U18. სუმო. ევროპის ჩემპიონატი: სამი სპორტსმენის ოთხი მედალი

ვარშავაში დამთავრდა 18-წლამდელ სუმოისტთა ევროპის ჩემპიონატი. საქართველოს (ფედერაციის პრეზიდენტი თენგიზ რუხაძე) სპორტულ ღირსებას სამი სპორტსმენი იცავდა. მათ ოთხი მედალი მოიპოვეს და საერთო გუნდურ ჩათვლაში აზერბაიჯანელებთან მესამე ადგილი გაიყვეს.

+100 კილოგრამ წონით კატეგორიაში ძალებს ცდიდნენ ბადრი ხატისკაცი და გიორგი ბურჯალიანი. ხატისკაცმა ზედიზედ ოთხ მეტოქეს სძლია, მაგრამ ფინალური პაექრობა აზერბაიჯანელ ჯამალ ფეიზიევთან დათმო და ვერცხლის მედალს დასჯერდა. აზერბაიჯანელმა სუმოისტმა ნახევარფინალში ბურჯალიანსაც აჯობა. ამ უკანასკნელს პოლონელ დამიან ვრობელთან ერთად ბრინჯაოს მედალი ერგო.

100 კილოში ჯაბა ქარელიშვილმა იასპარეზა. ორი მეტოქის ძლევის შემდეგ მან ბოლო ორი შეხვედრა წააგო და საბოლოოდ მე-5 ადგილზე გავიდა, სამაგიეროდ, გუნდურში ხატისკაცსა და ბურჯალიანთან ერთად ბრინჯაოს მედალი მოიპოვა. პირველი ადგილი პოლონელებმა დაიკავეს, რომლებმაც ფინალში რუსებს მოუგეს.

აბსოლუტურ წონით კატეგორიაში ჩვენებმა ნახევარფინალს უწიეს, მაგრამ იქ ბადრი პოლონელ ჯერარდ კურნიშაკთან, ხოლო გიორგი ჯამალ ფეიზიევთან დამარცხდა. მესამე ადგილისთვის ხატისკაცმა თანაგუნდელს აჯობა.

ყოველდღიური სპორტული გაზეთი "ლელო"
1067
მკითხველის კომენტარები / 0 /
რუბრიკის სხვა სიახლეები