ბერძნულ-რომაული ჭიდაობა. მინსკში სრული გუნდით ვიქნებით

მინსკში, მეორე ევროპულ თამაშებზე ბერძნულ-რომაული სტილით მოჭიდავეთა ნაკრებიც სრული გუნდით იქნება წარმოდგენილი, რადგან საგზურები ულიცენზიოდ დარჩენილ ბოლო ორ წონაშიც მოგვცეს.

მოგეხსენებათ, ევროპული ოლიმპიადაც დიდი თამაშების ფორმატით ტარდება და საჭიდაო სახეობებში მის პროგრამაშიც ის 6-6 ოლიმპიური წონითი კატეგორიაა. მინსკის თამაშების საგზურები ევროპის წლევანდელ პირველობაზე თამაშდებოდა, საამისოდ კი 15 საუკეთესოს შორის უნდა მოხვედრილიყავი.

ჩვენმა ნაკრებმა მხოლოდ ოთხ წონაში მოიპოვა ლიცენზია - 60, 67, 77 და 130 კილოგრამში, ხოლო ორში - 87-სა და 97-ში უსაგზუროდ დარჩა. ეს მით უფრო მოულოდნელი იყო, რომ ორივეში წონადი ფალავნები გვაყვდა.

განსაკუთრებით - 87-ში, სადაც ევროპის მოქმედი და მსოფლიოს ორგზის მესამე პრიზიორი რობერტ კობლიაშვილი ჭიდაობდა, 97-ში კი ახალგაზრდებში მსოფლიოს ჩემპიონი გიორგი მელია გამოდიოდა.

საბედნიეროდ, მოგვიანებით მოხდა ის, რასაც ნაკლებად ველოდით - ამ წონებში ერთბაშად რამდენიმე ქვეყანამ იუარა მონაწილეობა და ლიცენზიები ჩვენმა ფედერაციამაც მიიღო, ხოლო კონკრეტულად ვის დააყენებს სამწვრთნელო შტაბი, ჯერ არაა ცნობილი, რადგან მინსკში წასაყვანი გუნდი ოფიციალურად არ დაუსახელებიათ.

ისე კი, ჩვენი ინფორმაციით, ევროპის ჩემპიონატთან შედარებით საკადრო ცვლილებებია მოსალოდნელი. ამ სასიამოვნო დანამატის შემდეგ მინსკში ყველა საჭიდაო სახეობაში - თავისუფალ ჭიდაობაშიც, ბერძნულ-რომაულშიც, ძიუდოშიც და სამბოშიც ვაჟებში სრულად დაკომპლექტებული გუნდებით ვიქნებით წარმოდგენილნი.

433
მკითხველის კომენტარები / 0 /
მსგავსი ამბები
რუბრიკის სხვა სიახლეები
;