TimeLine. ყაზაიშვილი, როგორც გულივერი: გავხსენით პ⇔ანდორას ყუთი და დავინახეთ... [კარიკატურა]

ბუნებაში ორი ერთნაირი კენჭიც არ არსებობს. მართლა ასეა, მაგრამ მიმსგავსებული ხომ არსებობს? როგორ მიმსგავსებული? - აი, ისე, საქართველო და ჰოლანდია რომ იყვნენ შაბათს, 13 ოქტომბერს.

ორივემ 1:0 მოიგო პირველი ტაიმი; ორივემ 30-40 წუთების ინტერვალში გაიტანა პირველი გოლი, მეორე გოლები ჰოლანდიელებმაც და ქართველებმაც 80-იანებში შეაგდეს, ხოლო მესამედ რომ აიღეს მეტოქის კარი, მსაჯმა მატჩის დამთავრებისა ჩასტვინა. 3:0 საქართველო-ანდორა, 3:0 ჰოლანდია-გერმანია.

∴ ∴ ∴
როგორც მოგახსენეთ, ორივე მატჩი 2018 წლის 13 ოქტომბერს გაიმართა. კიდევ უფრო შორს წავიდეთ და გავავლოთ პარალელი ჯონათან სვიფტის ნაწარმოებთან. სწორედ "გულივერის მოგზაურობამ" შთამაგონა დამეხატა ჩამუხლული ვაკო ყაზაიშვილი, რომელიც ისევე ეთამაშება ჯუჯა ქვეყნის შვილ ანდორელებს, როგორც გულივერი - ლილიპუტებს.

გახსოვთ, რა პირობით მოხსნეს თოკები გულივერს ლილიპუტებმა? - ხელი მოაწერინეს მემორანდუმზე, რომლის თანახმად გოლიათს ქუჩებში ისე უნდა ევლო, რომ ფეხი არც ერთი ლილიპუტისთვის არ დაებიჯებუნა.

რატომ ახატია ბასილაშვილს ჩონჩხის თავი? [TimeLine]

არც ვაკო ყაზაიშვილს გაუჭყლეტავს რომელიმე ანდორელი - თავისთვის დაქროდა მათ საჯარიმოში და რამდენიც საკმარისი იყო გამარჯვებისთვის, იმდენი გაიტანა. ყაზაიშვილის დუბლს კანკავამ თავური მიაყოლა და 3:0.

∴ ∴ ∴
ჯონათან სვიფტმა "გულივერის მოგზაურობა" დაახლოებით 250 წლის წინ დაწერა. კიდევ უფრო ძველ, მითოლოგიურ ეპოქასთანაც მოძებნა პარალელი საქართველოს ნაკრებმა ანდორასთან გამარჯვებით.

ჯერ ბერძნულ მითს გავეცნოთ, რაშიც "ვიკიპედია" დაგვეხმარება:

"პრომეთეზე განრისხებულმა ზევსმა უბრძანა ჰეფესტოს, შეემქნა ქალი პანდორა, როგორც კაცობრიობის სასჯელი.

ჰეფესტომ მიწისა და წყლისგან შექმნა არსება, რომელსაც ქალღმერთის გარეგნობა და ადამიანის ხმა ჰქონდა, ქალღმერთმა აფროდიტემ პანდორას სინარნარე და მომხიბვლელობა დაანათლა; ჰერმესმა - ეშმაკობა და ვერაგობა; ათენა პალადამ კი ხელსაქმე ასწავლა.

რა? ანდორა! [TimeLine]

პრომეთე გრძნობდა რა მოახლოებულ საშიშროებას, გააფრთხილა თავისი ძმა ეპიმეთევსი, არ მიეღო საჩუქარი ზევსისგან. მიუხედავად პრომეთეს გაფრთხილებისა, ეპიმეთევსმა ცოლად შეირთო პანდორა.

ზევსმა საჩუქრად მისცა პანდორას დახურული ყუთი და გააფრხილა, რომ არ გაეხსნა, მაგრამ ვინაიდან ღმერთებმა პანდორას ცნობისმოყვარეობაც დაანათლეს, მან ძალაუნებურად გახსნა ყუთი.

გახსნა რა ყუთი, ამოფრინდა ყველანაირი ბოროტება, სიავე, ავადმყოფობა და გავრცელდა მთელ მსოფლიოში. შეშინებულმა პანდორამ ყუთი დახურა და ერთადერთი რაც ყუთში დარჩა, აღმოჩნდა იმედი."

∴ ∴ ∴
ვის მოვუგეთ 3:0? - (პ)ანდორას!

ვის წინააღმდეგ "თამაშობდა" (პ)ანდორა? - პრომეთესი, რომელიც შემდეგ კავკასიონის კალთებზე მიაჯაჭვეს.
რა დარჩა (პ)ანდორას ყუთში, მას შემდეგ, რაც ყოველგვარი უბედურება ამოფრინდა? - იმედი.

ჰოდა, ანდორასთან თამაშმა ქართველებს კიდევ უფრო გაგვიღვივა იმედი, არა მომავლისა, არამედ - აწმყოსი, რაც ბოლო წლებში ძალიან გვაკლდა. ყაზახეთი-ლატვია-ანდორასთან დავინახეთ საქართველოს კარგი ნაკრები, რომლისაც ძალიან ეშინიათ ზემოთ ჩამოთვლილ გუნდებს. ანდორის მწვრთნელი "ჯორჯიას" D ლიგის საუკეთესო გუნდს უწოდებს...

თუმცა საქართველოს ნაკრების წევრები მშვიდად არიან - მხოლოდ უახლოეს მატჩზე ვფიქრობთო. ქართველი ქომაგიც ჯერ ჯგუფის მატჩებზეა კონცენტრირებული, ნაკრების იმედი მაქვსო, ყველა ამბობს, მაგრამ ხმამაღლა არავინ ლაპარაკობს კიდევ ერთ იმედზე... ევროპის ჩემპიონატზე მოხვედრის იმედზე, რომელსაც ჯერ მშვიდად ვინახავთ ყუთში.

ყოველდღიური სპორტული გაზეთი "ლელო"
1599
მკითხველის კომენტარები / 0 /
მსგავსი ამბები
რუბრიკის სხვა სიახლეები
;