U19. ევროპის ჩემპიონატის საკვალიფიკაციო. საქართველო 1:2 აზერბაიჯანი:ცივი შხაპი მოდუნებისთვის

17.11. თბილისი. მიხეილ მესხი
1:0 ხარაბაძე (45+1), ბაირამოვი 1:1 (66), 1:2 მარდანოვი (70)

საქართველო: ბულისკერია, გაბიტაშვილი (74. ივანიაძე), გელაშვილი, ჯინჯოლავა, მექვაბიშვილი (74. ფაცაცია), ხარაბაძე, დარცმელია (85. გაბუნია), ბაბუნაძე (55. ინჯგია), დავითაშვილი, კვარაცხელია, გულიაშვილი
სათადარიგოები: მამარდაშვილი, ბუიღლიშვილი, შეყილაძე, ნანობაშვილი, ჯაფარიძე
მწვრთნელი: გიორგი მიქაძე

აზერბაიჯანი: მეჰბალიევი, იბრაჰიმოვი, ჰუსეინლი, ველიზადე, სეიდოვი, გულიევი (89. ინგლაბლი), მარდანოვი, მასიმოვი, გურბანოვი, გასიმოვი (64. მ. მაჰმუდოვი), ბაირამოვი (76. ნურუევი)
სათადარიგოები: ალიშოვი, ვალიევი, ჰუსეინოვი, ჯაფარგულიევი, თალიბოვი, ალიევი
მწვრთნელი: ვუგერ მამედოვი

გაფრთხილება: მარდანოვი (40), მექვაბიშვილი (51), ველიზადე (78), სეიდოვი (88)
არბიტრი: დონატას რუმშასი (ლიეტუვა)

აზერბაიჯანთან გამარჯვების შემთხვევაში, საქართველოს 19-წლამდელთა ნაკრები ვადამდე მოიპოვებდა ელიტრაუნდის საგზურს. პირველი ტურის შემდეგ ეს რეალური ჩანდა, მეორე მატჩის პირველი ტაიმის შემდეგაც, მაგრამ... რა დაემართა გუნდს, გამოცანაა. ფაქტია, ეს უმნიშვნელოვანესი მატჩი ზედმეტი თავდაჯერებულობისა და უაზრო შეცდომების გამო წავაგეთ...

აზერბაიჯანი მაღალი პრესინგით თამაშობდა. ჩვენები კი სათანადო ტემპით ვერ პასუხობდნენ და მათ დაცვაში შეღწევა უჭირდათ. სტუმრებმა მასპინძელთა თავდაპირველი შეტევები მოიგერიეს და მალე თამაშის ჩვენს ნახევარზე გადმოტანა სცადეს. მაგრამ უპირატესობას მაინც საქართველო ფლობდა და ბურთს კარგად აგორებდა.

ეგ იყო, სისწრაფეები ისევ არ გვყოფნიდა და კართან ახლოს ვერ მივდიოდით, თან შორიდანაც იშვიათად ურტყამდნენ ქართველები, ხშირი იყო ბურთის გაუმართლებელი თრევაც, ნაკლები - სწრაფი გადაცემები, რაც მჭიდრო დაცვის გასარღვევად აუცილებელია...

...მე-20 წუთზე ჯარიმა ხვიჩა კვარაცხელიამ შეასრულა და ცოცხალ კედელს ვერ ააცილა. 24-ე წუთზე უკვე ჩვენმა კაპიტანმა ბექა დარცმელიამ სცადა ბედი და სიზუსტემ მასაც უმტყუნა. 29-ე წუთზე საჯარიმოში ბურთი კვარაცხელიამ მიიღო და დარტყმაც შეეძლო და გადაცემაც, მაგრამ დაახანა და მერე დარტყმა დაგვიანებული და არაზუსტი გამოდგა.

31-ე წუთზე კარის წინ უკვე გიორგი გულიაშვილი დატოვეს, რომელიც ახტა და ბურთს ფეხის წვერით წაჰკრა, მაგრამ მეკარემ საიმედოდ ითამაშა. 37-ე წუთი: ამჯერად, ზუკა დავითაშვილმა შეუტია და მიზანს მანაც ოდნავ ააცილა.

აზერბაიჯანელებმა პირველი მეტ-ნაკლებად სახიფათო შეტევა 32-ე წუთზე განახორციელეს, მაგრამ ტურალ ბაირამოვმა ჯარიმის შემდეგ მეკარე დემეტრე ბულისკერიამ საიმედოდ ითამაშა.

ჩვენების მონდომებამ შედეგი მაინც გამოიღო და აზერბაიჯანს გოლი "გასახდელში გავაყოლეთ" - მეტოქის მცველმა კუთხურიდან მოწოდებული ბურთი მოიგერია და ლევან ხარაბაძემ დაახლოებით 30 მეტრიდან უძლიერესი დარტყმით აზერბაიჯანელთა კარის "ცხრიანი" შეარხია - 1:0.

ასეთი გოლი გუნდზე ცუდად მოქმედებს. მაგრამ ამ ანგარიშით აზერბაიჯანი ელიტ-რაუნდზე გასვლის შანსს კარგავდა და შესვენების შემდეგ გუნდი გააქტიურდა. ჩვენები კი ანერვიულდნენ, მოედნის ცენტრი დათმეს და მეტოქის მაღალ პრესინგს კონტრთამაშში ვერაფერი დაუპირისპირეს.

46-ე წუთზე ჩვენი მეკარე ბულისკერია ბურთის ამოტანისას შეცდა და თავისიანის ნაცვლად ელვინ ჯაფარგულიევს მიუგორა, რომელმაც მოედნის ცენტრიდან პირდაპირ კარში გაუშა, მაგრამ დემეტრემ ბოლოს მაინც საიმედოდ ითამაშა. 52-ეზე ბედი უკვე ზახიდ მარდანოვმა სცადა და ვერც მან ივარგა.
ჩვენებმა მდგომარეობის გამოსწორება სცადეს და ისევ შორეული დარტყმით -58-ეზე ისევ ხარაბაძემ სცადა შორიდან ბედი და ააცილა.

მერე კი ჩვენს დაცვაში 4-წუთიანი ჩავარდნა მოხდა. მარდანოვის ფლანგური გადაცემის კარის წინ ბურთი ხარაბაძეს უნდა მოეგერიებინა, მაგრამ ბაირამოვმა დაასწრო და ანგარიში გაათანაბრა - 1:1.

სამ წუთში მეტოქემ ჯარიმიდან ბურთი საჯარიმოში ჩაჰკიდა, ბულისკერია გამოსვლისას შეცდა და მარდანოვმა თავით გაიტანა - 1:2.
ჩვენები გამოფხიზლდნენ და შეუტიეს. მაგრამ ნერვიულობა და აჩქარება დაეტყოთ და გუნდურის ნაცვლად, ხშირი იყო გაუმართლებელი ინდივიდუალური ქმედებები. 82-ე წუთზე ისევ ხარაბაძემ შეუტია და ააცილა. 85-ე წუთზე კი გულიაშვილმა სცადა ბედი და მანაც უშედეგოდ.

89-ე წუთზე ჯარიმიდან დავითაშვილის ჩაწოდებული ბურთი მეკარემ მოიგერია და შეტევაში წასულ ქართველებს არ გაატანინა. დამატებულ დროში მეკარე ნიჯათ მეჰბალიევმა კიდევ ერთი სახიფათო დარტყმა მოიგერია.

ბოლო წამებზე აზერებმა კინაღამ მესამეც გაიტანეს - კონტრშეტევის შემდეგ ბულისკერიამ პირისპირ დარჩენილ მეტოქეს აჯობა და გადაგვარჩინა, მაგრამ მარცხს მაინც ვერ ავცდით. ამით ელიტრაუნდისკენ მიმავალი გზა მეტისმეტად გავიმრუდეთ.

თბილისური მინიტურნირის მეორე შეხვედრაში, რომელიც მიხეილ მესხის სახელობის სტადიონის სათადარიგო არენაზე გაიმართა, ისრაელმა ლიხტენშტაინი გაჭირვებით დაამარცხა. მათ ანგარიში მე-10 წუთზე გახსნეს: გუნდი ლიელ აბადამ დააწინაურა. 55-ე წუთზე ლიხტენშტაინის ნახევარმცველმა ფაბიენ უნტერაინერმა წონასწორობა აღადგინა - 1:1. ისრაელმა გამარჯვების გოლი საფინალო სასტვენამდე მცირე ხნით ადრე გაიტანა: 83-ე წუთზე ედენ კარზევმა ზუსტი დარტყმით ისრაელს 3 ქულა მოუტანა და ჯგუფში გაალიდერა.

20 ნოემბერს დასკვნითი ტურია - საქართველო ისრაელს შეხვდება, ხოლო აზერბაიჯანი - ლიხტენშტაინს. გიორგი მიქაძის გუნდს ელიტრაუნდში გასასვლელად მოგება სჭირდება.

თ მ ფ წ ბ ქ
1. ისრაელი 2 2 0 0 6:2 6
2. აზერბაიჯანი 2 1 0 1 3:5 3
3. საქართველო 2 1 0 1 8:2 3
4. ლიხტენშტაინი 2 0 0 2 1:9 0

ყოველდღიური სპორტული გაზეთი "ლელო"
666
მკითხველის კომენტარები / 0 /
მსგავსი ამბები
რუბრიკის სხვა სიახლეები
;