SARRIVEDERCI? რა ელის სარის? ექსპერტების მოსაზრებები და გვარდიოლას კომპლიმენტი

ჯერ, რაც შეეხება სათაურს - SARRIVEDERCI? Arrivederci - იტალიურად "დამშვიდობებას" ნიშნავს, რასაც იდეალურად ერწყმის "ჩელსის" მწვრთნელის, მაურიციო სარის (Sarri) გვარი...

ლონდონურ გრანდში მის მომავალს დიდი კითხვის ნიშანი დაესვა მას შემდეგ, რაც კვირას "არისტოკრატებმა" შოკისმომგვრელი (0:6) საგარეო მარცხი იწვნიეს "მანჩესტერს სიტისთან". გადამწყვეტი აღმოჩნდა სერხიო აგუეროს ჰეთ-თრიკი და რაჰიმ სტერლინგის დუბლი. "ჩელსის" მთავარი მწვრთნელის მომავლის თაობაზე საუბრობენ "დეილი მეილის" ექსპერტები - ჯეიმი რედნაპი, მარტინ კიოუნი და კრის სატონი.

ჯეიმი რედნაპი: ის უკვე დამარცხებული კაცივით გამოიყურება!

..."როცა სარი გასახდელის გვირაბში შედიოდა, გამოიყურებოდა, როგორც დამარცხებული კაცი. "ჩელსის" მიერ ბოლო დროს ნაჩვენები შედეგები ყველაფერზე მეტყველებს. ეს არის ნათელი დასტური კრიზისისა. როგორც კი "ჩელსი" შეცდომას უშვებდა, "სიტი" ეგრევე იყენებდა მას. მე შეკითხვები მაქვს ტაქტიკასთან დაკავშირებით. მაგალითად, რატომ არ მოსთხოვა მწვრთნელმა უფრო ღრმად უკან ჩაწევა კანტეს და ჟორჟინიოსთვის დახმარების გაწევა?..

სარი "ჩელსიში" იმის გამო მოიყვანეს, რომ გუნდის სათამაშო სტილი შეეცვალა. გასაგებია, რომ ცვლილება არის, მაგრამ საით მიდის გუნდი? "ჩელსის" თამაშში აღარ არის სისწრაფე. ყველაფერი გახდა ძალიან მონოტონური. ახლა მთავარი კითხვაა, ჩაამთავრებს სარი სეზონს "ჩელსიში", თუ მის დასრულებამდე დაუთმობს ადგილს ჯანფრანკო ძოლას? მე ვფიქრობ, სარი იმსახურებს შანსს, თუმცა ასე გაგრძელებაც აღარ შეიძლება".

მარტინ კიოუნი: სარი-ბოლი ჩავარდა!

..."შემიძლია თამამად ვთქვა, რომ ტაქტიკა სახელად - "სარი-ბოლი" ჩავარდა. ამის ნათელი დასტური იყო ის, რომ სარიმ გასახდელში შესვლის წინ ხელი არ ჩამოართვა პეპ გვარდიოლას. მან სასწრაფოდ უნდა იპოვოს გამოსავალიექმნილი მდგომარეობიდან. რომან აბრამოვიჩს არ ეშლება მწვრთნელების შეცვლა. ვნახოთ, რა და როგორ იქნება ამჯერად. მან უნდა შეძლოს და ახალი სული შთაბეროს გუნდს. ისევე, როგორც ოლე გუნარ სულშერმა გააკეთა "მანჩესტერ იუნაიტედში"...

კრის სატონი: რა შეუძლია სარის?

..."რომან აბრამოვიჩისთვის უცხო არ არის მენეჯერების მოხსნა. მაგალითად,ზუსტად 10 წლის წინ მან კარისკენ მიუთითა ლუიშ ფელიპე სკოლარის. სკოლარიმ 6 თვე იმუშავა და გუნდი დატოვა მე-4 ადგილზე. მაშინ "ჩელსი" ლიდერს მხოლოდ 7 ქულით ჩამორჩებოდა. ამ დროისთვის კი ჩამორჩენა 15 ქულაა. "სიტისთან" 0:6 მარცხი იყო "ჩელსის" ანტირეკორდი ბოლო 28 წლის განმავლობაში. სარის სასარგებლოდ მხოლოდ ის შეიძლება ითქვას, რომ ამ დროისთვის მისი გუნდი აგრძელებს ბრძოლას ინგლისის თასისთვის და გასულია ლიგის თასის ფინალში, სადაც... "მანჩესტერ სიტის" უნდა შეხვდეს... ვნახოთ, შეძლებს თუ არა იტალიელი მწვრთნელი მდგომარეობის უკეთესობისკენ შეცვლას. ის კი ფაქტია, რომ "ჩელსის" დაცვაში ენით აუწერელი რამეები ხდება"...

* * *

...და რა თქვა თავად მაურიციო სარიმ "სიტისთან" განცდილი კატასტროფული მარცხის შემდეგ?

"თუ კლუბის მფლობელი დამირეკავს, მოხარული ვიქნები. მე ვწუხვარ იმ თამაშის გამო, რომელიც ვაჩვენეთ. ვწუხვარ იმ შედეგის გამო, რომელიც დაფიქსირდა. ვწუხვარ ჩემი გუნდის გამო... მწვრთნელის სამუშაო ძალიან რთულია. ის ყოველთვის დაკავშირებულია რისკთან და ეს ძალიან კარგად ვიცი. აბრამოვიჩის ზარისთვის ჯერ არასოდეს მიპასუხია. ჩვენ კარგად ვმუშაობდით სეზონის დასაწყისში და ასევე უნდა ვიმუშაოთ სულ, თუმცა ამის გაკეთება იოლი ნამდვილად არ არის".

პეპ გვარდიოლამ კი გადაყლაპა ბრაზი - მოგეხსენებათ, თამაშის შემდეგ სარიმ მას ხელი არ ჩამოართვა:

"მე ზუსტად ვიცი, რისი გაკეთება უნდოდა მას. ეს არის ფეხბურთი და ყოველთვის ყველაფერი ისე არ გამოდის, როგორც შენ გსურს. არ უნდა დავივიწყოთ, რომ მას შემდეგ, რაც 4 ბურთით დავწინაურდით, "ჩელსი" ჩვენზე უკეთესი იყო", - თქვა გვარდიოლამ.

ამასობაში, "სიტიმ" ოფიციალურად მობოდიშა "ჩელსის" იმ გამო, რომ 6:0-ის შემდეგ "იტიჰადის" ტაბლოზე შესრულდა "ჩელსის" ჰიმნი - One Step Beyond.

ყოველდღიური სპორტული გაზეთი "ლელო"
736
მკითხველის კომენტარები / 0 /
მსგავსი ამბები
რუბრიკის სხვა სიახლეები
;