U17. საქართველო-ჩერნოგორია 2:0 - არის ელიტრაუნდი! [VIDEO]

საქართველოს 17-წლამდელთა ნაკრებმა ევროპის ჩემპიონატის პირველი შესარჩევი ციკლის მეორე შეხვედრაში დაამარცხა ჩერნოგორია, მოაგროვა 6 ქულა, ელიტრაუნდის საგზური დაიბევა და ახლა ჯგუფის გამარჯვებულ იტალიასთან შეხვედრაში გაარკვევს პირველადგილოსნის ვინაობას.

ლატვიასთან მოგებულ შეხვედრაში საქართველოს ნაკრები ნორმალურად გამოიყურებოდა, მაგრამ ნამდვილად არ ველოდით, თუ ჩერნოგორიასთან მატჩში ქართველი ჭაბუკები ასეთ გააზრებულ, გამართულ და თანამედროვე ფეხბურთს შემოგვთავაზებდნენ.

თამამად შეიძლება ითქვას, რომ ერთადერთი, რაშიც შეიძლება გავკიცხოთ ჩვენი ჭაბუკები, საგოლე მომენტების გამოყენების დაბალი პროცენტია. ასე რომ არ ყოფილიყო, შეხვედრის ბედს პირველივე ტაიმში გადავწყვეტდით.

საგოლე შანსები ჰქონდათ გიორგი გულიაშვილს, მის სეხნია შალიკაშვილს (ორჯერ), ხვიჩა კვარაცხელიას, ირაკლი აზაროვს...

საქართველო
2
ჩერნოგორია
0
U17. ევროპის ჩემპიონატის პირველი საკვალიფიკაციო ეტაპი. XIII ჯგუფი

27.10. თბილისი. მიხეილ მესხი
გოლები: 1:0 დავითაშვილი (28), 2:0 კვარაცხელია (46)
საქართველო (3-5-2): ხარშილაძე - გელაშვილი, ნონიკაშვილი, აბზიანიძე (65. ლორთქიფანიძე) - კაპანაძე, დავითაშვილი (82. მოისწრაფიშვილი), მექვაბიშვილი, შალიკაშვილი, აზაროვი - გულიაშვილი (73. გაგუა), კვარაცხელია.
სათადარიგოები: კუტალაძე, ბაქრაძე, ჯანგველაძე, ლომთაძე, შვარცი
მწვრთნელი: გიორგი ნემსაძე
ჩერნოგორია (4-2-3-1): რადულოვიჩი - დრინჩიჩი, ოსმანოვიჩი, მიკიჩიჩი, პუპოვიჩი - ი. ვუკჩევიჩი (77. შიმუნი), რადენოვიჩი - პ. ვუკოევიჩი, დინოსა, გასევიჩი (41. მუზუროვიჩი) - ბოჟოვიჩი (65. მაკიჩი).
სათადარიგოები: ზივანოვიჩი, მუდრესა, კრივოკაპიჩი, ვუიანოვიჩი, ვუკოტიჩი, დუბლიჩევიჩი
მწვრთნელი: ბორის მილიჩკოვიჩი
გაფრთხილება: დავითაშვილი (2), ოსმანოვიჩი (18), მიკიჩიჩი (21), რადენოვიჩი (27), აბზიანიძე (62), ი. ვუკჩევიჩი (65)
გაძევება: ოსმანოვიჩი (30)
არბიტრი: გ. ნიბერგი (შვედეთი)

ახლა გოლზეც: მეორე მატჩია, ქართველთა საგოლე შეტევისას შესანიშნავად ირჯება "საბურთალოს" ფლანგელი მცველი ცოტნე კაპანაძე. ჩვენების გოლი სწორედ მის გარღვევას მოჰყვა.

ცოტნემ დროულად გადააწოდა ბურთი გულიაშვილს, რომელმაც უკეთეს სიტუაციაში გახსნილი ზურაბ დავითაშვილი მოძებნა. როგორც იტყვიან, კვიცი გვარზე ხტის - ცოტა ხნის წინ ტრიბუნებიდან ტაშს ვუკრავდით ერთ-ერთ ყველაზე არაორდინარულ ფორვარდ სულიკო დავითაშვილს, დღეს კი მისი ვაჟის ჯერია...

დავითაშვილს ტაიმის ბოლომდე კიდევ ერთი შესანიშნავი საგოლე შანსი ჰქონდა. მან კარგად ჩამოიშორა მცველი და გოლიც უნდა ეზეიმა, მაგრამ გადამწყვეტ დარტყმას ძალა დააკლო და ჩერნოგორიელმა მცველმა ბურთი ცარიელი კარიდან გამოიტანა.

საქართველოს ნაკრებმა ტაიმი მეტობაში ჩაამთავრა. აქტიურმა გულიაშვილმა პოზიცია მოუგო და სისწრაფეში დაჯაბნა მეურვე ოსმანოვიჩი, რომელმაც იუხეშა და რადგან უკვე ჰქონდა ყვითელი ბარათი, შვედმა არბიტრმა მას სრულიად სამართლიანად მიუთითა გასახდელისკენ. რა თქმა უნდა, ამან კიდევ უფრო შეამცირა ბალკანელთა შანსები. პირველ ტაიმში მათ მხოლოდ ერთხელ გაიხედეს ქართველთა კარისკენ და ისიც - არცთუ სახიფათოდ.

მეორე ტაიმის მე-6 წუთზე მატჩის ბედი გადავწყვიტეთ. დავითაშვილმა ბურთი ოდნავ უკან მყოფ კვარაცხელიას დაუტოვა, ვინც ულამაზესი გოლი შეაგდო. შეგახსენებთ, რომ ხვიჩამ ლატვიასთან შეხვედრაშიც გაიტანა. ფაქტია, მისი სახით ქართულ ფეხბურთს კარგი ფორვარდი ეზრდება.

მერე იყო კაპანაძის შესანიშნავი რეიდი, მან მარჯვენა ფრთიდან პირდაპირ ააწიოკა მოწინააღმდეგის დაცვა. ცოტნე წააქციეს, მაგრამ არბიტრმა თამაშის წესების დარღვევა ვერ შენიშნა.

ქართველთა მორიგი მომენტი ისევ კაპანაძემ შექმნა. მის მიერ მახვილი კუთხიდან დარტყმულ ბურთს ჩერნოგორიელთა მეკარე რადულოვიჩი თითის წვერებით შესწვდა, თორემ გოლი გარდაუვალი იქნებოდა.

67-ე წუთზე მორიგი საგოლე შანსი გვქონდა. დავითაშვილმა შესანიშნავად შეასრულა საჯარიმო დარტყმა, მაგრამ ბურთი ოდნავ ასცდა მეტოქის კარს. მერე კვარაცხელიამ მიიღო ბურთი და ზემოდან გადააცილა სტუმართა კარს.

მატჩის დასრულებამდე 7 წუთით ადრე თამაშში ჩვენი გუნდის მეკარე ლუკა ხარშილაძეც ჩაერთო, ვინც მუზუროვიჩს არ გაატანინა.

...საქართველოს ნაკრები ელიტრაუნდშია! ბოლო დროის წარუმატებლობების ფონზე ეს ერთგვარი გამონათებაა ქართულ ფეხბურთში. ისიც ვთქვათ, რომ სამწვრთნელო ასპარეზზე ეს პირველი დიდი წარმატებაა საქართველოს ნაკრების ყოფილი კაპიტნის, გიორგი ნემსაძისთვის.

წინ იტალიასთან საენდშპილო მატჩია და საქართველოს ნაკრებს ჯგუფში პირველი ადგილის დაკავების შანსიც აქვს, თუმცა მთავარი ამოცანა უკვე შესრულებულია.

მატჩის შემდეგ
"ჩემი მთავარი დავალება იყო, რომ ჩერნოგორიელთა შემტევებისთვის არ მიგვეცა სივრცეები. დღეს იყო მომენტები, როცა იგრძნობოდა ის, რაც ქართული ფეხბურთის ქომაგს უხარია. იყო შეცდომებიც, მაგრამ ეს თამაშის ნაწილია. რაც შეეხება იტალიის ნაკრებს, მათი ორივე შეხვედრის პირველი ტაიმები ვნახე. ის ბევრად ძლიერია, ვიდრე წინა ორი მეტოქე. ჩვენი რეალური ძალა სწორედ იტალიელებთან დასკვნით შეხვედრაში გამოჩნდება", - თქვა ნამატჩევს გიორგი ნემსაძემ.

ისევ ფაჯოლი

საქართველოს დარად, იტალიის 17-წლამდელთა ნაკრებიც ასპროცენტიანია ორი ტურის შემდეგ. აპენინელებმა მინიმალური ანგარიშით მოუგეს ლატვიას. პატარა "აძურამ" არაერთი მომენტი შექმნა მეტოქის კართან, თუმცა მხოლოდ ერთი გაიტანა.

გამარჯვების გოლი იტალიელთა შორის საუკეთესომ, "იუვენტუსის" ფორვარდმა ნიკოლო ფაჯოლიმ შეაგდო, ვინც ჩერნოგორიასთან პირველ შეხვედრაშიც გამოიჩინა თავი.

27.10. თბილისი. დავით პეტრიაშვილი
იტალია-ლატვია 1:0
გოლი: 1:0 ფაჯოლი (19)
იტალია: რუსო, ბარაცეტა, ლეონე (70. სანდრი), არმინი, სერპე, გიაბუა, ვერგანი, რიკარდი, ბუა (80. პონსი), გრეკო, ფაჯოლი (65. კორტანოვისი).
სათადარიგოები: ჯერმი, მიკელოტი, გისლანდი, ტორინი, პეტრელი
მწვრთნელი: კარმინე ნუნციატა
ლატვია: დუბოდელოვსი, ტრუსკოვსკისი, ლიბეკსი, ოზოლინში, ვარსლავანსი, ვილერსი (80. კარტისოვსი), მაგრინსი, ვილუმსონსი (64. სიდოროვსი), კრუშკოვიჩსი, კალნინში (41. კრიუკოვიჩი), კარლიკსი.
სათადარიგოები: სოროკინსი, გრიგორიევსი, ჟურავლიოვსი, ბამბალსი, სილვერსტოვსი
მწვრთნელი: იგორ სტეპანოვსი
გაფრთხილება: არმინი (52), ლიბეკსი (72), რიკარდი (80)
არბიტრი: ე. ლამბრეხტსი (ბელგია)

U17. ევროპის ჩემპიონატის პირველი საკვალიფიკაციო ეტაპი. XIII ჯგუფი

ა გ თ მ ფ წ ბ ქ
1. იტალია 2 2 0 0 4-0 6
2. საქართველო 2 2 0 0 3-0 6
3. ლატვია 2 0 0 2 0-2 0
4. ჩერნოგორია 2 0 0 2 0-5 0

ბოლო ტური
30 ოქტომბერი
დავით პეტრიაშვილი. 18:00
ჩერნოგორია-ლატვია

მიხეილ მესხი. 18:00
საქართველო-იტალია

ყოველდღიური სპორტული გაზეთი "ლელო"
1227
მკითხველის კომენტარები / 0 /
მსგავსი ამბები
რუბრიკის სხვა სიახლეები
;