U18. ზაზამ სეზონი ტრიუმფით დაიწყო

თბილისისა და საქართველოს ჩემპიონატების საკვალიფიკაციო ტურნირის ჩემპიონი ზაზა ფაჩულიას აკადემიის გუნდი "ზაზა 2" გახდა. ოლიმპიურ სასახლეში გამართულ ფინალურ მატჩში ირაკლი მაისურაძისა და დავით მუმლაძის გაწვრთნილმა გუნდმა 88:80 დაამარცხა "აკადემია" და ტურნირის გამარჯვებული გახდა.

ფინალური მატჩი 8-ქულიანი სხვაობით დასრულდა, თუმცა პირველი პერიოდის შემდეგ ხელჩასაჭიდი უპირატესობა რომ მოიპოვა, "ზაზა 2-ს" თამაშის ბოლომდე სადავეები ხელიდან არ გაუშვია. საწყისი ათწუთეულის 23:17 მოგების შემდეგ მაისურაძის გუნდმა მეორეში 28:15 იმარჯვა და დიდ შესვენებაზე 19-ქულიანი ლიდერობით გავიდა.

აკადემიელებმა თამაშის შემოტრიალება კი სცადეს, მაგრამ "ზაზა 2-მა" ოქროს მედლები არ დათმო.

"ზაზა-2-ს" კარგად გაუძღვა გამთამაშებელი მათე კაპანაძე, რომელიც ოთხმაგ დუბლს წაეთამაშა: 15 ქულა, 11 მოხსნა, 6 პასი, 6 ჩაჭრა. 22 ქულა ჩააგდო ირაკლი კილაძემ, ხოლო ნიკოლოზ გაფრინდაშვილი 20 ქულამდე ავიდა.

"აკადემიასა" და მატჩის ბომბარდირი ირაკლი სულხანიშვილი გახდა, რომელმაც 27 ქულას უწია, ლაშა მიქელაძემ ეფექტური ორმაგი დუბლი გაიფორმა - 14 ქულა, 15 მოხსნა, ხოლო ბექა ბექაიას ანგარიშზე 19 ქულა დაგროვდა.

***

ფინალის დაწყებამდე გაიმართა მატჩი მესამე ადგილისთვის, რომელშიც საკალათბურთო კლუბმა "ორბმა" 103:75 სძლია "ზაზას" და ბრინჯაოს მედლებს დაეუფლა.

ვასილ ბერეკაშვილის გაწვრთნილი "ორბის" სნაიპერობა ნიკა ნიკოლაიშვილმა იკისრა - 32 ქულა, ნიკა გურგენიძემ 19 ქულას 8 პასი მიამატა, ხოლო ნიკა რატიანის ანგარიშზე 17 ქულაა.

"ზაზას" რიგებში 16-16 ქულით ნიკოლოზ კირიაკიდი და დავით გოგაძე გამოირჩნენ.

gbf.ge-ს ფოტოები

254
მკითხველის კომენტარები / 0 /
მსგავსი ამბები
რუბრიკის სხვა სიახლეები