U19. საბურთალო VS ბურსასფორი - ეს მთელი საქართველოს გამარჯვება იქნება

დღეს, 18 ოქტომბერს, "საბურთალოს" 19-წლამდელები თურქულ "ბურსასფორს" ახალგაზრდული ჩემპიონთა ლიგის განმეორებით შეხვედრაში უმასპინძლებენ.

პირველ მატჩში თურქეთში ცოტნე კაპანაძის გოლით "საბურთალომ" 1:0 გაიმარჯვა. დღეს მატჩი "დავით პეტრიაშვილი არენაზე" 20:00 საათზე დაიწყება.

თურქები გუშინ 50 ფანთან ერთად ჩამოფრინდნენ. "ბურსა" სასტუმრო "გოლდენ პალასში" დაბინავდა, ხოლო საღამოს გუნდმა ტექნიკურ ცენტრ "ბასაზე" ივარჯიშა.

"საბურთალო" შეხვედრას ოპტიმალური შემადგენლობით ხვდება. გუშინ გუნდმა "დავით პეტრიაშვილზე" მსუბუქად ივარჯიშა, რის შემდეგაც "ლელომ" "საბურთალოს" 19-წლამდელთა მთავარ მწვრთნელ რევაზ გოცირიძესთან ინტერვიუ ჩაწერა...

- "საბურთალო" "ბურსასფორის" დამარცხებას თბილისშიც შეეცდება. რას ფიქრობთ, საამისოდ მზად ხართ?

- ოთხი დღეა, საგანგებოდ ვემზადებით და შეკრებაზე ვართ. დანარჩენს შეხვედრა გამოაჩენს. რაც მთავარია, ოპტიმალური შემადგენლობა გვეყოლება. საბედნიეროდ, ყველა ჯანმრთელად არის და თამაშისთვის ემზადება.

- პირველი შეხვედრის მოგება სასიხარულო იყო, მაგრამ წინ მეორე მატჩია, რომლისთვისაც თურქები განსაკუთრებულად ემზადებიან და წაგების მიუხედავად იმედოვნებენ, რომ შემდეგ ეტაპზე მაინც მოხვდებიან.
- ეს დაპირისპირება ორმატჩიანია და ცხადია, ჯერ შემდეგ ეტაპზე არ გავსულვართ. მაგრამ ბიჭები საბრძოლო განწყობაზე და მოტივირებულები არიან - შევეცდებით, "ბურსასფორი" დავამარცხოთ და შემდეგ ეტაპზე ჩვენ გავიდეთ.

- მეტოქეზე რას იტყვით?
- "ბურსასფორი" ძალიან კარგი გუნდია, რაზეც ეს ფაქტიც მეტყველებს - როგორც შევიტყვეთ, ამ გუნდს სახლში ზედიზედ 24 მატჩი არ ჰქონდა წაგებული. მაგრამ ყველა ვაცნობიერებთ, რომ პირველი მატჩის მოგება დამშვიდების უფლებას არ გვაძლევს და განმეორებითი თამაში უფრო რთული იქნება.

- რას ფიქრობთ, პირველ შეხვედრაში მეტოქემ სათანადოდ არ დაგაფასათ?
- არა მგონია, რომ შეუფასებლობის გამო მოვიგეთ. თურქები პირველივე წუთებიდან სერიოზულად იყვნენ განწყობილები, დიდი მოტივაციაც ეტყობოდათ და მთელი მონდომებით თამაშობდნენ. მიმაჩნია, რომ ჩვენმა სათამაშო სტრატეგიამ გაამართლა და დამსახურებულად გავიმარჯვეთ.

- გუნდის განაცხადში მთავარი "საბურთალოს" გუნდის წევრები, ლაკვეხელიანი, მალი და გიორგი კოხრეიძე იქნებიან. ასეთ შეხვედრაში კი გამოცდილება ბევრს ნიშნავს.
- მათ არა მხოლოდ უმაღლეს ლიგაში მიღებული გამოცდილება, არამედ, ევროშესარჩევ ციკლსა და 19-წლამდელთა ევროპის ჩემპიონატზე უთამაშიათ. ამ ბიჭების გამოცდილება პირველ შეხვედრაში გამოგვადგა და ახლაც მათი დიდი იმედი მაქვს, ისევე როგორც ყველა დანარჩენის.

- გაქვთ იმედი, რომ სტადიონი შეივსება?
- რა თქმა უნდა, რადგან პირველი შეხვედრა მოვიგეთ. გულშემატკივრებს მოვუწოდებ, მოვიდნენ და ბიჭები გაამხნევონ - ამ პატარა ბიჭებს ხალხის თანადგომა ძალიან სჭირდებათ. ეს მხოლოდ "საბურთალოს" თამაში არ არის, საქმე ქართული ფეხბურთის პრესტიჟს ეხება. ხვალ თუ მოვიგებთ, და იმედია ასეც მოხდება, ეს ჩვენი ფეხბურთის სახელზე იმოქმედებს და მთელი საქართველოს გამარჯვება იქნება.

* * *

დაბოლოს - ფეხბურთი დღევანდელ მსოფლიოში ქვეყნისა და მისი ღირსების გამოჩენის ერთ-ერთი საშუალებაა. 2013/14 წლების ევროსეზონში საჩხერის "ჩიხურამ" სენსაცია მოახდინა, ევროპალიგიდან ბევრად უფრო მდიდარი "ბურსასფორი" გააგდო და ამით საკუთარი ისტორიაც გაილამაზა და ქართული ფეხბურთისაც. დღეს ამ გუნდის ახალგაზრდული შემადგენლობა საკუთარი კლუბისა და ქვეყნის სახელისთვის გამწარებული რომ იომებს, ამაზე ორი აზრი არ არის. ამ ბრძოლაში კი "საბურთალოს" მართლაც სჭირდება ხალხის თანადგომა.

ყოველდღიური სპორტული გაზეთი "ლელო"

1417
მკითხველის კომენტარები / 0 /
მსგავსი ამბები
რუბრიკის სხვა სიახლეები