[U17] შესარჩევი ეტაპი. ფრე და ელიტრაუნდი ზღაპარში! 17-წლამდელთა მწვრთნელი: საგოლე მომენტების რეალიზაციაზე ბევრი სამუშაო გვაქვს...

საქართველო-ალბანეთი  0:0
19.11. მანგუალდე. მუნისიპალი
საქართველო: ხარატიშვილი, ზოსიაშვილი, ავალიანი, ხვადაგიანი, ჩხეტიანი, ო. მამაგეიშვილი (40. თურაზაშვილი), გვიშიანი, გაგნიძე (78. სალუქვაძე), აბუაშვილი, გ. მამაგეიშვილი, უბილავა
სათადარიგოები: ასათიანი, თუთაშვილი, გოგოტიშვილი, ტატიშვილი, უგრეხელიძე, სიჭინავა, დუნდუა
მწვრთნელი: გიორგი ჩიტაური
გაფრთხილება: გაგნიძე (65)
არბიტრი: დ. სახი (ყაზახეთი)

ალბათ, ათას წელიწადში ერთხელ თუ მოხდება ის, რაც საქართველოს 17-წლამდელთა ნაკრებს შეემთხვა - გიორგი ჩიტაურის გუნდი ელიტრაუნდში ძალიან მოულოდნელი გზით მოხვდა...

წინასწარ ვიცოდით, რომ ნაკრებს ევროშესარჩევი ჯგუფის მესამე მატჩში აუტსაიდერ ალბანეთთან  მხოლოდ მოგება აძლევდა ხელს, რადგან პირველ ორ ტურში მხოლოდ ქულა მოიპოვეს: უკრაინასთან 0:2 წააგეს, ხოლო პორტუგალიას დაუზავდნენ (0:0).

მანგუალდეს "მუნისიპალზე" გამართული მატჩი გიორგი ჩიტაურის გაწვრთნილებმა შეტევით დაიწყეს. პირველი სახიფათო მომენტი ლუკა გაგნიძის დარტყმას მოჰყვა: ჩვენი კაპიტნის შეტევას ალბანელთა მეკარე გადაეღობა და გუნდი გოლისგან იხსნა.

მე-16 წუთზე საჯარიმო ოთარ მამაგეიშვილმა შეასრულა და ალბანელები ამჯერად ძელმა იხსნა. პირველი ტაიმის მიწურულს ალბანელებს უკვე გიგი აბუაშვილმა შეუტია, მაგრამ მიზანს ააცილა.

მეორე ნახევარშიც უფრო საქართველოს ნაკრები აქტიურობდა. 52-ე წუთზე, გიორგი გვიშიანის დარტყმის შემდეგ, მეტოქე ისევ მეკარემ გადაარჩინა. ალბანელებმა კი ბოლოსკენ შეუტიეს, სერიოზული მომენტები ვერ შეგვიქმნეს, თან ჩვენი მეკარე ლუკა ხარატიშვილი საიმედოდ იდგა...

ბოლო წუთებში ჩიტაურის გაწვრთნილები უფრო აქტიურობდნენ და ალბანეთის კართან კუთხური ზედიზედ სამჯერ მოაწოდეს, მაგრამ გოლის გატანა ვერ მოახერხეს და მატჩი უგოლოდ დასრულდა - 0:0.

ევროშესარჩევი ჯგუფის მესამე ტურის პარალელულ მატჩში მასპინძელი პორტუგალია უკრაინას (რომელიც 100-პროცენტიანი მაჩვენებელით ლიდერობდა) დაუპირისპირდა და ეს თამაშიც უგოლოდ დასრულდა.

ამგვარად, ჯგუფში პირველი ადგილი 7 ქულით უკრაინამ დაიკავა, მეორეზე 5 ქულით პორტუგალია გავიდა, ხოლო საქართველო 2 ქულით მესამეზე დარჩა. თან ჩვენი გუნდი ამ 2 ქულით 13 ჯგუფში ყველაზე დაბალქულიანი ნაკრები აღმოჩნდა, მაგრამ... მოულოდნელად აღმოჩნდა, რომ საუკეთესო მესამეადგილოსნების კვარტეტში მოვხვდით და  17-წლამდელთა ელიტრაუნდში გავედით.

საქმე ისაა, რომ საუკეთესო მესამეადგილოსანი არა პირდაპირ დაგროვილი ქულებით, არამედ, პირველ-მეორე ადგილოსნებთან მოპოვებული ქულებით ირკვეოდა. ამ მაჩვენებლით საქართველოს 17-წლამდელთა გუნდი საუკეთესო ოთხეულში აღმოჩნდა პორტუგალიასთან (II ადგილი) მოპოვებული ერთი ქულის ხარჯზე.

საქართველოს გარდა, ამ ოთხეულში მოხვდნენ რუმინეთი, ისრაელი და ბელარუსი. ელიტრაუნდის მატჩები 2020 წლის მარტში გაიმართება.

* * *

ამგვარად, უნიკალური ისტორიის მომსწრენი ვართ - ისე გავედით ელიტრაუნდში, გოლიც ვერ გავიტანეთ. "ლელომ" მცირე ინტერვიუ ჩამოართვა 17-წლამდელთა ნაკრების მთავარ მწვრთნელ გიორგი ჩიტაურს...

- წარმოუდგენელი რამ მოხდა. თქვენ თავად ამ ფრის შემდეგ ელიტრაუნდშა გასვლას ელოდით?

- დიახ, ველოდით. დათვლილი გვქონდა, რომ ელიტრაუნდში ფრის შემთხვევაშიც გავდიოდით.

- ...და ფრეზე ხომ არ ითამაშეთ?

- არა, ფრეზე არ გვითამაშია, ჩვეულებრივი ფეხბურთი ვითამაშეთ და პირველ ტაიმში ორი მაგარი მომენტი ვერ გამოვიყენეთ. ამას გარდა, გიზო მამაგეიშვილმა ჯარიმიდან ხარიხას მოარტყა ბურთი. მეორე ტაიმშიც ორი ძალიან მაგარი დარტყმული მოიგერია მეტოქემ: ერთხელ - მეკარემ, მეორედ კი მცველმა ცარიელი კარიდან გამოიტანა ბურთი.

- ელიტრაუნდს როგორი იმედით ელოდებით? თავადაც კარგად იცით, რომ შეტევის გაუმჯობესებაზე მეტი მუშაობა მოგიწევთ...

- ბევრი საგოლე მომენტი შევქმენით, მაგრამ, სამწუხაროდ, გოლები ვერ გავიტანეთ. ამ კომპონენტის დახვეწაზე მართლაც ბევრი გვაქვს სამუშაო და ვიმუშავებთ კიდეც.

4342
მკითხველის კომენტარები / 2 /
თემო
0
ამაზეა ნათქვამი ,,ბედი მომეციო //////,,
GRIXO
0
მერე არ გრცხვენიათ ბოშებო? :))
მსგავსი ამბები
რუბრიკის სხვა სიახლეები
;