Super მარიო ჟარდელის ფეხბურთი,  ნარკოტიკები და პოლიტიკა 

მეორე ათასწლეულში პირველად თამაშდებოდა უეფას სუპერთასის პრესტიჟული ჯილდო. რა თქმა უნდა, ამ შეხვედრას არ აკლდა ვარსკვლავები.

განსაკუთრებით “რეალის” მხრიდან - ფიგუ, რობერტო კარლოსი, კლოდ მაკელელე და სხვები... რა თქმა უნდა, “რეალი” იმედოვნებდა, რომ მორიგ ჯილდოს ძალიან იოლად მოიგებდა. მაგრამ... მინდორზე მოვლენები სულ სხვაგვარად განვითარდა. გამარჯვება “გალათასარაიმ” იზეიმა...

წლების შემდეგ თამამად შეიძლება ითქვას, რომ ეს გამარჯვება არ იქნებოდა, რომ არა თურქული გრანდის ბრაზილიელი ცენტრფორვარდი მარიო ჟარდელი. ბრაზილიელი ვარსკვლავი მთელი მატჩის განმავლობაში აწიოკებდა მადრიდელთა დაცვას და საბოლოოდ ორი გოლიც გაიტანა “სამეფო კლუბის” კარში.

ჟარდელის ვარსკვლავი განსაკუთრებით მძლავრად ენთო საფეხბურთო მინდვრებზე 2000-იანი წლების დასაწყისში. სამწუხაროდ, ამ დიდებული ფეხბურთელის ბედისწერის ეტლი დაბლა დაეშვა და... ნარკოტიკებში ჩაიძირა...

“ფიორევარიო” იყო ჟარდელის პირველი კლუბი. ეს გახლდათ მისი მშობლიური ქალაქის, ფორტალეზას გუნდი. ამ გუნდში ჟარდელი 16 წლისა მივიდა. მანამდე ის ქალაქის ქუჩებში დასდევდა ბურთს.

ფეხბურთელის ნიჭი შენიშნეს “ვასკო დე გამას” სელექციონერებმა. ერთი წლის შემდეგ ჟარდელი უკვე რიო დე ჟანეიროს ტრადიციული საფეხბურთო კლუბის ფეხბურთელი გახლდათ.ახალგაზდა ფეხბურთელისთვის იოლი სულაც არ იყო “ვასკოს” შემადგენლობაში დამკვიდრება, მაგრამ ჟარდელმა შესანიშნავი თვისება გამოავლინა. მან მოითმინა და მოიგო. რამდენიმეწლიანი დიდი შრომის შემდეგ ის “ვასკოს” ძირითადი შემადგენლობის ფეხბურთელი გახდა.

“ვასკო და გამაში” ჟარდელი ოთხი წელი ასპარეზობდა. ამ დროის განმავლობაში მან სამჯერ მოიპოვა შტატის ჩემპიონის ტიტული, მაგრამ ნაღდი ვარსკვლავი ჟარდელი მხოლოდ “გრემიოში” გახდა, სადაც 1995 წელს გადავიდა...

ბრაზილიაში იმ დროს არაერთი ნიჭიერი ახალგაზრდა ფორვარდი იყო, მაგრამ პორტუ ალეგრეს წარმომადგენელ კლუბს არ შეეძლო, არ შეემჩნია ძალიან ნიჭიერი მოთამაშე. ჟარდელი არატიპური ბრაზილიელი ფორვარდი იყო. ის არ გახლდათ დაჯილდოებული ფილიგრანული ტექნიკით, მაგრამ ჰქონდა ფიზიკური ძალა და გაბარიტები...

შედეგმა ყოველგვარ მოლოდინს გადააჭარბა. პირველივე სეზონში ჟარდელი გახდა არა მხოლოდ “მუშკეტერების” ძირითადი ფორვარდი, არამედ, ლიბერტადორესის თასის მთავარი აღმოჩენა. “გრემიომ” დამაჯერებლად მოიგო ეს უპრესტიჟულესი ჯილდო, ჟარდელმა კი ფინალში დუბლი შეასრულა და 12 გოლით ტურნირის საუკეთესო ბომბარდირი გახდა.

მთლიანობაში, ჟარდელმა “გრემიოში” დიდებული თამაში აჩვენა. მან ამ გუნდის შემადგენლობაში 73 შეხვედრა ჩაატარა და 67 გოლი შეაგდო. რა თქმა უნდა, ასეთი შედეგის შემოქმედს ბრაზილიაში დიდხანს არავინ გააჩერებდა და ჟარდელის მიმართ რამდენიმე ევროპულმა კლუბმა გამოხატა ინტერესი. თითქმის გადაწყვეტილი იყო, რომ მარიო “ბენფიკაში” უნდა გადასულიყო, მაგრამ... საბოლოოდ “პორტუში” აღმოჩნდა.



ჟარდელს ნამდვილად არ უნანია თავისი გადაწყვეტილების გამო. მაშინაც და დღესაც “პორტუ” დომინანტი გახლავთ პორტუგალიის ჩემპიონატში. ჟარდელის გუნდში მისვლამ “დრაკონებს” კიდევ უფრო გაუმყარა ეს სტატუსი.

“პორტუში” ჟარდელმა შესანიშნავი შემტევი სამეული შექმნა ზლატკო ზაჰოვიჩსა და სერჟიო კონსეისაოსთან ერთად. პირველივე სეზონში მარიომ ყველას დაანახვა, რომ ის მოწოდებით ბომბარდირი იყო - 45 მატჩი ჩაატარა ყველა ტურნირში და 37 გოლი შეაგდო. როგორც აღმოჩნდა, პირველ სეზონში ნაჩვენები შედეგი ჟარდელის კარიერაში ყველაზე დაბალი მაჩვენებელი იყო. ყოველ ახალ სეზონში მას უფრო და უფრო მეტი გოლი გაჰქონდა...

1999-2000 წლების სეზონი ჟარდელისთვის სარეკორდო აღმოჩნდა. მაშინ მარიომ “პორტუს” შემადგენლობაში 54 გოლი გაიტანა 49 შეხვედრაში. იმ სეზონში “პორტუმ” შესანიშნავად ითამაშა ჩემპიონთა ლიგაზეც. ჯგუფურ ეტაპზე “დრაკონები” მხოლოდ 1 ქულით ჩამორჩნენ “რეალს”. 

საბოლოოდ, პორტუგალიური გრანდის ძლევამოსილი სვლა “ბაიერნმა” შეწყვიტა. გერმანულმა გრანდმა 2 შეხვედრის ჯამში 3:2 მოიგო. ორივე გოლი “რეკორდმაისტერს” სწორედ ჟარდელმა გაუტანა. მთლიანობაში, მან იმ ჩემპიონთა ლიგაზე 10 გოლი შეაგდო.

“პორტუში” ჟარდელი სრული 4 წლის განმავლობაში თამაშობდა. ამ დროის განმავლობაში მან გუნდის შემადგენლობაში 170 შეხვედრა ჩაატარა და 168 გოლი შეაგდო, ყოველ წელს ხდებოდა პორტუგალიის ჩემპიონატის საუკეთესო ბომბარდირი...

ყველა ელოდა, რომ ჟარდელი რომელიმე ევროპულ გრანდში გადავიდოდა. ამის წინაპირობა ნამდვილად იყო. მისი სამსახური ძალიან სურდა მილანის “ინტერს”. “ნერაძური” გამალებით ეძებდა ტრავმირებული რონალდოს შემცვლელს... 

ტრანსფერი არ შედგა. “ინტერის” ნაცვლად, ჟარდელი... “გალათასარაიში” აღმოჩნდა. “გალამ” “პორტუს” იმ დროისთვის საკმაოდ სერიოზული თანხა - 20 მილიონი დოლარი გადაუხადა. პირველივე შეხვედრაში ჟარდელმა “გალათასარაის” მომთხოვნი გულშემატკივრების გულების მინადირება შეძლო და მოწინააღმდეგის კარში... 5(!) გოლი გაიტანა. ამას მოჰყვა “რეალთან” მატჩი, რომელზეც ზემოთ უკვე გითხარით...

ჟარდელის გამოცდილება “ლომებს” ძალიან გამოადგათ ჩემპიონთა ლიგაზე. გუნდი სულაც არ ითვლებოდა ჩემპიონთა ლიგაზე შორს წამსვლელად. ჟარდელის შესანიშნავი თამაშის წყალობით გუნდმა ევროპის უმთავრესი საკლუბო ტურნირის ორივე ეტაპი გადალახა. მეორე ჯგუფურ ეტაპზე “გალათასარაიმ” უკან მოიტოვა “მილანი” და “პარი სენ-ჟერმენი”.

ბედის ირონიით, მეოთხედფინალში “გალათასარაის” მეტოქედ ისევ “რეალი” ერგო. “სამეფო კლუბმა” სუპერთასზე განცდილი მარცხისთვის რევანში აიღო. პირველი შეხვედრა თურქეთში გაიმართა. მასპინძლები პირველი ტაიმის შემდეგ 0:2-ს აგებდნენ, მაგრამ “ქამბექი” შემოგვთავაზეს და 3:2 მოიგეს. 43 მატჩი და 34 გოლი - ასეთი იყო ჩვენი წერილის გმირის პირველი სეზონის მონაგარი თურქულ გრანდში.

ამ მაჩვენებლით მან თვით ლეგენდარულ რუმინელ გეორგე ჰაჯისაც კი გადაუსწრო. “ის უნიკალურია! სარკაზმულად რომ ვთქვათ, ერთი დარტყმით ორი გოლის გატანა შეუძლია”, - ამბობდა ჰაჯი ჟარდელის შესახებ.

სწორედ ამ დროს მარიოს ცხოვრება აერია. მან გემო გაუსინჯა ნარკოტიკებსა და აზარტულ თამაშებს, საკუთარ ბედს ხშირად ანდობდა არასაიმედო აგენტებს, რომლებიც თავიანთ სარგებელზე უფრო მეტს ფიქრობდნენ, ვიდრე ფეხბურთელის კარიერაზე.

“გალათასარაიში” მისვლიდან ერთი წლის შემდეგ ჟარდელმა გუნდის დატოვების გადაწყვეტილება მიიღო. ჰორიზონტზე ისევ გამოჩნდა “ინტერი”. ყველაფერი გადაწყვეტილი იყო, მაგრამ აგენტები “ინტერს” ფულზე ვერ მოურიგდნენ და გარიგებაც ჩაიშალა.

ჟარდელს პორტუგალიაში დაბრუნება მოუნდა, ოღონდ, ამჯერად “სპორტინგის” მაისურა მოირგო. საფეხბურთო მსოფლიომ ისევ ნახა “სუპერმარიო”, რომელმაც ისევ დაატეხა თავს კოშმარი მეტოქეებს - 42 შეხვედრაში 55 გოლი შეაგდო. ეს მის კარიერაში რეკორდი იყო. “სპორტინგმა” ჟარდელთან ერთად პორტუგალიის ჩემპიონატი და თასი მოიგო, თავად ჟარდელმა კი “ოქროს ბუცი” დაისაკუთრა.

ჟარდელს ძალიან უნდოდა მსოფლიოს 2002 წლის ჩემპიონატზე წასვლა. “თუ მუნდიალზე ვერ წავალ, ეს ჩემთვის ძალიან დიდი დარტყმა იქნება”, - თქვა მაშინ ბომბარდირმა. ექსპერტები და სპეციალისტები მიიჩნევდნენ, რომ მარიო ძალიან სჭირდებოდა “სელესაოს”. ლუიშ ფელიპე სკოლარიმ მაშინ აქცენტი რონალდოსა და რივალდოზე გააკეთა და ვერავინ შეედავებოდა - 2002 წლის მუნდიალი სწორედ მათი ტრიუმფით დასრულდა!

ფეხბურთელის გადაბირება “ინტერმა” და “ბარსამ” მოინდომეს. ტრანსფერები ისევ ჩაიშალა. ჟარდელი ცოლს გაშორდა და კვლავ ნარკოტიკებში ჩაეფლო. ის რამდენიმე თვით სამშობლოში გაემგზავრა. მერე ისევ დაბრუნდა და 12 გოლიც შეაგდო. ამის შემდეგ მან ათზე მეტი კლუბი შეიცვალა.

ბედის ირონიით, ჟარდელმა ბრაზილიის ნაკრებში 10 მატჩი ჩაატარა. საბოლოოდ, მაინც აჯობა ნარკოტიკებს და საფეხბურთო კარიერის დასრულების შემდეგ... პოლიტიკაში წავიდა...

ყოველდღიური სპორტული გაზეთი "ლელო"
621
მკითხველის კომენტარები / 0 /
რუბრიკის სხვა სიახლეები
;