[U17] დასკვნითი შეკრება პორტუგალიამდე

13 ნოემბერს პორტუგალიაში 17-წლამდელთა ევროპის ჩემპიონატის VIII შესარჩევი ჯგუფის მინიტურნირი დაიწყება, რომელშიც საქართველოს ნაკრებიც ითამაშებს. ამ გუნდის თავკაცი გიორგი ჩიტაურია, ვინც გუნდი უკვე შეკრიბა და შესარჩევი ეტაპისთვის მზადება დაიწყო. 17-წლამდელები თბილისში ვარჯიშობენ, პორტუგალიაში კი 10 ნოემბერს გაემგზავრებიან. ჩიტაურმა ამ ფეხბურთელებს დაუძახა:

მეკარეები - დავით ასათიანი (ტორპედო), ლუკა ხარატიშვილი (სფფ აკადემია);
მცველები - საბა ხვადაგიანი, ლუკა სალუქვაძე, თორნიკე დუნდუა, დავით გოგოტიშვილი, გიორგი ჩხეტიანი, გიორგი უბილავა, სანდრ გაფრინდაშვილი (ყველა - დინამო თბ), ზურა ზოსიაშვილი, მიხეილ ავალიანი (ორივე - სფფ აკადემია);
ნახევარმცველები - ნიკოლოზ უგრეხელიძე, გიორგი აბუაშვილი, ლუკა გაგნიძე, ზაურ სიჭინავა (ყველა - დინამო თბ), გიზო მამაგეიშვილი, ოთარ მამაგეიშვილი, სანდრო ტატიშვილი (სამივე - სფფ აკადემია);
თავდამსხმელები - ნოდარ თუთაშვილი, თემურ თურაზაშვილი (ორივე - სფფ აკადემია), გიორგი გვიშიანი (საბურთალო).

ჩიტაურის გუნდი ევროშესარჩევ ციკლს 13 ნოემბერს უკრაინასთან მატჩით იწყებს, 16-ში მასპინძელ პორტუგალიას შეხვდება, ხოლო 19-ში - ალბანეთს. თამაშები მანგუალდესა და ვიზეუს მუნიციპალურ სტადიონებზე გაიმართება.

სამწუხაროდ, ჩვენი ნაკრები სრული შემადგენლობით ვერ შეიკრიბა. ტრავმის შემდეგ ვარჯიში ახლახან განაახლა ჯადული იობაშვილმა და ჯერ სათამაშოდ მზად არ იყო. არადა, ეს ფეხბურთელი ვიტალი დარასელიას სახელობის თასზე თბილისის "დინამოში" ერთ-ერთი გამორჩეული იყო...

ისიც ვთქვათ, რომ ჩიტაურის გუნდი 2003 წელს დაბადებულთა ნაკრებია, სადაც ერთი წლით უმცროსი სანდრო გაფრინდაშვილიცაა მიწვეული - ნიჭიერი უნივერსალი, რომელიც ნახევარდაცვაშიც თამაშობს და ცენტრალურ მცველადაც.

შესარჩევი ეტაპზე გუნდები სულ 13 ჯგუფში გადანაწილდნენ, ამათგან 10-ში მინიტურნირი უკვე დასრულდა. შემდეგ ეტაპზე უკვე გავიდნენ ბელგია, პოლონეთი (I ჯგუფი), იტალია, თურქეთი (II ჯგუფი), დანია, შვედეთი (IV ჯგუფი), საფრანგეთი, სლოვაკეთი (V ჯგუფი), უნგრეთი, სერბეთი (VI ჯგუფი), ხორვატია, სერბეთი (VII ჯგუფი), რუსეთი, შვეიცარია (X ჯგუფი), ფინეთი, ჩეხეთი (XI ჯგუფი), ჰოლანდია, უელსი (XII ჯგუფი), ავსტრია, ნორვეგია (XIII ჯგუფი).

13 ჯგუფიდან ელიტრაუნდში 2-2 უძლიერესი გუნდი გავა, პლუს, 4 საუკეთესო მესამეადგილოსანიც, რომელიც ჯგუფის ორ ლიდერთან შეხვედრებში მეტ ქულას დააგროვებს. ელიტრაუნდის მატჩები 2020 წლის მარტში გაიმართება.

აქედან კი ფინალურ ეტაპზე თითოეული ჯგუფის გამარჯვებული (სულ 8) და კიდევ 7 საუკეთესო მეორეადგილოსანი (ითვლება შედეგები მხოლოდ ჯგუფის პირველ და მესამე გუნდებთან) გავა. ამ 15-ს დაემატება ესტონეთის ნაკრები, რომელიც ფინალური ეტაპის მასპინძელია. ტურნირი 2020 წლის მაისში ჩატარდება.

210
მკითხველის კომენტარები / 0 /
მსგავსი ამბები
რუბრიკის სხვა სიახლეები
;