U19. დღეს თბილისში. საქართველო vs ლიხტენშტეინი: ნაკლები შეცდომა და ერთით მეტი გოლი!..

დღეს თბილისში 19-წლამდელთა ევროპის ჩემპიონატის შესარჩევი ციკლი იწყება. საქართველოს ნაკრები ელიტრაუნდის საგზურისთვის ბრძოლაში ლიხტენშტაინთან მატჩით ერთვება.

ჩვენს ჯგუფში არიან ისრაელისა და აზერბაიჯანის ნაკრებებიც. გიორგი მიქაძის გუნდი პირველ მეტოქეს "მიხეილ მესხზე" შეხვდება. მატჩი 17 საათზე დაიწყება:

საქართველოს 19-წლამდელთა ნაკრები თბილისური შესარჩევი ეტაპისთვის ამ შემადგენლობით ემზადებოდა:

მეკარეები - დემეტრე ბულისკერია, გიორგი მამარდაშვილი (ორივე - დინამო თბ);
მცველები - ბექა ბუიღლიშვილი, ლუკა ჯაფარიძე (ორივე - ლოკომოტივი), გიორგი ჯინჯოლავა (საბურთალო), ფირუზ გაბიტაშვილი, ლევან ხარაბაძე (ორივე - დინამო თბ), ივა გელაშვილი (სპარტა, ჩეხეთი);
ნახევარმცველები - თამაზ ბაბუნაძე, ანზორ მექვაბიშვილი, ბექა დარცმელია (ყველა - დინამო თბ), ცოტნე ფაცაცია (მერანი), ზურიკო დავითაშვილი (ლოკომოტივი), ლაშა ნანობაშვილი (შევარდენი 1906), გიორგი ივანიაძე (გაგრა);
თავდამსხმელები - რევაზ ინჯგია, შოთა შეყილაძე (ორივე - ლოკომოტივი), ხვიჩა კვარაცხელია (რუსთავი), გიორგი გულიაშვილი (საბურთალო), თემურ გაბუნია (დინამო თბ).

გუნდის მთავარი მწვრთნელი გიორგი მიქაძე მზადებაზე, ტრავმირებულებზე, მეტოქეებსა და მიზნებზე გველაპარაკა.

- ნაკრებში გამოძახებული ყველა ფეხბურთელი ჯანმრთელადაა? მაგალითად, ეროვნული ლიგის ბოლო ტურში, "ჩიხურასთან" მატჩში, დინამოელი ლევან ხარაბაძე დაშავდა...

- ხარაბაძეს მიკროტრავმა აწუხებს, მაგრამ იმედია, მომჯობინდება და ლიხტენშტაინთან სათამაშოდ მზად იქნება. ექიმები საამისოდ ყველაფერს აკეთებენ. დანარჩენი ყველა მწყობრშია და თამაშებისთვის ემზადება.

- როგორია მოთამაშეთა მდგომარეობა?

- ბიჭების ფუნქციონალური მდგომარეობა დამაკმაყოფილებელია. შესარჩევი ეტაპისთვის მოსამზადებლად დიდი დრო გვქონდა და ტურნირამდე ყველა შეკრებაზე ამ საკითხს დიდ ყურადღებას ვაქცევდით. ამიტომ მიმაჩნია, რომ გუნდი მზადაა ამ ტურნირში სათამაშოდ და გასამარჯვებლად.

- მეტოქეებზე რა ინფორმაციებს ფლობთ?

- თითქმის ყველა მეტოქეზე გვაქვს ინფორმაცია. შესარჩევის შეხვედრებსაც შევხედავთ და გავაანალიზებთ. ყველაზე ცოტა რამ პირველ მეტოქეზე ვიცით.

- მათ მატჩების ჩანაწერები არ მოგაწოდეს?

- უბრალოდ, ამ გუნდმა ძალიან ცოტა ითამაშა - მათი მხოლოდ ძველი თამაშების ჩანაწერები გვაქვს და ფრთხილად უნდა ვიყოთ, არასასიამოვნო სიურპრიზები რომ ავიცილოთ. საერთოდ, ლიხტენშტაინი საფეხბურთო კუთხით ისე ჟღერს, შესაძლოა, ბევრს არაფერს გვეუბნება და ყველას ჰგონია, რომ იოლი თამაში იქნება, მაგრამ ეს არის ყველაზე დიდი საფრთხე.

ჩვენ არავითარ შემთხვევაში არ უნდა მოვდუნდეთ. იმის იმედი არ უნდა გვქონდეს, რომ ვიღაცა რაღაცას დაგვითმობს. აქედან გამომდინარე, ყველანაირად მზად და მობილიზებულები უნდა ვიყოთ. მთავარია, ნაკლები შეცდომა დავუშვათ, ერთით მეტი გოლი გავიტანოთ და 3 ქულა ავიღოთ. ესაა ყველაზე მნიშვნელოვანი. ჩვენ პრაგმატულები უნდა ვიყოთ.

- რა არის ამ შესარჩევ ციკლში გუნდის მიზანი?

- პროგრამა მინიმუმი ჯგუფური ეტაპის დაძლევაა. კიდევ ერთხელ ვამბობ - ჩვენ ვცდილობთ, პრაგმატულები ვიყოთ და რაც შეიძლება ნაკლები შეცდომა დავუშვათ. ყურადღებით უნდა ვითამაშოთ და ეს ეტაპი სასურველი პოზიციით დავძლიოთ.

კომენტარი გუნდის ერთ-ერთმა ლიდერმა, თბილისის "ლოკომოტივის" შემტევმა ნახევარმცველმა ზურიკო დავითაშვილმაც გააკეთა:

"რთული თამაშების მოლოდინი გვაქვს. ყველა მეტოქე დასაფასებელია და ნებისმიერთან მთელი მობილიზებით უნდა ვითამაშოთ. ვეცდებით, მაქსიმალური შედეგი ვაჩვენოთ და ჯგუფში პირველი ადგილი დავიკავოთ. შინ ვთამაშობთ და გულშემატკივარი გამარჯვებას ელის. ვეცდებით, გავახაროთ ქომაგები".

ამ 19-წლამდელთა ბირთვს ის მოთამაშეები შეადგენენ, რომლებმაც არაერთი ტურნირი წარმატებით მოიარეს და 17-წლამდელთა ევროპის ჩემპიონატის ფინალურ ეტაპზე მხოლოდ ბურთების უარესი სხვაობის გამო ვერ მოხვდნენ. დავითაშვილი დარწმუნებულია, რომ ამ შემადგენლობას დიდი პოტენციალი აქვს:
"ელიტრაუნდის შემდეგ ჩვენი გუნდის შემადგენლობა ოდნავ შეცვლილია, მაგრამ ბირთვი შენარჩუნებულია. ჩვენ ერთად ბევრი წარმატებული ტურნირი ჩაგვიტარებია და შეთამაშებულები ვართ. სამწუხაროდ, ელიტრაუნდიდან ევროპის ჩემპიონატზე ვერ მოვხვდით, მაგრამ ვეცდებით, მიზანს ახლა მაინც მივაღწიოთ".

ტურნირის კალენდარი

ოთხშაბათი, 14 ნოემბერი
აზერბაიჯანი-ისრაელი 14:00
საქართველო-ლიხტენშტაინი 17:00

შაბათი, 17 ნოემბერი
ლიხტენშტაინი-ისრაელი 14:00
საქართველო-აზერბაიჯანი 17:00

სამშაბათი, 20 ნოემბერი
ისრაელი-საქართველო 17:00
აზერბაიჯანი-ლიხტენშტაინი 17:00

ყოველდღიური სპორტული გაზეთი "ლელო"
1015
მკითხველის კომენტარები / 0 /
მსგავსი ამბები
რუბრიკის სხვა სიახლეები
;