The Dynasty! როგორ იქმნებოდა ყველაზე საძულველი გუნდი

40 წლის განმავლობაში, "გოლდენ სტეიტი" მუდმივ სიმპათიას გრძნობდა იმის მიუხედავად, რომ არ იყო გამარჯვებულის მენტალიტეტის მქონე გუნდი.

ძალიან ცოტა ადამიანია, რომლებსაც არ მოსწონდათ 90-იან წლებში ტიმ ჰარდუეის, მიტჩ რიჩმონდისა და კრის მალინის "უორიორზის" სახალისო სტილი.

ეს ის გუნდია, რომელსაც We Believe ერქვა და 2007 წლის პლეი ოფში განთესვის პირველი ნომერი "დალას მავერიქსი" დაამარცხა, შემდეგ კი შვიდ მატჩამდე მიიყვანა "იუტა ჯაზთან" სერია. ასეთ გუნდებს არასოდეს მოუგიათ ჩემპიონატები, მაგრამ ისინი უყვარდათ კალათბურთის სამყაროში.

მართლაც, 2000-იანების ბოლოს 2011 წლამდე ბევრი აღფრთოვანებით ადევნებდა თვალს "უორიორზს". ახლა, 2018 წელს, "გოლდენ სტეიტს" აქვს სამი მოგებული ტიტული ოთხ წელიწადში და, სავარაუდოდ, ყველაზე საძულველი გუნდის სტატუსი. როდის შეიცვალა ყველაფერი "უორიორზისთვის" და როგორ მივიდა აქამდე? ამაში ერკვეოდნენ ვებგვერდ rotoden-ის მიმომხილველები.

როგორ იწყებოდა ყველაფერი

იოლი მისახვედრია, რომ "უორიორზის" დინასტია მაშინ დაიწყო, როცა 2009 წელს, დრაფტზე სტივენ კარი აირჩიეს. მაგრამ წარმატება ერთ ღამეში არ მოსულა. კარის კარიერის სტარტზე, "გოლდენ სტეიტს" ზედიზედ სამი სეზონი პრობლემები ჰქონდა - საშუალოდ 28 მატჩს იგებდა სეზონში და სამი მთავარი მწვრთნელი გამოიცვალა.

ჯო ლეიკობი კლუბის მფლობელი გახდა 2010 წელს. მან გუნდი 450 მილიონ დოლარად შეიძინა. 2011 წელს "უორიორზმა" გენერალური მენეჯერი შეცვალა - დაიქირავა ბობ მაიერსი, რომელიც მანამდე მოთამაშეთა აგენტად მუშაობდა. იმ დროისთვის ეს სარისკო ნაბიჯად მოჩანდა.

მაიერსის ერთ-ერთი გადაწყვეტილება იყო - მონტა ელისის გაცვლა "მილუოკიში" ენდრიუ ბოგუტის ნაცვლად. ეს არ იყო პოპულარული ნაბიჯი თაყვანისმცემლებს შორის - საყვარელი ვარსკვლავის გაცვლა ტრავმებისკენ მიდრეკილ ცენტრში. ამ მიზეზით, "უორიორზის" ფანებმა უსტვინეს ლეიკობსა და მაიერსს კრის მალენის მაისურის აღმართვის ცერემონიისას. მოკლედ, "გოლდენ სტეიტისთვის" ყველაფერი არც ისე კარგად იწყებოდა. ისე ჩანდა, რომ ამ გუნდს უფრო მიდრეკილება ჰქონდა ჩავარდნებისკენ, ვიდრე დისტანციის შექმნისკენ.

მიუხედავად ამისა, ამ საგიჟეთის პერიოდში, "უორიორზმა" შეძლო დრაფტზე კლეი ტომპსონის, დრეიმონდ გრინისა და ჰარისონ ბარნსის აყვანა. ეს სამეული შემადგენლობის ბირთვი გახდა.

ტომპსონის მისვლამ საშუალება მისცა გუნდს - გამოთხოვებოდა ელისს და შეეძინა ცენტრი. გრინმა საშუალება მისცა - უარი ეთქვა დევიდ ლისთვის. ამასობაში, ჰარისონ ბარნსი გაიზარდა ხარისხიან მსუბუქ ფორვარდად და პერიმეტრის მოთამაშედ, რომელიც ასე სჭირდებოდა გუნდს. მიუხედავად ამისა, ყველაზე დიდ კითხვის ნიშნად რჩებოდა კარი - შეძლებდა თუ არა სტეფი ჯანმრთელად ყოფნას.

კოჭის ტრავმა მას ყოველ სეზონში ზღუდავდა. ჩნდებოდა ეჭვი - შეძლებდა თუ არა კარი ყოფილიყო ლიდერი და საუკეთესო მოთამაშე ჩემპიონობის პრეტენდენტ გუნდში. ამ კითხვის ნიშნებმა იქამდე მიიყვანეს, რომ საკმაოდ იაფი კონტრაქტი გააფორმა.

2012-13 წლების სეზონში, მთავარი მწვრთნელის მარკ ჯექსონის ხელმძღვანელობით და კარის გარღვევით, "უორიორზი" პლეი ოფში გავიდა მეექვსე განთესვის ნომრით და მოუგო დასავლეთის მესამე გუნდს "დენვერს". ამის შემდეგ, "გოლდენ სტეიტმა" "სან ანტონიოსთან" სერია მეექვსე მატჩამდე მიიყვანა. ბოლოს და ბოლოს, "უორიორზმა" გაუგზავნა სიგნალი კალათბურთის სამყაროს. ისინი ლიგის ახალი გმირები გახდნენ. სეზონის შემდეგ, გუნდმა ანდრე იგუოდალა გაიფორმა.

გარდამტეხი მომენტი?

მომდევნო წელს, "უორიორზი" პირველივე რაუნდში გამოვარდა, ამჯერად, "ლოს ანჯელეს კლიპერსისგან". რაღაც არ მუშაობდა სისტემაში. მათ მიიღეს საკმაოდ საკამათო გადაწყვეტილება - გაათავისუფლეს მარკ ჯექსონი და დაიქირავეს სტივ კერი, რომელსაც არ ჰქონდა სამწვრთნელო გამოცდილება. თამამი და სარისკო ნაბიჯი იყო პლეი ოფის პრეტენდენტი გუნდისთვის. კერმა მაშინვე გამოუშვა დრეიმონდ გრინი სასტარტო შემადგენლობაში და მოულოდნელად, იგუოდალა მეექვსე მოთამაშედ გადაიყვანა.

2014-15 წლების სეზონში "გოლდენ სტეიტმა" აჩვენა ბალანსი - 67 მოგება/15 წაგება და პირველი ტიტული მოიპოვა 40 წლის განმავლობაში. ყველა აქებდა გუნდს, მაგრამ საკმარისად სერიოზულად არ აღიქვამდა. და უცებ, "უორიორზი" უკვე აღარ იყო ისეთი სიმპათიური: კარის აკრიტიკებდნენ კბილების დამცავის ღეჭვისთვის, გრინი ძალიან გაერთო ტრეშ-თოკინგით... მომდევნო სეზონში მათ ჩემპიონატი 24-0 სერიით დაიწყეს და დაასრულეს ბალანსით - 73 მოგება-9 წაგება.

კარიმ NBA-ის ისტორიაში ერთ-ერთი საუკეთესო შემტევი სეზონი ჩაატარა, მაგრამ ხალხი მაინც უკმაყოფილო იყო. მათ არ მოსწონდათ კარის მიმართ ყურადღების ხარისხი. ხალხს არ მოსწონდა, რომ "უორიორზი" უფრო მეტ მატჩს იგებდა, ვიდრე მაიკლ ჯორდანის "ჩიკაგო". ყველასთვის ცნობილია, როგორ დასრულდა ის სეზონი - "კლივლენდთან" NBA-ის ფინალის წაგება 3:1-ის შემდეგ. მაგრამ 2016 წლის 4 ივლისს ყველაფერი შეიცვალა.

საყოველთაო ზიზღი

როცა კევინ დურანტი "გოლდენ სტეიტს" შეუერთდა, ისინი მოძალადეები გახდნენ. ახლა, მათ ვეღარ იტანს კალათბურთის გულშემატკივართა დიდი ნაწილი. დღეს ახალი ტრენდია იმის მტკიცება, რომ "მათ კალათბურთი გააფუჭეს". რა აჩვენა "უორიორზმა" უახლოესი ორი წლის განმავლობაში კევინ დურანტთან ერთად? ორი ტიტული და 29 სხვა გუნდი, რომელიც ამაოდ ცდილობდა მის დაწევას.

რა ხდის "უორიორზს" დაუმარცხებელს? ბურთის მოედანზე გადაადგილების ხელოვნება. ეს არის ყველაზე უანგარო გუნდი კალათბურთში. მათ ეფექტურად მოკლეს იზოლირებული კალათბურთის ერა.

"სმოლ-ბოლი", მსუბუქი შემადგენლობების გამოყენება, რათა გაიზარდოს არასრულფასოვანი გაცვლების რაოდენობა მოედანზე - ახლა ამ სტილის ათვისებას აპირებს ყველა დარჩენილი 29 გუნდი. "გოლდენ სტეიტი" თამაშობს სწორ კალათბურთს, საიდანაც ყველამ უნდა აიღოს მაგალითი. და მაინც, "უორიორზს" ვერ იტანენ სწორედ ამის გამო.

არ ვიცით კარგია თუ ცუდი, მაგრამ სტივენ კარიმ სამუდამოდ შეცვალა კალათბურთის თამაში. სროლის თვისებების, დრიბლინგისა და მოედნის ხედვის შეხამება - ეს ის არის, რაც აქამდე არც ერთ მოთამაშეს არ უჩვენებია. არ ვიცით კარგია თუ ცუდი, მაგრამ კევინ დურანტმა შეცვალა მექულეებზე წარმოდგენა: 2 მეტრი და 13 სანტიმეტრი სიმაღლის კალათბურთელი ფლობს მომაკვდინებელ ტყორცნას და უნიკალურ შესაძლებლობას - გაანაწილოს ბურთი მოედნის ნებისმიერ წერტილში.

არ ვიცით, კარგია თუ ცუდი, მაგრამ დღევანდელ ლიგაში შეუდარებელი და განუზომელია მეოთხე ნომრისა და ისტორიაში ერთ-ერთი საუკეთესო დამცველის დრეიმონდ გრინის შესაძლებლობები პლეიმეიკერად თამაშისას.

და კიდევ, კლეი ტომპსონი ერთ თამაშში 60 ქულას აგროვებს შეზღუდულ დროში. არც ერთი ჩამოთვლილი მოთამაშე არ იღებს იმდენ პატივისცემას, რამდენსაც იმსახურებს. დურანტი და კარი სავსებით იმსახურებენ შესვლას ისტორიის 10 საუკეთესო კალათბურთელს შორის, მაგრამ მათ იშვიათად განიხილავენ ამ ჭრილში.

ყოველდღიური სპორტული გაზეთი "ლელო"
1308
მკითხველის კომენტარები / 0 /
მსგავსი ამბები
რუბრიკის სხვა სიახლეები
;