ლევან კობიაშვილი: მომხრე ვარ, ერთა ლიგის ნახევარფინალი ბათუმში გაიმართოს, მაგრამ...

ლევან კობიაშვილმა ფეისბუქგვერდზე "ონლაინ" პრესკონფერენცია გამართა. ფეხბურთის ფედერაციის პრეზიდენტმა მიმდინარე აქტუალურ თემებზე ილაპარაკა...

ინფრასტრუქტურაზე

- ბევრ ინფრასტრუქტურულ პროექტს ვახორციელებთ, ბევრი სტადიონის მშენებლობა დასრულდა, ბევრიც მიმდინარეობს, თუმცა ეს არ არის საკმარისი - გაცილებით მეტი მოედანი, სტადიონი და ბაზა ები გვჭირდება. თუმცა, ამას მარტო ფედერაცია ვერ მოახერხებდა, ცენტრალური და ადგილობრივი ხელისუფლება რომ არ დაგვხმარებოდა. კარგია, რომ ბათუმში, ხაშურში, კასპში სტადიონები შენდება. ისე, უფრო სწრაფ ტემპს ვისურვებდი... ამ აქტივრობას გავაგრძელებთ და მალე ბავშვთა ფეხბურთში განვახორციელებთ ახალ ინფრასქტუქტურულ პროექტებს.

რატომ იკარგებიან ბავშვები 

- ეს აქტუალური თემაა. ეს ის ფუნდამენტია, რაზეც უნდა გაიზარდონ მომავალი თაობები. დამოუკიდებლობის ისტორიაში პირველად დავიწყეთ სკოლების კატეგორიზაცია, დიდი დრო დავხარჯეთ, მთელი ქვეყანა მოვიარეთ, ვნახეთ ყველა სკოლა, მათი იურიდიული სტატუსი და კატეგორიებად დავყავით. ახლა პირველად დაიწყო სკოლების მიზნობრივი დაფინანსება და მშობელს ეცოდინება, როგორ სკოლაში დაჰყავს ბავშვი. იმედია, ეს ვითარებას გააჯანსაღებს...

 მალე ვარკეთილში გავხსნით საფეხბურთო მოედანს, შესაბამისი ინფრასტრუქტურით. ჩვენი მიზანია ყველა უბანში იყოს ისეთი მოედანი, სადაც სკოლები იმუშავებს და კატეგორია ექნება მიკუთვნებული. რაც მთავარია, აბსოლუტურად არანაირი გადასახადი არ იქნება - ამ ხარჯებს სფფ საკუთარ თავზე აიღებს და ეს გარკვეულად გამოასწორებს მდგომარეობას. იგივე კეთდება რეგიონებშიც.

რა ემართებათ შემდეგში ბავშვებს? ეს მარტო ჩვენთან არ ხდება. 2017 წელს საქართველოში 19-წლამდელთა ევროპის ჩემპიონატი ჩატარდა და ფინალში ინგლისი პორტუგალიას შეხვდა. ამ ორი გუნდიდან დღეს მხოლოდ მაუნტი თამაშობს მაღალ დონეზე. ის "ჩელსიშია". იმ ფინალის ბევრი მონაწილე ახლა დაბალ ლიგაშია. ანუ, ეს პრობლემა ყველგანაა.

მოედნებთან დაკავშირებით

- 2 წელია, მთელს ქვეყანაში აქტიურად დავიწყეთ საფარის დაგება, მიუხედავად იმისა, რომ ეს ჩვენი საქმე არ არის. პირადად ჩვენი გუნდის იდეა იყო, რომ ხელოვნურ მოედანზე  ეროვნულ ლიგის თამაშები არ ჩატარებულიყო და დავაგეთ ბოლნისში, სამტრედიაში, ქობულეთში, ფოთში, ქუთაისში, წყალტუბოში... მალე ახალი საფარი საჩხერეშიც იქნება და ამას გავაგრძელებთ.

ფოთში ორი მოედანი მოეწყობა, ლანჩხუთში აკადემია იქნება, მალე კი ზუგდიდში, სოფელ რუხში, დაიწყება აკადემიის მშენებლობა და ამით კიდევ ერთი მშვენიერი პროექტი განხორციელდება.

რუსთავის სტადიონი მერიას გადაეცა

- სანამ რუსთავში სტადიონის პრობლემა მოგვარდება, მანამდე გუნდს საშუალება მივეცით, ჩვენი აკადემიის სტადიონზე ეთამაშა და ამით დავეხმარეთ. მთავარია, გასხვისებული სტადიონი ქალაქს და ადგილობრივ თვითმართველობას დაუბრუნდა და მზად ვართ, ბუნებრივი საფარი დავაგოთ და სადრენაჟე სისტემა შევცვალოთ, ოღონდ, მხოლოდ იმ შემთხვევაში, თუ ადგილობრივ ხელისუფლება ინფრასტრუქტურას მოაწესრიგებს. ამაზე უკვე ველაპარაკე მათ. როცა ეს თანხმობა იქნება, საფარის დაგებას მეორე დღესვე დავიწყებთ. გულშემატკივარმა მხარი უნდა დაგვიჭიროს, რომ ეს პროცესი დავაჩქარებინოთ.

რა ეშველება ზუგდიდის სტადიონს...

- ტენდერი ჩატარდა, გამარჯვებული ცნობილია და მეორე ეტაპის სამუშაოები ჩატარდება, რომლის მიხედვითაც სათადარიგო სტადიონიც გაკეთდება. მე როგორც ვიცი, მშენებლობა დაწყებულია.

მაგრამ უკმაყოფილების მიზეზი მაინც არის. ჩვენი ჯგუფი ზუგდიდში იყო და სამწმუხაროდ, ხარვეზები ამ მეორე პროექტშიც არის. ჩვენის მხრიდან რეაგირებაც მოხდა და რეკომენდაციებიც მივაწოდეთ. იმედია, მას გაითვალისწინებენ - არ გვინდა, იგივე პრობლემა განმეორდეს, რაც წინა ეტაპზე მოხდა.

მაგრამ პირობა მივიღეთ, რომ არსებული ხარვეზები გამოსწორდება - ბეტონის ჯებირია მოსაშორებელი, ყველა ადგილიდან მოედანი არ ჩანს, გასახდელებში პრობლემებია.

სტადიონს ჩვენ არ ვაშენებთ და პასუხისმგებლობას არ ავიღებთ, მაგრამ მონიტორინგს გავუწევთ.

რა ეშველება საჩხერის საფარს

- მიკვირს, რომ ამ კითხვას მე მისვამთ და არა კლუბს. ეს პრობლემური მოედანია, სამარცხვინოა, მაგრამ ამაზე პასუხიმგებლობა აიღოს იმან, ვინც იქ თამაშობს. იტყვით, ფედერაციამ უნდა აუკრძალოსო - მაგრამ ასეთ მოედანზე თუ ერთი გუნდი თამაშობს, სხვას ვერ ავუკრძალავთ.

საფარი ბათუმშიც პრობლემატურია. მაგრამ ჩვენ ინფრასტრუქტურის პრობლემების გამო ბევრ  რამეს ვითვალისწინებთ, იმასაც, რომ გუნდმა საკუთარ ქალაქში უნდა ითამაშოს. ბათუმის "დინამომ" "ჩიხურა" ანგისაში რომ მიიღო, მოედანზე წყალი იდგა, მაგრამ ასეთი კითხვები არ დასმულა.

საჩხერეში ფედერაცია საფარს აგებს და მომავალი წლიდან ეს პრობლემა მოიხსნება...

ჩიხურასა და ბათუმის დინამოს მატჩზე

- ყველას აქვს უფლება, გააპროტესტოს, მაგრამ ჩარჩოც არსებობს. მსაჯის შეურაცხყოფისთვის ანჩელოტი დასაჯეს. ასე ხდება ყველგან. მესმის, ეს ამბავი რამ გამოიწვია. ჩვენს ჩემპიონატში ბევრი სადავო ეპიზოდია.

მაგრამ შეცდომას "მიზანმიმართულად" რომ აცხადებ, ამის საბუთები უნდა წარმოადგინო. თუ ეს არ გაგაჩნია, ბრალდებები ჩემპიონატს აზარალებს. შეცდომა კი ფეხბურთის ნაწილია. "ჩელსისთან" მატჩის შემდეგ "აიაქსის" პრეზიდენტმა ბრიფინგები ჩაატარა? ზღვარი უნდა ვიცოდეთ.

კიკაჩეიშვილთან დაკავშირებით...

- რას ვაპირებთ მსაჯთან დაკავშირებით? ეს შესაბამისი ქულებით ფასდება. თუ დაბალ ქულას იღებს, დაისჯება და შემდეგ ტურს გამოტოვებს ან დაბალ ლიგაში იმსაჯებს. ანუ ესაა ნაკლები შემოსავალი, მსაჯებს კი ხელფასი არ აქვთ და ნაკლები შემოსავლებით დაისჯებიან. ასეა უეფაში მიღებული.

სამოყვარულო ლიგაზე: გუნდი ყველა რაიონს უნდა ჰყავდეს?

- ეს ლიგა 2016 წელს უკვე დაარსდა, 400-ზე მეტი გუნდია. თითქმის ყველა რაიონში ჩემპიონატი და თასის გათამაშება ტარდება. ამის შედეგად 8 ათასზე მეტი მოყვარული ფეხბურთელი შემოგვემატა. ჩემპიონი ფოთის გუნდი გახდა და ევროგათამაშებაშიც მონაწილეობდა. დავიწყეთ 7X7-ზე მასტერლიგის პროექტი და ტურნირი ახლაც მიმდინარეობს. კიდევ ახალი პროექტის დამატება გვსურს.

ქუთაისის ტორპედოსთან დაკავშირებით

- ინვესტორთან იყო შეხვედრა. ეს გახლავთ იტალიური ჯგუფი, კონკრეტული ინფორმაციები ჰქონდათ და დღესაც არის ინტერესი. მაგრამ ეს უკვე მერიის კომპეტენცია იყო. არ ვიცი, რამდენად რეალურია მათი ინტერესი, მაგრამ ჩამოსვლის ინტერესი რამდენიმე დღის წინ გამოხატეს.

ვიცი, გერმანული კლუბის აქციონერს ინტერესი აქვს. იქაც დიდი სურვილია. ასევე ადგილობრივი ქართულ ჯგუფს აქვს სურვილი, რომ "ტორპედო" მათ საკუთრებაში გადავიდეს. ვისურვებ, ეს პრობლემა მალე მოგვარდეს.

ფონდიდან კლუბების დაფინანსებას ვაკონტროლებთ

- კლუბებზე გაცემული სახელმწიფო სახსრები კონტროლდება, მაგრამ არა - კერძო სახსრები. ეს თანხა მხოლოდ ხელფასებზე არ იხარჯება, არის ლიმიტი, რისი გამოყენება შეუძლიათ და ესაა ბიუჯეტის მაქსიმუმ 50 პროცენტი. მაგრამ შესაძლოა, ფონდის დაფინანსების სქემა შეიცვალოს - პირადად მე გამიხარდება, ცენტრალური დაფინანსება თუ არ იქნება და ყველას კერძო მესაკუთრე ეყოლება. მაგრამ რეალობასთან ვართ მიბმულები და უნდა გაჩნდეს სხვა რესურსი, რომ კლუბში თანხა შევიდეს.

საქართველო-ბელარუსი ბათუმში?

- ამაზე ვფიქრობთ, მაგრამ რამდენიმე ფაქტორია გასათვალისწინებელი. უეფას წარმომადგენლებმა სტადიონი ნახეს და მშენებლობაზე ძალიან პოზიტიური შეფასება ჰქონდათ. მარტისთვის მზად იქნება. მაგრამ მანამდე ტესტმატჩებია ჩასატარებელი. ბევრი საკითხია გადასაწყვეტი და ცალსახა პასუხს ვერ ვიტყვი. თუმცა მომხრე ვარ, ერთა ლიგის ნახევარფინალი ამ არაჩვეულებრივ სტადიონზე გაიმართოს.

ის კი შემიძლია გითხრათ, რომ ბათუმი შესარჩევი ეტაპის თამაშებს ნამდვილად უმასპინძლებს. ჩვენი მიზანია, ეროვნულმა გუნდმა არა მარტო თბილისში, არამედ, რეგიონებშიც ითამაშოს. მთავარია, ინფარსტრუქტურა გვიწყობდეს ხელს.

აზარტული თამაშების აკრძალვაზე

- ჩვენთან პირველი შემთხვევა არ იყო, რომ ეროვნული ჩემპიონატის სახელი რეკლამის და შემოსავლების მიზნით გაიყიდა. ინგლისში, ბულგარეთში, სლოვაკეთში, ავსტრიაშიც მომხდარა და მისაღები ფორმაა. ჩვენც ვცდილობთ, რომ შემოსავლები შემოვიდეს, რაც ეროვნული ლიგის სატელევიზიო გაშუქებისა და სხვა პროექტებისთვის გვჭირდება.

ეს ფეხბურთში მიღებულია და დიდ პრობლემას ვერ ვხდედავ. მაგრამ ცალსახად არ მსიამოვნებს, რასაც ჩვენს ქვეყანაში ვუყურებ, ყველგან მათი რეკლამირება რომ ხდება. საჭიროა რეგულაციები და შეზღუდები, მაგრამ სწორი არ მგონია, სრულად რომ აიკრძალოს. ეს სახსრები კლუბებს და ჩემპიონატს სჭირდება.

ვლადიმირ ვაისის მომავალზე

- მას აქვს მოქმედი კონტრაქტი და მიგვაჩნია, რომ მისი მუშაობა დამაკმაყოფილებელია. რა თქმა უნდა, მეტი გვინდა, მაგრამ მთლიანობაში მისი მუშაობა ძალიან მოგვწონს და დაველოდოთ... დღეს ამ თემაზე ლაპარაკი გუნდის შიგნით და მწვრთნელთან არ ყოფილა. ვემზადებით მომდევნო თამაშებისთვის...

2089
მკითხველის კომენტარები / 0 /
მსგავსი ამბები
რუბრიკის სხვა სიახლეები
;