი ივნისში თავისუფალი აგენტის სტატუსით გააფორმებს სამწლიან კონტრაქტს მადრიდულ კლუბთან.

კავანის კონტრაქტი პარიზულ კლუბთან 2020 წლის ზაფხულამდეა ძალაში. ამ სეზონში მის ანგარიშზეა 11 მატჩი და სამი გოლი.


ბლინდს გული აწუხებს

დელეი ბლინდიამსტერდამის „აიაქსისა“ და ჰოლანდიის ნაკრების მცველს დელეი ბლინდს გულთან დაკავშირებული პრობლემები დაუდგინეს, კერძოდ, ფეხბურთელს გულის კუნთის ანთება აქვს, - წერს ერედივიზიონის ლიდერის პრესსამსახური.

29 წლის ფეხბურთელი ბოლო დღეებში დეტალურად გამოიკვლიეს იმ თავბრუსხვევის შემდეგ, რომელიც მას მცირე ხნით ჰქონდა ჩემპიონთა ლიგაზე „აიაქსისა“ და „ვალენსიას“ მატჩის დროს.

საბოლოოდ, მიიღეს გადაწყვეტილება, რომ ბლინდი არ იმუშავებს გუნდთან ერთად შეკრებაზე, რომელიც იანვრის დასაწყისში ჩატარდება. ფეხბურთელი აღდგენას ამსტერდამში გაივლის.

ამ სეზონში დელეი ბლინდმა 26 მატჩი ჩაატარა საკლუბო დონეზე და თითო გოლი და საგოლე პასი მიითვალა.


ნოიერი ევრო 2024-ს უმიზნებს

მანუელ ნოიერიმიუნხენის „ბაიერნისა“ და გერმანიის ნაკრების მეკარემ მანუელ ნოიერმა არ გამორიცხა მონაწილეობა ევროპის 2024 წლის ჩემპიონატში, რომელიც გერმანიაში გაიმართება.

ადრე პრესაში იტყობინებოდნენ, რომ 33 წლის გერმანელი აქტიურ საერთაშორისო კარიერას ევრო 2020 წლის შემდეგ დაასრულებდა.

„ნაკრებში კარიერის დასრულების საკითხი ღიად რჩება. საკუთარ ჯანმრთელობას უნდა დავაკვირდე, ვნახო, როგორ ფორმაში ვიქნები და მივიღებ თუ არა ისეთივე სიამოვნებას თამაშისგან, როგორც ადრე. მონაწილეობა საშინაო ევრო 2024-ში? მე ფორმაში ვარ, მე მზად ვარ!“ - თქვა ნოიერმა.


სონი სამი მატჩით დაისაჯა

ჰეონ-მინ სონიინგლისის საფეხბურთო ასოციაციამ (FA) გადაწყვიტა, დისკვალიფიკაციით დასაჯოს „ტოტენჰემის“ ნახევარმცველი ჰეონ-მინ სონი იმ წითელი ბარათისთვის (მესამე გაძევება მიმდინარე სეზონში), რომელიც კორეელმა „ჩელსისთან“ მატჩში მიიღო.

62-ე წუთზე სონი მოედნიდან გააძევეს „ჩელსის“ მცველის ანტონიო რიუდიგერის წინააღმდეგ უხეში თამაშის გამო.

„ჰეონ-მინ სონმა სამმატჩიანი დისკვალიფიკაცია მიიღო და ეს სასჯელი პრემიერლიგის მე-19 ტურიდან შევა ძალაში“, - წერია ოფიციალურ განცხადებაში.


არტეტას პირველი სამიზენე...

დრის მერტენსიინგლისური და იტალიური წყაროების მიხედვით, ლონდონის „არსენალის“ ახალი მთავარი მწვრთნელი მიკელ არტეტა დაინტერსებულია „ნაპოლის“ ფორვარდის დრის მერტენსის შეძენით.

ადრე წერდნენ იმის შესახებ, რომ „ნაპოლის“ პრეზიდენტი აურელიო დე ლაურენტისი შეიძლება შემადგენლობის სერიოზულ ცვლილებებზე წავიდეს არადამაკმაყოფილებელი შედეგების გამო.

ბელგიელ ფორვარდზე სხვა პრეტენდენტები არიან - „ბაიერნი“ და „დორტმუნდი“. მერტენსის კონტრაქტი „ნაპოლისთან“ მომავალი წლის ზაფხულში იწურება. ეს ნიშნავს, რომ უკვე მიმდინარე ზამთარში ფორვარდს შეუძლია წინასწარი ხელშეკრულება გააფორმოს სხვა კლუბთან.

ასევე იტყობინებიან, რომ „ნაპოლის“ შეუძლია გაყიდოს მერტენსი დაახლოებით 10 მილიონ ევროდ, რათა ზაფხულში უფასოდ არ დაკარგოს ფორვარდი.

ამ სეზონში 32 წლის ბელგიელმა იტალიის ჩემპიონატში 16 მატჩი ჩაატარა, ოთხი გოლი გაიტანა და ორი შედეგიანი პასი შეასრულა.


რანგნიკის მსურველებო, თქვენ ხართ რიგში...

რალფ რანგნიკი„მილანის“ ხელმძღვანელობამ გერმანელ სპეციალისტს რალფ რანგნიკს მთავარი მწვრთნელისა და სპორტული დირექტორის პოსტები შესთავაზა, - ირწმუნება გაზეთი „ბილდი“.

„შტუტგარტის“, „შალკესა“ და „ლაიპციგის“ ყოფილი მწვრთნელი ცნობილია თავისი მისწრაფებით - გააკონტროლოს ყველა პროცესი კლუბში, დაწყებული სატრანსფერო სტრატეგიით და დამთავრებული ფეხბურთელების კვებით. „მილანში“ დანიშვნის შემთხვევაში, რომელიც ივნისამდე არ მოხდება, 61 წლის სპეციალისტი ერთდროულად გახდება მთავარი მწვრთნელი, სკაუტების სამსახურის უფროსი და სპორტული დირექტორი. ეს კი კლუბში შეასუსტებს ამჟამინდელი დირექტორების პაოლო მალდინისა და ზვონიმირ ბობანის გავლენებს.

დღეისთვის, რანგნიკი კომპანია „რედ ბულის“ საფეხბურთო განყოფილებას უდგას სათავეში. ამ კომპანიას ეკუთვნის გერმანული „ლაიპციგი“ და ავსტრიული „ზალცბურგი“.


გვარდიოლა რადიკალურ ცვლილებებს ითხოვს

პეპ გვარდიოლა„მანჩესტერ სიტის“ მთავარი მწვრთნელი ხოსეპ გვარდიოლა განწყობილია - სერიოზული ცვლილებები შეიტანოს შემადგენლობაში და გუნდის საწვრთნელ შტაბში კლუბთან კონტრაქტის გაგრძელების შემთხვევაში.

იტყობინებიან, რომ „რადიკალურ“ ცვლილებებში იგულისხმება, მაგალითად, სამი მოთამაშის შეძენა ცენტრალური და მარცხენა მცველის პოზიციაზე, აგრეთვე, ახალი ფორვარდის დამატება ლერო სანეს წასვლის შემთხვევაში. გარდა ამისა, გვარდიოლას უნდა საწვრთნელი შტაბის გაძლიერება „არსენალში“ მიკელ არტეტას წასვლის შემდეგ.

ამასთან, „მანჩესტერ სიტი“ დარწმუნებულია, რომ გვარდიოლა შეასრულებს თავისი კონტრაქტის ყველა პირობას. ესპანელი სპეციალისტის მიმდინარე ხელშეკრულება 2021 წლის ზაფხულში იწურება.


მბაპე მესის... ორჯერ უსწრებს!..

კილიან მბაპე და ლიონელ მესი„პარი სენ-ჟერმენის“ ფორვარდს კილიან მბაპეს 20 დეკემბერს 21 წელი შეუსრულდა. ფრანგ ფეხბურთელს ამ მომენტისთვის 103 გოლი აქვს კარიერაში და ბომბარდირული გრაფიკით უსწრებს „ბარსელონას“ კაპიტანს ლიონელ მესისა და „იუვენტუსის“ ფორვარდს კრიშტიანო რონალდოს.

მესის 21 წლის ასაკში 48 გოლი ჰქონდა, რონალდოს - 27 გოლი. მბაპემ მიმდინარე სეზონში საფრანგეთის ჩემპიონატში 12 მატჩი ჩაატარა, 11 გოლი გაიტანა და ოთხი შედეგიანი გადაცემა დააგროვა.

გუშინ გვიან გახდა ცნობილი, რომ მბაპე „ფრანს ფუტბოლის“ ვერსიით 2019 წელს საფრანგეთის საუკეთესო ფეხბურთელი გახდა. აღვნიშნავთ, რომ 21 წლის ფრანგი ზედიზედ მეორედ გახდა ამ პრიზის მფლობელი.

457
მკითხველის კომენტარები / 0 /
მსგავსი ამბები
რუბრიკის სხვა სიახლეები
;