[NEWS] 9 დაღუპული ავტოავარიაში... ატლეტიკოსთან ალისონის გარეშე... გადაიდება პსჟ-დორტმუნდი?...

ცხრა გვინეელი ავტოავარიაში დაიღუპა

გვინეის საფეხბურთო კლუბის „ეტუალ დე გვინეას“ ავტობუსი ავარიაში მოხვდა, რის შედეგადაც გუნდის ცხრა ფეხბურთელი დაიღუპა.

მოთამაშეები დედაქალაქ კონაკრიდან გასვლით მატჩზე მიემგზავრებოდნენ კანკანში. ამ ქალაქებს შორის 650 კილომეტრია. ინციდენტი დაახლოებით მე-300 კილომეტრზე მოხდა. როგორც ირკვევა, მძღოლმა დაშვებულ სიჩქარეს გადააჭარბა და ხეს შეეჯახა.

BBC-ის ინფორმაციით, დაზარალებულების დედაქალაქში ევაკუაცია მოხდა. მათი რიცხვი 19 ადამიანს შეადგენს, აქედან 17-ს მძიმე ტრავმები აქვს.

„ეტუალ დე გვინეა“ სეზონის პირველ მატჩზე მიემგზავრებოდა.


ჯო ალენი ევროზე არ იქნება

„სტოკის“ ნახევარმცველმა ჯო ალენმა აქილევსის მყესი გაიწყვიტა ჩემპიონშიფის მატჩში „ჰალის“ (5:1) წინააღმდეგ. 29 წლის ფეხბურთელი სეზონის ბოლომდე გამოვიდა მწყობრიდან და, დიდი ალბათობით, გამოტოვებს ევროპის 2020 წლის ჩემპიონატს.

ალენი უელსის ნაკრების ფეხბურთელია. მან ამ სეზონში ჩემპიონშიფის 35 მატჩში ოთხი გოლი გაიტანა და ორი შედეგიანი პასი შეასრულა.

უელსის ნკრები ევრო 2020-ზე იტალიასთან, შვეიცარიასთან და თურქეთთან ერთად მოხვდა ჯგუფში.


ლაციო ინძაგის ახალ კონტრაქტს უმზადებს

„ლაციოს“ ხელმძღვანელობა მთავარი მწვრთნელის სიმონე ინძაგის შენარჩუნებას გეგმავს.

იტალიელ სპეციალისტს ახალ კონტრაქტს შესთავაზებენ. მოქმედი ხელშეკრულება კიდევ ერთი წელია ძალაში.

დღეისთვის ცნობილია, რომ ინძაგის მიმართ დაინტერესებას რამდენიმე ტოპ-კლუბი იჩენს, რომელთა შორისაა „ბარსელონა“.

ამჟამად, „ლაციო“ პირველ ადგილზეა გათამაშების ცხრილში.


პსჟ-დორტმუნდი შეიძლება გადაიტანონ

უეფა ფიქრობს იმაზე, რომ გადაიტანოს ჩემპიონთა ლიგის მერვედფინალის განმეორებითი მატჩი პარიზში „პარი სენ-ჟერმენსა“ და „დორტმუნდს“ შორის.

ლაპარაკია თამაშის ვადის ერთი კვირით გადაწევაზე - 11 მარტიდან 18 მარტამდე. მიზეზი - კორონავირუსია, რომელიც მთელ ევროპაში ვრცელდება.

უეფა ასევე განიხილავს ამ მატჩის გადატანას საფრანგეთის უფრო უსაფრთხო რეგიონში ან სხვა ქვეყანაში.

საფრანგეთის ჩემპიონატში უკვე გადადეს „პარი სენ-ჟერმენის“ ერთი შეხვედრა - „სტრასბურთან“.


ბოკა ხუნიორსი 34-ედ

არგენტინის ჩემპიონატის ბოლო, 23-ე ტურში „ბოკა ხუნიორსი“ შინ იღებდა „ხიმნასია ესგრიმას“. შეხვედრა ბუენოს აირესში „ალბერტო არმანდოს“ სტადიონზე გაიმართა და მასპინძლების გამარჯვებით დასრულდა - 1:0. ერთადერთი გოლი კარლოს ტევესმა 72-ე წუთზე გაიტანა.

ბოლო ტურის წინ, „ბოკა“ ერთი ქულით ჩამორჩებოდა „რივერ პლეიტს“, რომელმაც პარალელურ მატჩში 1:1 ითამაშა „ატლეტიკო ტუკუმანთან“.

ეს ტიტული 34-ე გახდა „ბოკა ხუნიორსისთვის“. ჩემპიონობის რაოდენობით ლიდერი „რივერ პლეიტია“, რომელსაც არგენტინის პირველობა 36-ჯერ აქვს მოგებული.


ალისონი ატლეტიკოსთან ვერ ითამაშებს

„ლივერპულის“ მეკარე ალისონი გამოტოვებს პრემიერლიგის შაბათის შეხვედრას „ბორნმუთის“ წინააღმდეგ. ამის შესახებ პრესკონფერენციაზე განაცხადა მთავარმა მწვრთნელმა იურგენ კლოპმა.

გერმანელმა სპეციალისტმა ისიც დაამატა, რომ ბრაზილიელი ვერც მომდევნო კვირას იქნება მწყობრში. შესაბამისად, გამოტოვებს ჩემპიონთა ლიგის განმეორებით მერვედფინალურ შეხვედრას „ატლეტიკოს“ წინააღმდეგ.

შეხვედრა 11 მარტს „ენფილდზე“ გაიმართება. პირველი მატჩი „ატლეტიკომ“ შინ 1:0 მოიგო.


დანიაში უმაყურებლოდ ითამაშებენ

დანიის ჩემპიონატის ყველა შეხვედრა, რომელიც მარტშია დაგეგმილი, კორონავირუსის საფრთხის გამო მაყურებლების გარეშე ჩაივლის. ამის შესახებ ოფიციალურად გამოაცხადა დანიის საფეხბურთო ლიგების ასოციაციამ.

ქვეყნის მთავრობამ მოუწოდა - გააუქმონ ან გადაიტანონ მასობრივი ღონისძიებები 1000 ან მეტი ადამიანის მონაწილეობით. დანიური ფეხბურთის ხელმძღვანელობამ გადაწყვიტა, ყველა მატჩი ცარიელი ტრიბუნების ქვეშ ჩაეტარებინა.

შეგახსენებთ, რომ კრონავირუსით არის დაავადებული დანიის ნაკრების ყოფილი ფეხბურთელი, მსოფლიოს 2010 წლის ჩემპიონატის მონაწილე თომას კალენბერგი. სულ დანიაში კორონავირუსით დაინფიცირების 23 შემთხვევაა დაფიქსირებული.


ოთხთა ფინალი იტალიის თასზე

იტალიის თასის წლევანდელმა გათამაშებამ, შესაძლოა, ცვლილება განიცადოს კორონავირუსის ეპიდემიის გამო.

ორგანიზატორები აპირებენ ტურნირის დასკვნითი ნაწილი „ოთხთა ფინალის“ ფორმატში ჩაატარონ, რადგან თასზე სწორედ ოთხი გუნდია შემორჩენილი - „იუვენტუსი“, „ინტერი“, „მილანი“ და „ნაპოლი“.

მთავარ სირთულედ სახელდება ის, რომ ამ კლუბებს გადატანილი მატჩები აქვთ იტალიის ჩემპიონატში და მათთვის თავისუფალი ფანჯრების გამონახვა რთული იქნება. არსებობს „ოთხთა ფინალის“ ზაფხულში ჩატარების ვარიანტიც.

შეგახსენებთ, რომ იტალიაში ყველა სპორტული ღონისძიება 3 აპრილამდე მაყურებლების გარეშე ჩაივლის.


იტალიელი მსაჯები დაისვენებენ

უეფამ იტალიელი არბიტრები ჩემპიონთა ლიგისა და ევროპის ლიგის უახლოესი მატჩების მსაჯობას ჩამოაშორა. Tuttomercatoweb-ის ინფორმაციით, ისინი არ მოემსახურებიან უეფას ეგიდით გასამართავ შეხვედრებს. ამგვარი ნაბიჯი განპირობებულია კორონავირუსის გავრცელების წინააღმდეგ.

გასულ კვირას, ევროთასების მატჩებზე მუშაობდა სამი არბიტრი იტალიიდან: დანიელე ორსატო ემსახურებოდა „რეალისა“ და „მანჩესტერ სიტის“ პირველ თამაშს ჩემპიონთა ლიგის მერვედფინალში, მარკო გუიდა სჯიდა ევროპის ლიგის 1/16 ფინალის განმეორებით მატჩს „ესპანიოლსა“ და „ვულვერჰემპტონს“ შორის, იმავე დღეს დავიდე მასა მთავარი მსაჯი იყო „არსენალისა“ და „ოლიმპიაკოსის“ საპასუხო მატჩზე.

4319
მკითხველის კომენტარები / 0 /
მსგავსი ამბები
რუბრიკის სხვა სიახლეები
;