[NEWS] მეგაკონტრაქტი მბაპეს... თამაშგარე ახლებურად... ახალი წესები ნიდერლანდებში...

მბაპესთვის მეგაკონტრაქტი მზადდება

„პარი სენ-ჟერმენი“ არ აპირებს უახლოეს მომავალში ფორვარდ კილიან მბაპეს გაყიდვას, - წერს Paris United.

წყაროს ცნობით, ფრანგი პარიზული კლუბის ერთადერთი მოთამაშეა, რომლის გაყიდვას ვეტო დაადო პსჟ-ის მფლობელმა ნასერ ალ-ჰელაიფიმ.

ამ უკანასკნელს უნდა, რომ მბაპე დარჩეს გუნდში მინიმუმ მსოფლიოს 2022 წლის ჩემპიონატამდე, რომელიც ყატარში გაიმართება. ამისთვის, პარიზელები ამზადებენ გაუმჯობესებულ ახალ კონტრაქტს მბაპესთვის, რათა შეძლონ მისი შენარჩუნება. კერძოდ, ფეხბურთელს შესთავაზებენ „პარი სენ-ჟერმენის“ ისტორიაში ყველა დიდ ხელფასს.

2019-20 წლების სეზონში მბაპემ პსჟ-ის რიგებში 31 ოფიციალური მატჩი ჩაატარა, 27 გოლი გაიტანა და 17 შედეგიანი პასი შეასრულა.


ნიდერლანდებში ფეხბურთის ახალ წესებს გამოცდიან

ნიდერლანდების ფეხბურთის ხელმძღვანელობა გეგმავს ადგილობრივ ჩემპიონატში ახალი წესების გატესტვას. ამის შესახებ განაცხადა ქვეყნის საფეხბურთო კავშირის პრეზიდენტმა ჰეის დე იონგმა.

აუტიდან ბურთის ხელებით მოწოდების ნაცვლად, გაზონზე დაფიქსირებულ ბურთს თამაშში ფეხით შეიტანენ. ჯარიმის შესრულებისას, ფეხბურთელებს ბურთის დამოუკიდებლად გათამაშება შეეძლებათ, ანუ უფლება ექნებათ პასი არ მისცენ და თავად განაახლონ თამაში. მესამე წესი - მოთამაშის დროებითი გაძევება ყვითელი ბარათის გამო.

გარდა ამისა, იგეგმება ფეხბურთელების შეცვლაზე ლიმიტის მოხსნა.

თავდაპირველად, ახალ წესებს გამოცდიან ნიდერლანდების ახალგაზრდულ ლიგებში.

„რა თქმა უნდა, ყველა ექსპერიმენტს არ მოჰყვება აუცილებლად თამაშის წესების ცვლილება. მაგრამ ვალდებულად ვთვლით თავს - ვიფიქროთ ცვლილებებზე, რათა ძირითადი საფუძვლების შეცვლის გარეშე, ფეხბურთი უფრო მომხიბვლელ სახეობად ვაქციოთ. ეს არ არის რევოლუცია, ეს არის ფეხბურთის ევოლუცია. ფეხბურთი არ შეიძლება ერთ ადგილზე იდგეს“, - მოჰყავს დე იონგის სიტყვები Ad.nl-ს.


უეფა თამაშგარის წესს ცვლის

მომავალი სეზონიდან ჩემპიონთა ლიგასა და ევროპის ლიგაზე თამაშგარის ხაზი უფრო ფართო უნდა გახდეს, - ამის შესახებ განაცხადა უეფას პრეზიდენტმა ალექსანდრ ჩეფერინმა.

„ერთსანტიმეტრიანი ოფსაიდი - არ არის ოფსაიდი, რადგან ამ წესის არსი ამაში არ მდგომარეობს. უნდა იყოს აშკარა და ცხადი შეცდომა იმისთვის, რომ გამოყენებულ იქნას VAR-ის სისტემა. უფრო ფართო ხაზები აუცილებელია, რადგან ხაზებს სუბიექტურად ავლებენ. ასე რომ, ამჟამინდელი სისტემა იდეალურად ზუსტი არ არის. ერთი არასწორი გადაწყვეტილებით, შეიძლება კლუბს მთელი სეზონი გაუფუჭო. ხელით თამაში - ეს პრობლემაა, მაგრამ არ ვიცი, კონკრეტულად რა უნდა მოვიმოქმედოთ ამასთან დაკავშირებით. ამაზე ბევრს ვმსჯელობთ მსაჯებთან ერთად“, - თქვა ჩეფერინმა Sky Sports-სთან კომენტარში.

ახალი წესები, შესაძლოა, უკვე ევრო 2020-ზე გამოიყენონ.


 ბექჰემი ყველაზე სასურველი მამაკაცია

დევიდ ბექჰემი სათავეში ჩაუდგა იმ ფეხბურთელთა რეიტინგს, რომლებთანაც ქალებს ყველაზე მეტად სურთ ღამის გატარება

სპორტულ ღონისძიებებზე ბილეთების გაყიდვის ვებგვერდმა Ticketgum.com-მა შეადგინა ფეხურთელების სია, რომლებთანაც ფეხბურთის მოყვარულ ქალებს ყველაზე მეტად სურთ ერთი ღამის გატარება.

რეიტინგს სათავეში უდგას ინგლისის ნაკრების ყოფილი კაპიტანი, 44 წლის დევიდ ბექჰემი. მას ქალების 21.2 პროცენტმა მისცა ხმა.

სიაში მეორე ადგილი დაიკავა „ტოტენჰემის“ მეკარემ პაულო გასანიგამ, მესამე - „ჩელსის“ ნახევარმცველმა რუბენ ლოფტუს-ჩიკმა.

„იუვენტუსის“ ფორვარდი კრიშტიანო რონალდო ამ სიაში მერვე ადგილზე გავიდა, „ბარსელონას“ ლიდერი ლიონელ მესი - მეცხრეზე. პორტუგალიელმა ხმების 7.5 პროცენტი მიიღო, არგენტინელმა - 6.25. სულ გამოკითხვაში 1324 ქალი მონაწილეობდა.

694
მკითხველის კომენტარები / 0 /
მსგავსი ამბები
რუბრიკის სხვა სიახლეები
;