SOS!!! ქუთაისის ტორპედოს ფეხბურთელებმა ვარჯიში შეწყვიტეს!..

თითქოს ყოველდღე ველოდით ამას, მაგრამ მაინც მეხივით გავარდა - "კლუბში და სამწვრთნელ ბაზაზე შექმნილი გაუსაძლისი პირობების გამო "ტორპედოს" ფეხბურთელებმა ვარჯიში შეწყვიტეს"! - წერს კლუბის ოფიციალური ფეისბუქგვერდი.

ის, რასაც ეს გუნდი, თავისი მწვრთნელითა და მისი სტაფით, ამ პერიოდის განმავლობაში აკეთებდა, ნამდვილი გმირობა იყო და მადლობის მეტი, არაფერი გვეთქმის. როგორი ამბავია, დღევანდელ საქართველოში (ან სადაც არ უნდა იყოს) ხალხს უხელფასოდ შრომა მოსთხოვო და მერე ეს არ დაუფასო?

ყველაფერს თავისი საზღვარი აქვს! არ გვინდა ვიფიქროთ, რომ ქუთაისის მერიას ეს ყველაფერი არ ანაღვლებს. როგორც ჩანს, ამ დროისთვის არც ქალაქის მმართველ უწყებას შესწევს იმის ძალა და სახსარი, რომ ამ საქმეს უშველოს.

ახლა წლის ბოლოა და ბიუჯეტიდან თანხის მობილიზება, როგორც ვიცით, ძალიან რთულია, თუ შეუძლებელი - არა. არ ვიცით, სად არის საშველი? ახლა სანაკრებო პაუზაა და წინ ორი კვირაა ჩემპიონატის განახლებამდე.

ეს არის ის დრო, როცა ყველამ, ვისაც ეს ევალება, ვისი ღირსების საქმეც არის, მაქსიმუმი უნდა გააკეთოს იმისთვის, რათა "ტორპედომ" ვარჯიში და ჩემპიონატში ასპარეზობა განაახლოს. წინააღმდეგ შემთხვევაში, ეს იქნება უდიდესი სირცხვილი, რომელსაც ქართული საფეხბურთო სამყარო ვერასოდეს ჩამოირეცხავს!..

2114
მკითხველის კომენტარები / 0 /
მსგავსი ამბები
რუბრიკის სხვა სიახლეები
;