U20. ერთი პატარა სასწაული - 'ჩვენ ქართველები ვართ და მიზნის მისაღწევად ყველაფერს გავაკეთებთ'

საქართველო-იაპონია 24:22

საქართველო: (15-9) მამუკაშვილი, თაფლაძე, წიკლაური, ლომიძე, ძაგნიძე (მარჯანიშვილი 54), აბჟანდაძე, აფრასიძე; (1-8) გოგიჩაშვილი (ნუცუბიძე 67), პაპიძე (ზამთარაძე 68), ჯაფარიძე (აზარიაშვილი 51), საღინაძე, ჯაიანი (გელაშვილი 66), ჯალაღონია, მამამთარვიშვილი (გიგოლაშვილი 68), მაჩალაძე.
4ლ: ჯაფარიძე, თაფლაძე (2), აფრასიძე. 2გ: აფრასიძე
სინბინი: გოგიჩაშვილი, მამამთავრიშვილი.

იაპონია: (15-9) იამასავა, ვაილეა, ვაკალაჰი, მორი (კოდომი 74), ფიფიტა, მამადა, ფუჯივარა. (1-8) იშიდა (იამადა 46), არაი (ტაგუჩი 71), ცუკაიამა (ოიამა 57), შიმოკავა, ჰაშიმოტო, იამამოტო (ფუკუი 56), ოკაიამა, მოალა.
3ლ: იამასავა, ვაილეა, იშიდა. 2გ, ს: მორი

"ჩვენ ქართველები ვართ და მიზნის მისაღწევად ყველაფერს გავაკეთებთ" - ეს სიტყვები მატჩის შემდეგ საქართველოს ახალგაზრდული ნაკრების ცხრა ნომერმა გელა აფრასიძემ ფრანგ ჟურნალისტს უთხრა. "უმცროსმა ბორჯღალოსნებმა" მართლაც ყველაფერი გააკეთეს და კიდევ ერთი პატარა სასწაულის მომსწრე გაგვხადეს.

საქართველოს ახალგაზრდულმა ნაკრებმა იაპონიასთან დაპირისპირებაში თითქმის წაგებული მატჩი შემოაბრუნა და 24:22 გაიმარჯვა. შედეგად, ჩვენმა გუნდმა ელიტაში ადგილი შეინარჩუნა და მსოფლიოს 20-წლამდელთა ჩემპიონატზე მომავალ წელსაც ითამაშებს. მეტოქეები უკვე ცნობილია. ესენია: შოტლანდია, რომელსაც მე-9 ადგილისთვის მატჩში დავუპირისპირდებით, ასევე ახალი ზელანდია და სამხრეთი აფრიკა.

საგულისხმოა, რომ ჩვენმა ნაკრებმა მსოფლიოს ახალგაზრდულ ჩემპიონატზე ასპარეზობის სამწლიან ისტორიაში ორი თამაში ერთ ტურნირზე პირველად მოიგო და მესამის მოგების შანსიც გვაქვს. როგორც უკვე ვთქვით, მომდევნო მეტოქე შოტლანდიაა. დასაკარგავი აღარაფერია და ჩვენს ბიჭებს მშვიდად, ზედმეტი ნერვიულობის გარეშე შეეძლებათ მეტოქეს თავისი ძალა ანახვონ.

ახლა მოდი, თამაშზეც ვთქვათ. მატჩი ორივე გუნდმა ფრთხილად დაიწყო. იაპონელები ფეხით ცდილობდნენ მოედნის ჩვენს ნახევარზე გადმოსვლას. ქართველი მორაგბეებიც ბურთს უკან ფეხით უბრუნებდნენ, რაც გამოჩნდა, რომ შეცდომა იყო. მე-7 წუთზე იაპონელებმა სახიფათოდ შემოგვიტიეს. მორკინალები წინ ჯიქურ მოიწევდნენ და ლელო ფულბეკმა კიოჰეი იამასავამ გაგვიტანა. გარდასახვა შუამარბმა იოტო მორიმ მიითვალა - 7:0.

საპასუხო ლელოს გასატანად ხუთი წუთი დაგვჭირდა. "უმცროსმა ბორჯღალოსნებმა" თექვსმეტფაზიანი შეტევა განახორციელეს და ბოლოს მეტოქის დაცვის "კედელი" შერკინების ბურჯმა ლუკა ჯაფარიძემ "გაანგრია". გელა აფრასიძემ გარდასახვიდან ანგარიში გაათანაბრა - 7:7.

მალე იაპონელები საჯარიმო დარტყმით დაწინაურდნენ. 31-ე წუთზე კი, როცა კაცნაკლულნი ვიყავით, ხანგრძლივი იერიში ლელოთი დაასრულეს - 17:7. პასუხის გასაცემად ისევ ხუთი წუთი დაგვჭირდა.

მეტოქის ნახევარზე შერკინება მოვიგეთ. ბურთი თორნიკე ჯალაღონიამ აიტაცა და აფრასიძეს გადააწოდა, რომელმაც 22-მეტრიან ზონაში შეაღწია და იერიშში იქვე მიმყოლი დემე თაფლაძე ჩართო. ქართველმა გარემარბმა ცრუ მოძრაობით სამი მოწინააღმდეგე დატოვა უსაქმოდ და ლელოში შეაღწია. აფრასიძემ ვერ გარდასახა - 12:17. ასე დასრულდა პირველი ტაიმი.

შესვენების შემდეგ სათამაშო უპირატესობა საქართველოს ნაკრებმა იგდო ხელთ. იაპონელები ჩვენს 22-მეტრიან ზონაში მხოლოდ ერთხელ შემოვიდნენ 42-ე წუთზე, როცა კონტრშეტევაზე დაგვიჭირეს და კიდევ ერთი ლელო გაგვიტანეს - 22:12.

ათქულიანი ჩამორჩენის აღმოსაფხვრელად დრო საკმაოდ გვქონდა. "უმცროს ბორჯღალოსნებს" ცდა არ დაუკლიათ, ძალ-ღონე არ დაუშურებიათ, მაგრამ მეტოქის გატეხა მხოლოდ დასკვნით ათ წუთში შეძლეს.

71-ე წუთზე საქართველოს ნაკრების მორიგი ხანგრძლივი იერიში მარჯვენა ფრთაზე ვითარდებოდა. მერე აფრასიძემ მიმართულება შეცვალა და მარცხნივ გრძელ ფრთაზე ჩაათამაშა ბურთი. კიდესთან ახლოს მას გარემარბი დემე თაფლაძე დაუფლა. თითქოს გამოუვალი მდგომარეობა იყო, მაგრამ მან ცრუ მოძრაობით შეძლო მეტოქის მოტყუება და სიღრმეში შეუტია. მის შეჩერებას სამი იაპონელი ამაოდ ცდილობდა. თაფლაძის ლელო აფრასიძემ გარდასახა და ანგარიშში სხვაობა სამ ქულამდე შემცირდა - 19:22.

ამ შეტევას მეტოქის ცხრა ნომერი შინობი ფუჯივარა "შეეწირა". ლელოს გატანის მომენტში მან მაღალი ბოჭვით სცადა თაფლაძის შეჩერება, რისთვისაც არბიტრმა სინბინში გაუშვა.

თამაშის დასრულებას სამი წუთი აკლდა. "უმცროსი ბორჯღალოსნები" მეტოქის 22-მეტრიანი ზონის მისადგომებთან უტევდნენ, როცა ერთ ეპიზოდში მგეზავმა თედო აბჟანდაძემ ხაზი გაჭრა, გზად ორი მეტოქე ჩამოიცილა, მაგრამ მესამემ ლელოდან ხუთ მეტრში შებოჭა.

აბჟანდაძემ მოასწრო და ბურთი შეცვლაზე შესულ მეორეხაზელ ლუკა გელაშვილს ამოუგდო. მან ოდნავ წინ წაიწია, მაგრამ იქვე შებოჭეს. წარმოქმნილი რაკიდან ბურთი აფრასიძემ აიტაცა. მოძრაობით აჩვენა, რომ მარჯვნივ, მოკლე ფრთაზე აპირებდა გადაცემას, მაგრამ იქვე წარმოქმნილ დაუცველ სივრცეში შეუტია და გამარჯვების ლელო გაიტანა - 24:22.

მსოფლიოს ახალგაზრდულ ჩემპიონატზე ბოლო მატჩს საქართველოს ნაკრები 17 ივნისს, შოტლანდიის ნაკრების წინააღმდეგ ბეზიეში გამართავს. თამაში თბილისის დროით 15 საათსა და 30 წუთზე დაიწყება.

მსოფლიოს ჩემპიონატი
ნახევარფინალები

IX ადგილისთვის
ირლანდია-შოტლანდია 29:45

V ადგილისთვის
ავსტრალია-იტალია 44:15
არგენტინა-უელსი 39:15

I ადგილისთვის
საფრანგეთი-ახ. ზელანდია 16:7
სამ. აფრიკა-ინგლისი 31:32

17 ივნისი
XI ადგილისთვის
ირლანდია-იაპონია

IX ადგილისთვის
საქართველო-შოტლანდია

VII ადგილისთვის
იტალია-უელსი

V ადგილისთვის
ავსტრალია-არგენტინა

III ადგილისთვის
სამ. აფრიკა-ახ. ზელანდია

ფინალი
საფრანგეთი-ინგლისი

ყოველდღიური სპორტული გაზეთი "ლელო"
615
მკითხველის კომენტარები / 0 /
მსგავსი ამბები
რუბრიკის სხვა სიახლეები