SUPERსასარგებლო ზაზა ფაჩულია: 13 წუთში თითქმის ორმაგი დუბლი! [VIDEO]

ზაზა ფაჩულიამ "დეტროიტ პისტონსში" გადასვლის შემდეგ ერთ-ერთი ყველაზე ეფექტური მატჩი გამართა.

მართალია, სასტარტო ცენტრი ანდრე დრამონდის გათვალისწინებით მას სათამაშო დრო არცთუ ისე ბევრი აქვს, მაგრამ "ფინიქს სანსთან" მატჩისასაც დაგვანახა, რომ 13 წუთშიც შეიძლება ბევრი რამის მოსწრება: ამ დროში მან 7 ქულა, 10 მოხსნა და 2 პასი მოაგროვა, 4 ფოლიც მიიღო. 3-დან 1 ორქულიანი, 6-დან 5 საჯარიმო ჩააგდო.

მაშინ, როცა ზაზა მოედანზე იყო, "დეტროიტი" 12 ქულით დაწინაურდა. საფინალო ანგარიში კი 118:117 იყო - "პისტონსმა" იგორ კოკოშკოვის გაწვრთნილი "ფინიქს სანსი" მეოთხე პერიოდში დაამარცხა.

გადამწყვეტი რაუნდის წინ ფინიქსელები 84:83-ს იგებდნენ, თუმცა მეოთხე პერიოდში ზაზას გუნდელებმა 35:23 იმარჯვეს და სეზონში მეათე გამარჯვება მოიპოვეს. საყურადღებოა ისიც, რომ მეოთხე რაუნდის დასაწყისში "დეტროიტის" გაქცევის ერთ-ერთი სულისჩამდგმელი სწორედ ფაჩულია იყო.

- 48 წუთის განმავლობაში მოედანზე დგომის პრეტენზია არ მქონია. ვიცი, რომ მთავარი ცენტრი ანდრე დრამონდია, მაგრამ იგი შედარებით ახალგაზრდაა, ერთმანეთს კარგად ვეხმარებით. სიმართლე რომ ვთქვა, ქულებს ყურადღებას არ ვაქცევ. ჩემთვის მთავარია, სწორი კალათბურთი ვითამაშო, რომ ყველა ბედნიერი იყოს. სწორი კალათბურთი მაღალ ხარისხს განაპირობებს. ეს მეც დიდ სიამოვნებას მანიჭებს. ორი წლის განმავლობაში გამოვდიოდი "გოლდენ სტეიტში", სადაც ორჯერ გავხდი NBA-ს ჩემპიონი, სწორი და ლამაზი კალათბურთით ვაღწევდით წარმატებებს. სწორედ ესაა სასიამოვნო.

"დეტროიტმა" "ფინიქსი" სწორედ ასეთი კალათბურთთ დაამარცხა. 19 ქულა და 16 ქულა ჰქონდა ანდრე დრამონდს, 16 ქულა და 11 პასი შეასრულა ბლეიქ გრიფინმა, ხოლო "ფინიქსში" 37 ქულით საუკეთესო ბუკერი იყო.

"პისტონსს" 10 მოგების წილ 7 მარცხი აქვს და აღმოსავლეთის კონფერენციაში მეხუთე ადგილზეა. მომდევნო მატჩს 28 ნოემბერს, შინ, "ნიუ იორკთან" გამართავს.

791
მკითხველის კომენტარები / 0 /
მსგავსი ამბები
რუბრიკის სხვა სიახლეები