U19. საბურთალო-ბურსასფორი 1:1 - ბოლო წუთებზე გამოგლეჯილი [VIDEO]

წლევანდელი ევროსეზონი საქართველოსთვის წარუმატებელი იყო - ვერც სანაკრებო დონეზე გავიხარეთ და თავი ვერც კლუბებმა გამოიჩინეს. ამის და წინა წლებში ახალგაზრდულ ლიგაში ჩვენი კლუბების გამოსვლის ფონზე მოულოდნელი იყო, "საბურთალომ" "ბურსასფორი" პირველ მატჩში ცოტნე კაპანაძის გოლით 1:0 რომ დაამარცხა. ცხადია, ამან გამარჯვების იმედი გააღვიძა და გულშემატკივარი საპასუხო შეხვედრას დიდი იმედით ელოდა...

მაგრამ თამაში "საბურთალოსთვის" საშინლად დაიწყო - პირველივე წუთზე მასპინძლებმა მარჯვენა ფლანგზე ბურთი დაკარგეს, კარტალ ილმაზი საბურთალოელებს იოლად გასცდა, საჯარიმოში შეიჭრა და ანგარიში გახსნა.

მასპინძლები სწრაფმა გოლმა ძალიან დააბნია. სტუმრები კი უფრო კონცენტრირებულები და შემართულები ჩანდნენ. გავიდა კიდევ 7 წუთი, გოქალფ კაია მეკარე გოგა ნასყიდაშვილთან პირისპირ აღმოჩნდა და კონტაქტისას წაიქცა. მოლდოველმა არბიტრმა პენალტის ნიშნულისკენ გაიშვირა ხელი. ეს ჰგავდა განაჩენს, რომელიც თურქებმა, საბედნიეროდ, ვერ აღასრულეს - "საბურთალოს" მეკარემ დაზარალებულის მიერვე შესრულებული 11-მეტრიანი მოიგერია და გუნდს გამარჯვების შანსი შეუნარჩუნა...

პირველ ტაიმში საბურთალოელთა მოქმედებაში თავდაჯერება და აგრესია ნაკლებად იყო, შეტევებსაც იშვიათად ამწვავებდნენ. მაგრამ იყო გამონათებებიც: მე-17 წუთზე, ლუკა ლაკვეხელიანის კუთხურის შემდეგ, ანდრია ფურცელაძემ ბურთი თავით გაგზავნა კარში, მაგრამ მეკარემ აუღო.

33-ე წუთზე კი ჯარიმა გიორგი კოხრეიძემ შეასრულა და მეკარე მეჰმეთ დადაკდენიზმა ბურთი "ცხრიანიდან" მოხსნა.

ტაიმის ბოლო წუთზე საბურთალოელები ისევ გადარჩნენ, როცა სახიფათო მდგომარეობაში მყოფმა ბერკ აკგიონულმა კარს ააცილა.

მეორე ტაიმში ყველაფერი ისევ რთულად დაიწყო - "საბურთალოს" სწრაფი შეტევების ორგანიზება კვლავ უჭირდა. იყო ეპიზოდი, როცა ისევ გოქალფ კაიამ შემოგვიტია და კვლავ მეკარემ გადაგვარჩინა. 

საბურთალო
1
ბურსასფორი
1
პირველი მატჩი 1:0
 
18.10. თბილისი. დავით პეტრიაშვილი
 
გოლები: 0:1 ილმაზი (1), 1:1 ტაბატაძე (85. ლაკვეხელიანის პასით)
გამოუყენებელი პენალტი: კაია (8. ბურსასფორი)
 
საბურთალო (4-2-3-1): ნასყიდაშვილი - მალი, ხუბაშვილი, ჯინჯოლავა, ლაკვეხელიანი - ფურცელაძე, ჩოთალაშვილი - კაპანაძე (62. ტაბატაძე), ივანიაძე (70. მათოზაშვილი), გულიაშვილი (90+1. ბუიღლიშვილი) - კოხრეიძე.
სათადარიგოები: მეგრელიშვილი, ჯავახიშვილი, ნონიკაშვილი, ტოკლიკიშვილი
მწვრთნელი: რევაზ გოცირიძე
 
ბურსასფორი (4-2-3-1): დადაკდენიზი - ცოკცალისი, ილდირიმი, სევიცი, ოზქანი - კესქინი, აკგიონული - კაპასაკი, სეფილი, ილმაზი (72. იასაკი) - კაია.
სათადარიგოები: აიდინი, გონულუ, კალა, ტუნჩაი, კაიარი, აკუსი
მწვრთნელი: მუზაფერ ქაბადაი
 
გაფრთხილებები: ნასყიდაშვილი (7), კესკინი (77), ფურცელაძე (89), მალი (90+5) 
არბიტრი: დუმიტრუ მუნტეანი (მოლდოვა)

თუმცა "საბურთალო" ნელ-ნელა გამოცოცხლდა, მოედნის ცენტრში უფრო აქტიურად ათამაშდა, ბურთის გაკონტროლება მოახერხა და მეტოქეს სივრცეები შეუზღუდა. რაც მთავარია, ეპიზოდურად მაინც მოხერხდა ლამაზი კომბინაციების გათამაშება და მეტოქის შეწუხება.

ერთ ეპიზოდში გიორგი ივანიაძემ შეძლო თამაშის გამწვავება, როცა სამ მცველში ეფექტურად გაძვრა, მაგრამ სუსტად დაარტყა და მეკარეს ვერ აჯობა. 57-ე წუთზე სტუმრებს უკვე ლაკვეხელიანმა შეუტია და შორეული დარტყმის შემდეგ ბურთი ოდნავ ააცილა კარს. მან იგივე 71-ე წუთზეც გაიმეორა და საერთოდ, მოედანზე ის ერთ-ერთი საუკეთესო იყო.

უშედეგოდ დასრულდა კოხრეიძის დარტყმაც. 79-ე წუთზე ფურცელაძემ პატარა შედევრი შემოგვთავაზა - სამი მცველი ლამაზი მოძრაობებით ჩამოიტოვა, თუმცა კარის წინ დარჩენილმა მიზანს ვერ მიაღწია.

თამაში დასასრულს უახლოვდებოდა, როცა ლაკვეხელიანმა შეტევა მარცხენა ფლანგზე განავითარა, გვერდი აუარა მეტოქეს და ბურთი საჯარიმოში ჩაჰკიდა, სადაც შეცვლაზე შესულმა იური ტაბატაძემ ახლო მანძილიდან ის გოლი გაიტანა, რომელსაც გულშემატკივარი ასე ელოდა - 1:1.

"საბურთალო" უეფას ახალგაზრდული ლიგის მეორე ეტაპზე გავიდა, რაც ამ ტურნირზე ქართულმა გუნდებმა პირველად შეძლო.

რევაზ გოცირიძე, "საბურთალოს" მთავარი მწვრთნელი: "ყველას გილოცავთ ამ გამარჯვებას. ეს არ იყო მხოლოდ "საბურთალოს" წარმატება, ეს ქართული ფეხბურთის გამარჯვებაა. დღეს ჩვენმა ბიჭებმა მოახერხეს და ურთულესი დასაწყისის მიუხედავად, შეხვედრა სასურველი ანგარიშით დაასრულეს. ამისთვის მათ მადლობას ვუხდი. შემდეგ წრეში სერბულ "ბროდარაცს" შევხვდებით. ამ მატჩისთვის მზადებას ხვალიდანვე დავიწყებთ".

* * * 

მეორე წრეში "საბურთალოს" მეტოქე იქნება სერბული "ბროდარაცი", რომელმაც შინ 1:1-ის შემდეგ გასვლაზე 1:0 მოუგო ჰაიფას "მაკაბის". ერთადერთი გოლი მე-20 წუთზე მატია ბაბოვიჩმა გაიტანა.

მატჩები 1 და 22 ნოემბერს გაიმართება. "საბურთალო" ჯერ გასვლაზე, ნეობელგრადში ითამაშებს, შემდეგ კი მეტოქეს "დავით პეტრიაშვილზე" უმასპინძლებს.

უეფას ახალგაზრდული ლიგა. პირველი საკვალიფიკაციო ეტაპი. საპასუხო მატჩი

(იბეჭდება მცირე ცვლილებით)
ყოველდღიური სპორტული გაზეთი "ლელო" 

2733
მკითხველის კომენტარები / 0 /
მსგავსი ამბები
რუბრიკის სხვა სიახლეები