U19. ბროდარაცი-საბურთალო 1:1 - პლეი ოფი ჰორიზონტზე

"საბურთალომ" უეფას ახალგაზრდულ ლიგაში მეორე შესარჩევი ეტაპის პირველი მატჩი სტარა პაზოვას "სპორტცენტრში" სერბეთის 19-წლამდელთა ჩემპიონ "ბროდარაცთან" ჩაატარა და თბილისში მშვენიერი შედეგით ბრუნდება.

ქართულმა გუნდმა კარგად ითამაშა, რაც მარტივი სტატისტიკიდანაც ჩანს: რევაზ გოცირიძის გაწვრთნილებმა პირველივე ტაიმში უფრო მეტი რეალური საგოლე მომენტი შექმნეს, ვიდრე მასპინძლებმა. თუმცა თამაშის დასაწყისი მომენტებით მწირი გამოდგა - ფეხბურთელებმა კარში სულ სამჯერ დაარტყეს და აქედან ორი - საბურთალოელებმა. მე-3 წუთზე "ბროდარაცს" ირაკლი ჯავახიშვილმა შეუტია და სერბები მეკარე მიხაილო ზდრავკოვიჩმა გადაარჩინა.

თამაში დაძაბული გამოდგა და მეტოქეებმა ხეირიანი შეტევების ორგანიზება კარგახანს ვეღარ მოახერხეს. სერბებმა კი პირველად სახიფათო კომბინაცია 21-ე წუთზე გაითამაშეს და ანგარიში კარში პირველივე დარტყმით გახსნეს - საბურთალოელები მატია ბაბოვიჩის გადაცემით სრჟან კოჩიჩმა დაამწუხრა - 1:0.

ბროდარაცი
1
საბურთალო
1
უეფას ახალგაზრდული ლიგა. II შესარჩევი ეტაპი. I მატჩი

01.11. სტარა პაზოვა. სპორტცენტრი
გოლები: 1:0 კოჩიჩი (21. ბაბოვიჩის პასით), 1:1 ნიკოლაშვილი (81. გულიაშვილის პასით)
ბროდარაცი: ზდრავკოვიჩი, ჯურიჩი, გოლუბოვიჩი, კოიჩი, ივანჩევიჩი, იოკოვიჩი, მიტროვიჩი, ბაბოვიჩი (76. უ. ლუკიჩი), ტოშეცკი (72. პეიჩი), კოჩიჩი (60. სტოიანოვიჩი), ვ. ლუკიჩი.
სათადარიგოები: ტანიჩი, რისტიჩი, გაიჩი, გალეჩიჩი
მწვრთნელი: ზორან შარაბა
საბურთალო: ნასყიდაშვილი - მალი, ხუბაშვილი, ჯინჯოლავა, ჯავახიშვილი (90+1. ხარაიშვილი) - ფურცელაძე, ჩოთალიშვილი (46. გულიაშვილი) - ტაბატაძე (63. კაპანაძე), ივანიაძე, გულიაშვილი, ნიკოლაშვილი - კოხრეიძე.
სათადარიგოები: მეგრელიშვილი, ჭანტურიშვილი, ტოკლიკიშვილი, ნონიკაშვილი
მწვრთნელი: რევაზ გოცირიძე
გაფრთხილება: ნიკოლაშვილი (15), კოიჩი (43), ხუბაშვილი (44), გოლუბოვიჩი (56), კოხრეიძე (64), ფურცელაძე (84)
არბიტრი: ლ. ბარბენო (სან მარინო)

ტაიმის მიწურულს თბილისელებმა კიდევ ერთი სახიფათო შეტევა განახორციელეს, რომელსაც გიორგი ივანიაძე აგვირგვინებდა, მაგრამ ზდრავკოვიჩმა სერბები კიდევ ერთხელ გადაარჩინა.

მეორე ტაიმში გოცირიძის ბიჭებმა კიდევ უფრო აქტიურად შეუტიეს და საბოლოოდ მიზანსაც მიაღწიეს. ეს იქიდან ჩანს, რომ დასკვნით 45 წუთშიც მეტოქეზე მეტი სახიფათო მომენტი შექმნეს. 65-ე წუთზე, შეცვლაზე შესულმა ცოტნე კაპანაძემ კარში დაარტყა და ზდრავკოვიჩმა ბურთი კუთხურზე მოიგერია.

70-ე წუთზე მეტოქის კარს უკვე გიორგი კოხრეიძე დაემუქრა და ბურთს მცველი გადაეფარა. მალევე ისევ კაპანაძემ შეუტია და სერბები კვლავ მეკარის გადასარჩენები გახდნენ.

გავიდა კიდევ ორიოდ წუთი. საბურთალოელთა შეტევას უკვე ბექა ნიკოლაშვილი აგვირგვინებდა და ვითარება ისევ ზდრავკოვიჩმა განმუხტა.

77-ე წუთზე საქმე "საბურთალოს" მეკარე გოგა ნასყიდაშვილსაც გაუჩნდა - ვიქტორ ლუკიჩის კუთხურის შემდეგ "საბურთალოს" კარს დეიან ჯურიჩი დაემუქრა და თბილისელთა კიპერმა კარგი რეაქცია გამოავლინა.

მერე ისევ თბილისელებმა შეუტიეს და 81-ე წუთზე შედეგს მაინც მიაღწიეს - სახიფათო შეტევა გიორგი გულიაშვილმა განავითარა და დასარტყმელ პოზიციაზე გაიყვანა ნიკოლაშვილი, რომელმაც ანგარიში გაათანაბრა - 1:1.

დარჩენილ წუთებში საგოლე მომენტები ვერც ერთმა გუნდმა ვეღარ შექმნა და ტაბლოზეც აღარაფერი შეცვლილა. სერბულ კლუბთან გასვლაზე ფრე "საბურთალო 2-ისთვის" მშვენიერი შანსია, უეფას ახალგაზრდული ლიგის პლეი ოფში გასასვლელად რომ იბრძოლოს. საპასუხო მატჩი თბილისში, დავით პეტრიაშვილის სახელობის სტადიონზე, 22 ნოემბერს გაიმართება.

საინტერესოა, რომ "საბურთალო 2-მა" მიმდინარე გათამაშებაში მესამე შეხვედრა ჩაატარა და ერთიც არ წაუგია. შეგახსენებთ, რომ პირველ შესარჩევ ეტაპზე თბილისელებმა თურქული "ბურსასფორი" გასვლაზე 1:0 დაამარცხეს, შინ კი 1:1 ითამაშეს.

ყოველდღიური სპორტული გაზეთი "ლელო"
1380
მკითხველის კომენტარები / 0 /
მსგავსი ამბები
რუბრიკის სხვა სიახლეები
;