[NEWS] მბაპე ვინისიუსის სანაცვლოდ… ვიეირა არსენალში?.. და სხვა ამბები

მბაპე ვინისიუსის სანაცვლოდ

კილიან მბაპე„პარი  სენ-ჟერმენის“ ერთ-ერთი ლიდერი კილიან მბაპე, შესაძლოა, სულ მალე „რეალში“ გადავიდეს, - იტყობინება გაზეთი AS.

გაირკვა, რომ პარიზული გრანდი დათანხმდა ფორვარდის „რეალში“ გაყიდვას, ოღონდ ერთი პირობით - „პარი სენ-ჟერმენს“ სურს მომავალ გარიგებაში ჩართონ მადრიდელთა შემტევი ვინისიუს ჟუნიორი.

ჯერჯერობით, „რეალის“ რეაქცია ამ პირობაზე უცნობია, მაგრამ ყველას კარგად მოეხსენება, რომ მადრიდული კლუბის მთავარ მწვრთნელს ზინედინ ზიდანს სურს მბაპეს შეძენა ნებისმიერ ფასად, ამიტომაც, ზამთრის სატრანსფერო ფანჯრისას ამგვარი გარიგება სავსებით რეალურია.

მბაპეს კონტრაქტი „პარი სენ-ჟერმენთან“ 2022 წლის ზაფხულამდეა ძალაში. ამ სეზონში ფორვარდს ცხრა მატჩში ექვსი გოლი და სამი საგოლე პასი დაუგროვდა.


ვიეირა მთავარი კანდიდატია

პატრიკ ვიეირაფრანგული „ნიცას“ მთავარმა მწვრთნელმა პატრიკ ვიეირამ, შესაძლოა, ანალოგიური პოსტი დაიკავოს ლონდონის „არსენალში“, - დაწერა ბრიტანულმა პრესამ.

წყაროს ცნობით, ჟურნალისტები სწორედ ამ ფრანგ სპეციალისტს ასახელებენ ლონდონური კლუბის დამრიგებლის პოსტზე მთავარ პრეტენდენტად.

ამ მომენტისთვის, „არსენალს“ სათავეში უდგას ფრედრიკ იუნგბერგი, რომელიც მთავარი მწვრთნელის მოვალეობის შემსრულებელია უნაი ემერის განთავისუფლების შემდეგ.

პატრიკ ვიეირა „არსენალში“ 1996-2005 წლებში თამაშობდა. დღეს 43 წლის ფრანგი სათავეში უდგას „ნიცას“.


ვან ბასტენი FIFA20-დან ამოშალეს

საფეხბურთო სიმულატორის FIFA20-ის შემქმნელებმა გადაწყვიტეს - თამაშიდან ამოშალონ ჰოლანდიური ფეხბურთის ლეგენდა მარკო ვან ბასტენი.

საქმე ისაა, რომ ჰოლანდიის ერედივიზიონის მე-14 ტურის მატჩის წინ, რომელშიც „აიაქსი“ და „ჰერაკლესი“ ხვდებოდნენ ერთმანეთს, ვან ბასტენს ეთერში შემთხვევით წამოცდა ნაცისტური მისალმება - Sieg Heil, რომელსაც მეორე მსოფლიო ომის დროს იყენებდნენ.

FIFA20-ში ვან ბასტენს სხვა ლეგენდარულ ფეხბურთელებთან ერთად სპეციალური ბარათი ჰქონდა, მაგრამ ახლა ის წაშლილია.

შეგახსენებთ, რომ ამავე ინციდენტის შემდეგ, მარკო ვან ბასტენი დროებით ჩამოაშორეს ტელეკომპანია FOX Sports-ში მუშაობას.


ვილმოტსმა ირანი დატოვა

მარკ ვილმოტსიბელგიელმა სპეციალისტმა მარკ ვილმოტსმა ირანის ნაკრების მთავარი მწვრთნელის პოსტი დატოვა. ამის შესახებ მან საკუთარ „ტვიტერზე“ დაწერა. მწვრთნელის თქმით, ირანის ფეხბურთის ფედერაციამ არ შეასრულა ხელშეკრულებით გათვალისწინებული ვალდებულებები.

აქამდე 50 წლის სპეციალისტის ბოლო სამუშაო ადგილი იყო კოტ დ’ივუარის ნაკრები, მანამდე კი ვილმოტსმა ოთხი წელი იმუშავა ბელგიის ნაკრებში, რომელთან ერთადაც მეოთხედფინალში გავიდა მსოფლიოს 2014 წლის ჩემპიონატზე და ევრო 2016-ზე.

ირანის ნაკრები მსოფლიოს 2022 წლის ჩემპიონატის შესარჩევ ტურნირში მესამე ადგილზეა C ჯგუფში.


სიტი დემბელეს წარმომადგენლებს შეხვდა

„მანჩესტერ სიტის“ ხელმძღვანელობა დაინტერესებულია „ბარსელონას“ ფორვარ უსმან დემბელეს გაფორმებით. ცოტა ხნის წინ, ინგლისის ჩემპიონის წარმომადგენლებმა შეხვედრა გამართეს 22 წლის ფრანგის აგენტებთან, - წერს El Desmarque.

ადრე გახდა ცნობილი, რომ დემბელეზე ასევე პრეტენზიას აცხადებენ „პარი სენ-ჟერმენი“ და ლონდონის „ჩელსი“. ფორვარდის სატრანსფერო ღირებულება 100 მილიონი ევროა.

დემბელე „ბარსელონაში“ „დორტმუნდიდან“ გადავიდა 2017 წელს. ტრანსფერის თანხა იყო 125 მილიონი ევრო. ფეხბურთელის მოქმედი კონტრაქტი „ბარსასთან“ 2022 წლის 30 ივნისამდეა ძალაში.

ამ სეზონში დემბელემ ყველა ტურნირზე ჩატარებულ ცხრა მატჩში ერთი გოლი გაიტანა.


ფატიმ ბარსასთან ახალი კონტრაქტი გააფორმა

„ბარსელონას“ 17 წლის გარემარბმა ანსუ ფატიმ ახალი კონტრაქტი გააფორმა კატალონიურ კლუბთან. ამის შესახებ დაწერა გუნდის ოფიციალურმა ვებგვერდმა.

ფეხბურთელის ახალი ხელშეკრულება 2022 წლის ზაფხულამდეა ძალაში, კიდევ ორი სეზონით გახანგრძლივების პერსპექტივით. გაიზარდა ფატის გამოსასყიდი თანხა - 100-დან 170 მილიონ ევრომდე.

ასევე ცნობილი გახდა, რომ გამოსასყიდი თანხა 400 მილიონ ევროს მიაღწევს მაშინ, როცა ფატი პირველი გუნდის სრულფასოვანი წევრის სტატუსით პროფესიულ კონტრაქტს გააფორმებს კლუბთან.

ამ სეზონში ფატის ორი გოლი და ერთი საგოლე პასი აქვს 11 ოფიციალურ მატჩში. შეგახსენებთ, რომ წელს ფორვარდი „ბარსელონას“ ყველაზე ახალგაზრდა მოთამაშე გახდა, ვინც ჩემპიონთა ლიგაზე ითამაშა.

712
მკითხველის კომენტარები / 0 /
მსგავსი ამბები
რუბრიკის სხვა სიახლეები
;