U20. უმცროსი 'ბორჯღალოსნების' ღია ვარჯიში არგენტინამდე 

საქართველოს ახალგაზრდული ნაკრები 4-22 ივნისს არგენტინაში გასამართი მსოფლიო რაგბის 20-წლამდელთა ჩემპიონატისთვის მზადებას განაგრძობს.

„უმცროსმა ბორჯღალოსნებმა“ შევარდენის სანაკრებო ბაზაზე ქომაგებისთვის ბოლო ღია ვარჯიში გამართეს.

გუნდი დასკვნით შეკრებაზე ორი კვირის წინ შევიდა და მწვრთნელები უმთავრესად სათამაშო ტაქტიკისა და ელემენტების დახვეწაზე მუშაობენ.

ჯერჯერობით შეკრებაზე არ არიან ფრანგულ კლუბებში მოთამაშე ლეგიონერები. ისინი უმცროს ბორჯღალოსნებს ეტაპობრივად, მომავალი კვირიდან შეუერთდებიან. ესენია: გიორგი ახალაძე (მასი), გია ხარაიშვილი (რასინგ 92), ზაურ თევდორაშვილი (ანგულემი), ლუკა ჭელიძე (ტულონი), ლუკა აზარიაშვილი (მონპელიე), ვანო კარკაძე (ორიაკი). ყველა მათგანი პირველხაზელია. 

არგენტინაში ჩვენი გუნდი C ჯგუფში ახალი ზელანდიის, სამხრეთ აფრიკისა და შოტლანდიის ნაკრებებთან ითამაშებს. პირველი მატჩი 4 ივნისს, სანტაფეში ახალი ზელანდიის წინააღმდეგ საქართველოს დროით 20 საათზე დაიწყება, მომდევნო ორი შეხვედრა კი, როსარიოშია. „უმცროსი ბორჯღალოსნების“ მეტოქეები 8 ივნისს სამხრეთ აფრიკის, 12 ივნისს კი შოტლანდიის 20-წლამდელთა ნაკრები იქნებიან. ეს ორივე შეხვედრა 17 საათსა 30 წუთზე დაიწყება.

ჯგუფური ეტაპის დასრულების შემდეგ, დაკავებული ადგილის მიხედვით, საქართველოს 20-წლამდელთა ნაკრები 17 ივნისს ნახევარფინალურ, ხოლო 22 ივნისს ფინალურ შეხვედრას გამართავს.

ლადო კილასონია, საქართველოს ახალგაზრდული ნაკრების მწვრთნელი:

„2016 წლის 20-წლამდელთა მსოფლიოს ჩემპიონატზე პირველი თამაში ახალ ზელანდიასთან გავმართეთ და ჩვენთვის კარგადაა ცნობილი რა რთულ მატჩს უნდა ველოდოთ. ძალზედ ძლიერ გუნდებთან მოვხვდი ჯგუფში. თუმცა, მსოფლიოს ჩემპიონატზე იოლი ჯგუფები არ არსებობს.

ახალი ზელანდიის შემდეგ, სამხრეთ აფრიკას და შოტლანდიას ვეთამაშებით - პირველის ძალა ცოტა ხნის წინ სამხრეთაფრიკულ ტურნეზე გამოვცადეთ, მეორეს კი შარშანდელი მარცხისთვის რევანშის აღება უნდა.

ჩვენი მოსამზადებელი შეკრება დასასრულს უახლოვდება. ფიზიკური მომზადების დიდი ციკლი დაფარულია. ველოდებით მოთამაშეებს საფრანგეთიდან და შევეცდებითი სისტემების დახვეწას, რომლებითაც გვინდა შევუტიოთ და თავი დავიცვათ. ამ გუნდს აქვს დიდი პოტენციალი. მთავარია, სწორად გამოვიყენოთ ჩვენი ძლიერი მხარეები და, თუ ეს მოვახერხეთ, ძალიან კარგ შედეგს მივიღებთ“. 

საქართველოს ახალგაზრდული ნაკრები საწვრთნელ შეკრებაზე 21 მაისამდე დაჰყოფს და არგენტინაში 24 მაისს გაემგზავრება. 

საქართველოს ნაკრები

პირველი ხაზი: გეგი მურუსიძე (არმაზი), ლუკა ნიორაძე (ჯიქი), საბა კურატაშვილი (არმაზი), გიორგი მენაბდე (ბათუმი)
მეორე ხაზი: ვლადიმერ ჩაჩანიძე (ლელო), დავით გვიდიანი (არმაზი), ლუკა გელაშვილი (არმია), ვახტანგ ჯინჭარაძე (ჯიქი), ტატო გვიმრაძე (ხვამლი)
მესამე ხაზი: კობა კოლოტაური (ლელო), ბექა ყორიაული (ლელო), პაატა ბურჭულაძე (ხარები), მიხეილ ჩაჩავა (ჯიქი), საბა ჯღარკავა (ლელო), გიორგი ნოდია (ყოჩები), იოანე იაშაღაშვილი (არმაზი), იოსებ გუშარაშვილი (ყოჩები)
№9: მიხეილ ალანია (არმაზი), გიორგი მარგალიტაძე (ლელო), ლუკა მანტკავა (არმაზი), ფრიდონ წიკლაური (ხვამლი), იაგო ხაბულიანი (აია)
№10: თედო აბჟანდაძე (აია), რევაზ ხარაზიშვილი (იუნკერები), სანდრო მარგიანი (აკადემია), გივი ცინცაძე (არმაზი)
№12-13: ლაშა ლომიძე (აია), ირაკლი სიმსივე (აია), დემურ თაფლაძე (ლელო), ზაურ ლუტიძე (ხვამლი),
№11-14: ზურა ქავთარაძე (ხარები), ოთარ ლაშხი (ლელო,) კოტე მარჯანიშვილი (არმაზი), თემურ კოხოძე (აია), თეიმურაზ ჭიჭინაძე (ჯიქი), 
№15: გიორგი მიქანაძე (აკადემია), დავით გობეჯიშვილი (აია), დაჩი პაპუნაშვილი (არმია)

ყოველდღიური სპორტული გაზეთი "ლელო"
648
მკითხველის კომენტარები / 0 /
მსგავსი ამბები
რუბრიკის სხვა სიახლეები
;