U19. ბოსნია-საქართველო 1:0 - ავრამის მორიგი საჩუქარი [VIDEO]

საქართველოს 19-წლამდელთა ნაკრებმა ევროპის ჩემპიონატის საკვალიფიკაციო ეტაპი დაიწყო და ძალიან დასანანი მარცხი იწვნია.

გიორგი ყიფიანის გუნდმა პირველი მატჩი მასპინძელ ბოსნიასთან გამართა. დაბა პოპოვის "ეთნო სელო სტანისიჩის" სტადიონზე ჩატარებული ამ შეხვედრის ხილვის საშუალება ინტერნეტის საშუალებით გვქონდა და თამამად ვიტყვით, რომ საქართველოს 19-წლამდელებმა მოგების მშვენიერი შესაძლებლობა საკუთარი უნიათობითა და მსაჯის "დახმარებით" გაანიავეს.

ბოსნიელებმა თამაში აგრესიულად დაიწყეს და მე-5 წუთზე რეალური საგოლე მომენტი შექმნეს: ნედიმ ჰაჯიჩმა ბურთი ჩვენი გუნდის საჯარიმოს ხაზთან ზურგით მიიღო, მცველმა შემოტრიალებისა და დარტყმის საშუალება მისცა და ბურთმა კარს სანტიმეტრებში ჩაუქროლა.

მე-12 წუთზე მეტოქის კარს უკვე ნიკა ნინუა დაემუქრა, რომელიც საჯარიმოში მარჯვენა ფლანგიდან შეიჭრა და კარში დაარტყა, მაგრამ მიზანს ააცილა.

მე-16 წუთზე საქართველომ მოულოდნელი საჩუქარი მიიღო: ანელ შაბანაჯოვიჩი მე-11 წუთზე გააფრთხილეს, ხოლო ხუთ წუთში რუმინელმა არბიტრმა მარიუშ ავრამმა მოედნიდან მეორე ყვითელი ბარათის გამო გააძევა - ბოსნიელმა უკნიდან, გაშლილი ფეხებით ირაკლი ზარიძე მოცელა და მასპინძლები კაცნაკლულები დარჩნენ.

შაბანაჯოვიჩს პირველი ყვითელი ბარათიც გადამეტებული უხეშობის გამო აუფრიალეს - გიორგი ქოჩორაშვილს ლამის ფეხი მოაცალა და ჩვენთვის ავადსახსენებელმა რუმინელმა რეფერიმაც კი ამაზე თვალი ვერ დახუჭა. ეს ის ავრამია, 2012 წლის 13 მაისს 17-წლამდელთა ევროპის ჩემპიონატის ნახევარფინალში ნიკა ჭანტურია რომ გააძევა და ვასილ მაისურაძის გუნდი ჰოლანდიასთან კაცნაკლული რომ დატოვა. ავრამს კიდევ მივუბრუნდებით, რადგან რუმინელმა "პატივისცემის" გარეშე საქართველო არც ამჯერად დატოვა...

31-ე წუთზე ყიფიანის გუნდმა სწრაფი შეტევა წამოიწყო, რომელშიც გიორგი ჯინჯოლავა ჩაერთო და შორიდან ძლიერად დაარტყა - ბოსნიელები მეკარე ადნან კანურიჩმა იხსნა. დამატებაზე საჯარიმოში მყოფი ნიკა მალი აღმოჩნდა, რომელმაც დარტყმას ბექა ქავთარაძეზე კარის წინ პასი ამჯობინა, მცველმა გადაცემა ჩაჭრა და ვითარება განმუხტა. მასპინძლები აშკარა გოლს გადაურჩნენ. მანამდე, მსგავსი მომენტი არც მასპინძლებს და არც საქართველოს არ შექმნია...

44-ე წუთზე ჩვენებს ანგარიშის გახსნის კიდევ ერთი რეალური შანსი მიეცათ: ნინუამ მოედნის ცენტრში მეტოქეს ბურთი აართვა, საჯარიმოსკენ დაიძრა და მეკარესთან პირისპირ დატოვა ბექა ქავთარაძე, მაგრამ მცველმა ბოლო მომენტში ფეხიდან ააცალა ბურთი და ბოსნიელები აშკარა გოლისგან იხსნა.

მეორე ტაიმში მოლოდინი არ გამართლდა - მასპინძლებმა არა დაცვიდან, არამედ, აქტიური მაღალი პრესინგით დაიწყეს და რეალური საგოლე მომენტებიც შექმნეს. ისევ ნედიმ ჰაჯიჩმა შემოგვიტია. მან მარცხენა ფლანგზე დანიშნული საჯარიმოდან ბურთი პირდაპირ კარში გაუშვა - ლუკა გუგეშაშვილმა გუნდი ნახტომში გადაარჩინა. ამას მოჰყვა კუთხური და მასპინძელთა კაპიტან იასმინ ჩელიკოვიჩის თავური, რომელიც მიზანს ოდნავ ასცდა.

55-ე წუთზე იმავე ჩელიკოვიჩს ბურთის მიღებისას ფეხი დაუცდა და ქავთარაძე მეკარესთან პირისპირ რჩებოდა, მაგრამ კანურიჩი კარიდან დროულად გამოვიდა და ვითარება განმუხტა.

58-ე წუთზე ბოსნიელები კიდევ ერთხელ გადარჩნენ: ფლანგიდან მალის მიერ ჩაწოდებულ ბურთს კარის წინ მყოფმა ქავთარაძემ თავი დაუხვედრა - კანურიჩის მშვენიერი რეაქცია რომ არა, ბოსნიელთა კარის ბადე უთუოდ შეირხეოდა.

U19. ბოსნია
1
U19. საქართველო
0
გოლი: 1:0 გაზიბეგოვიჩი (87)

ბოსნია: კანურიჩი, გაზიბეგოვიჩი, ბეშირევიჩი, ჩელიკოვიჩი, სადიკუ, დანილოვიჩი, სმაიჩი (69. კატიჩი), შაბანაჯოვიჩი, ნ. ჰაჯიჩი (83. რასიჩი), კოსანიჩი (74. მუსტაფიჩი), ბ. ჰაჯიჩი.
სათადარიგოები: ე. კოვაჩი, კნეჟევიჩი, ს. კოვაჩი, ველიჩი, რონდიჩი, შაბანოვიჩი
მწვრთნელი: ტონი კარაჩიჩი
საქართველო: გუგეშაშვილი, მალი, ასათიანი, ჯინჯოლავა, ხარაბაძე - ნინუა, ქოჩორაშვილი (90. კვარაცხელია), კუცია - ზარიძე (65. დავითაშვილი), ქავთარაძე (83. ინჯგია), დარცმელია.
სათადარიგოები: ბულისკერია, ანდრონიკაშვილი, ოზბეთელაშვილი, ფურცელაძე, ტაბატაძე, კასრელიშვილი
მწვრთნელი: გიორგი ყიფიანი
გაფრთხილება: შაბანაჯოვიჩი (11), დანილოვიჩი (45), მალი (45), ასათიანი (49), დავითაშვილი (70)
გაძევება: შაბანაჯოვიჩი (16. მეორე ყვითელი), კუცია (67)
არბიტრი: მარიუშ ავრამი (რუმინეთი)

მე-60 წუთზე სწრაფი შეტევის კარგად გაგრძელების რამდენიმე ვარიანტი ჰქონდა ნინუას, მაგრამ... კარში დარტყმა არჩია და მეკარეს რეალურად ხიფათი ვერ შეუქმნა.

61-ე წუთზე ჩვენმა მცველმა ბურთი ცუდად მოიგერია, ბურთს მლადან დანილოვიჩი დაეუფლა და 20-მდე მეტრიდან ძლიერად დაარტყა - გუგეშაშვილის ნახტომი და ისევ გადავრჩით.

გავიდა 7 წუთი და რუმინელმა არბიტრმა ჩვენთვისაც "მოიცალა" - გიორგი კუციას მეტოქემ ზურგიდან ხელი ჰკრა და წააქცია. ავრამმა ჯარიმა არ დანიშნა, მოედანზე დაცემულმა დინამოელმა ემოცია ვერ მოთოკა და მეტოქეს ფეხი გაარტყა, რისთვისაც ყვითელი ბარათი ეკუთვნოდა, ავრამმა კი პირდაპირ წითელი უჩვენა. ეს შეუსაბამო და დაუნდობელი გადაწყვეტილება იყო, მაგრამ...

თუმცა, მხოლოდ არბიტრზე ხელების შეწმენდას არ ვაპირებთ: ქართველებს მოგების რეალური შანსი ჰქონდათ და მათივე ბრალია, რომ 3 ქულის ნაცვლად ხელში არაფერი შერჩათ. რიცხობრივი თანაფარდობის აღდგენამ ბოსნიელებს ხასიათი გამოუკეთა. მასპინძლებმა კვლავ აქტიურად შემოგვიტიეს. 82-ე წუთზე ფლანგურ გადაცემას კარის წინ მყოფი ნედინ ჰაჯიჩი აგვირგვინებდა - საქართველოს ნაკრები გუგეშაშვილის საოცარმა რექციამ გადაარჩინა.

მაგრამ 87-ე წუთზე მეკარეც ვერაფერს გახდა: იუსუფ გაზიბეგოვიჩი მარჯვენა ფლანგზე ორ მცველს შორის გაძვრა, საჯარიმოში შეიჭრა და მახვილი კუთხიდან მეკარისგან ახლო "ცხრიანში" გაიტანა - 1:0.

დარჩენილ დროში ჩვენი გუნდი ვა-ბანკზე წავიდა და... კინაღამ მეორე გოლიც გაუშვა: 95-ე წუთზე ბოსნიელებმა მოედნის ცენტრში ჩაჭრეს გადაცემა და ამარ კატიჩი მეკარესთან მარტო დარჩა - გუგეშაშვილი კარიდან დროულად გამოვიდა, რამაც ბოსნიელი დააბნია, დარტყმას პასი ამჯობინა და შეტევა ჩაშალა. საბოლოოდ, მასპინძლებმა 1:0 გაიმარჯვეს.

XI ჯგუფის მეორე შეხვედრაში საფრანგეთმა ანდორას 7 უპასუხო გოლი გაუტანა. მეორე ტურში, 11 ნოემბერს, ჩვენი ნაკრები სწორედ ანდორას ხვდება, ხოლო 14 ნოემბერს - საფრანგეთს.

ყოველდღიური სპორტული გაზეთი "ლელო"
719
მკითხველის კომენტარები / 0 /
მსგავსი ამბები
რუბრიკის სხვა სიახლეები