U19. საქართველო-ანდორა 1:1 - მეტი რაღა უნდა დაგვემართოს?!

ფარერებთან ახალგაზრდული ნაკრების "გმირობის" ამბავი ჯერ არ გაციებულა და აგერ, კიდევ ერთი სირცხვილი - საქართველოს 19-წლამდელთა ნაკრებმა ანდორას ვერ მოუგო.

ევროპის 19-წლამდელთა ჩემპიონატის შესარჩევი ტურნირის მეორე ტურში საქართველოს ნაკრებს მხოლოდ მოგება აწყობდა და უპირატესობასაც ფლობდა. მაგრამ ანდორელთა კარის აღება მხოლოდ 43-ე წუთზე მოხერხდა - ფლანგური გადაცემის შემდეგ საჯარიმოში ზურიკო დავითაშვილთან მცველმა უხეშად ითამაშა და არბიტრმა პენალტი დანიშნა. მეკარემ ნიკა ნინუას დარტყმის მიმართულება გამოიცნო, ბურთს თითებითაც შესწვდა, მაგრამ გუნდი ვერ გადაარჩინა - 1:0.

45-ე წუთზე, გიორგი ყიფიანის გუნდი 10 კაცით დარჩა - მეორე ყვითელი ბარათის გამო, მოედნიდან ბექა დარცმელია გააძევეს (შეტევა შეაჩერა).

ამის მიუხედავად, საქართველო შესვენების შემდეგაც უტევდა, კარგი მომენტები შექმნეს ბექა ქავთარაძემ, ხვიჩა კვარაცხელიამ და ზურაბ დავითაშვილმა, თუმცა ჩვენს ფეხბურთელებს ბოლო მომენტში სიზუსტე აკლდებოდათ.

86-ე წუთზე ჩვენებმა ბურთი საკუთარი საჯარიმოდან ვერ გამოიტანეს და იქვე ალბერტ გრაუ სამპერმა ძლიერად დასცხო - 1:1.

რა მიზეზებიც უნდა დავასახელოთ, ამ ფრეს გამართლება არ აქვს - ეს სამარცხვინო შედეგია, რომელმაც საქართველო ჯგუფის აუტსაიდერად გადააქცია.

მეორე შეხვედრაში საფრანგეთმა მასპინძელი ბოსნია 2:1 დაამარცხა და რეალურად, ჩვენს გუნდს ელიტრაუნდში მოხვედრის მხოლოდ თეორიული შანსი დარჩა. შეგახსენებთ, რომ პირველ ტურში საქართველო მინიტურნირის მასპინძელ ბოსნიასთან 0:1 დამარცხდა, მესამეში კი საფრანგეთს შევხვდებით, რომელიც 6 ქულით ჯგუფის ლიდერია.

ასე რომ, ჩვენმა გუნდმა ახლა საფრანგეთის ნაკრები უნდა დაამარცხოს, პარალელურად კი ანდორამ მასპინძელ ბოსნიას მოუგოს. ასეთი ზღაპრების გჯერათ?

U19. ევროპის ჩემპიონატი. საკვალიფიკაციო ეტაპი
საქართველო-ანდორა 1:1
გოლები: 1:0 ნინუა (43-პენ), 1:1 სამპერი (86)
საქართველო: გუგეშაშვილი, მალი, ასათიანი (90. ინჯგია), ჯინჯოლავა, ხარაბაძე, ქოჩორაშვილი (69. ანდრონიკაშვილი), ნინუა, დავითაშვილი, კვარაცხელია, დარცმელია, ქავთარაძე (61. ოზბეთელაშვილი).
გაფრთხილება: დარცმელია (16), ვალესი (44), და სილვა (64), ბრიალი (81), ვალერო (76), კაბანიესი (90)
გაძევება: დარცმელია (45), კაბანიესი (90+4).

ყოველდღიური სპორტული გაზეთი "ლელო"
958
მკითხველის კომენტარები / 0 /
მსგავსი ამბები
რუბრიკის სხვა სიახლეები
;