U20. მსოფლიო ჩემპიონატი: ათი ცვლილება სკოტებთან მატჩისთვის 

დღეს საქართველოს ახალგაზრდული ნაკრები მსოფლიო რაგბის 20-წლამდელთა ჩემპიონატის ჯგუფური ეტაპის ბოლო შეხვედრას შოტლანდიასთან გამართავს. 

ამ მატჩში გამარჯვებული გუნდი C ჯგუფშო მესამე ადგილს დაიკავებს. შეგახსენებთ, რომ სამი ჯგუფის ორი საუკეთესო მესამეადგილოსანი მეხუთე-მერვე ადგილებისთვის განაგრძობს ბრძოლას, ხოლო უარესი მესამეადგილოსანი მეცხრე-მეთორმეტე ადგილებისთვის ითამაშებს და ელიტაში ადგილის შენარჩუნებას ეცდება

„უმცროსი ბორჯღალოსნების“ მწვრთნელთა შტაბმა, წინა მატჩისგან განსხვავებით, 10 ცვლილება განახორციელა. შერკინების პირველ ხაზში ადგილი შეინარჩუნა კვაჭმა ვანო კარკაძემ. თუმცა შეიცვალა ორივე ბურჯი. ძირითად შემადგენლობაში დაბრუნდა ნიკა ღვალაძე, ხოლო ზაურ თევდორაშვილი სასტარტოში პირველადაა.

შეიცვალა ორივე მეორეხაზელი და ახალ ზელანდიასთან მატჩის მსგავსად, ძირითადში ლუკა გელაშვილი და ვახტანგ ჯინჭარაძე ითამაშებენ. მეორე ხაზიდან შერკინების შემკვრელად გადაინაცვლა იოანე იაშაღაშვილმა. ბექა ყორიაული კი ამჯერად, ფლანკერი იქნება, ხოლო მეორე ფლანკერად პაატა ბურჭულაძე დადგება, რომელიც ძირითად შემადგენლობაში პირველადაა.

შეიცვალა როგორც ცხრა ნომერი, ასევე მგეზავიც. ამ პოზიციებზე პირველად ითამაშებენ გიორგი მარგალიტაძე და სანდრო მარგიანი. ფულბეკის პოზიციაზე თადარიგიდან დაწინაურდა დაჩი პაპუნაშვილი. შუამარბად იწყებს თამაშს ირაკლი სიმსივე, რომელიც გუნდის კაპიტანს, დემურ თაფლაძეს შეუწყვილდება. ფრთაზე ბრუნდება კოტე მარჯანიშვილი, ხოლო მეორე ფრთაზე ოთარ ლაშხი იქნება, რომელმაც აფრიკელებს ორი ლელო გაუტანა.
ზურა ამონაშვილი, საქართველოს ახალგაზრდული ნაკრების მწვრთნელი: 

„ტურნირის ფორმატიდან გამომდინარე, ძალების გადანაწილება უმნიშვნელოვანესია და შემადგენლობაში ცვლილებები სწორედ ამითაა განპირობებული. როტაცია თავიდანვე დაგეგმილი გვქონდა. ჩვენ კარგად ვიცით ამ ბიჭების შესაძლებლობები და შოტლანდიასთან მატჩში მხოლოდ მოსაგებად ვიბრძოლებთ“.
შეგახსენებთ, რომ საქართველოსა და შოტლანდიის ახალგაზრდული ნაკრებების მატჩი 17 საათსა და 30 წუთზე დაიწყება. 

საქართველოს ნაკრები
15. დაჩი პაპუნაშვილი, 14. ოთარ ლაშხი, 13. დემე თაფლაძე, 12. ირაკლი სიმსივე, 11. კოტე მარჯანიშვილი, 10. სანდრო მარგიანი, 9. გიორგი მარგალიტაძე 1. ნიკა ღვალაძე, 2. ვანო კარკაძე, 3. ზაურ თევდორაშვილი, 4. ლუკა გელაშვილი, 5. ვახტანგ ჯინჭარაძე, 6. პაატა ბურჭულაძე, 7. ბექა ყორიაული, 8. იოანე იაშაღაშვილი
16. ლუკა ნიორაძე, 17. ლუკა აზარიაშვილი, 18. გია ხარაიშვილი, 19. ტატო გვიმრაძე, 20. კობა კოლოტაური, 21. მიხეილ ალანია, 22. თედო აბჟანდაძე, 23. თემურ ჭიჭინაძე, 24. გივი ცინცაძე, 25. ლაშა ლომიძე, 26. იოსებ გუშარაშვილი, 27. ლუკა ჭელიძე 

ყოველდღიური სპორტული გაზეთი "ლელო"
412
მკითხველის კომენტარები / 0 /
მსგავსი ამბები
რუბრიკის სხვა სიახლეები
;