[U21. საკვალიფიკაციო ეტაპი] გია ცეცაძე: ამ ორ მატჩში მაქსიმუმი გვინდა! ეს თაობა? საქართველოში უშრეტი პოტენციალია!..

U21. ევრო 2021. საკვალიფიკაციო ეტაპი. საქართველო-ლიხტენშტაინი. გორი. თენგიზ ბურჯანაძე. 19:00


5 სექტემბერს საქართველოს ახალგაზრდული ნაკრები ევროპის 2021 წლის ჩემპიონატის შესარჩევ ციკლს იწყებს. გია ცეცაძის გუნდი გორში, თენგიზ ბურჯანაძის სახელობის სტადიონზე ლიხტენშტაინს უმასპინძლებს. მატჩი 19 საათზე დაიწყება.

გუნდმა მატჩისწინა ბოლო ვარჯიში ტექნიკურ ცენტრ "ბასაზე" გამართა. ცეცაძემ ასეთი შემადგენლობა გამოიძახა:

მეკარეები - ლუკა გუგეშაშვილი (გრანადა, ესპანეთი), გიორგი მამარდაშვილი (რუსთავი), გიორგი ჩოჩიშვილი (დილა);

მცველები - ნიკა მალი, ლუკა ლაკვეხელიანი (ორივე - საბურთალო), ალექსანდრე ანდრონიკაშვილი (ლოკომოტივი თბ), ილია ბერიაშვილი (თელავი), ლუკა ლოჩოშვილი (ჟილინა, სლოვაკეთი), დავით კობოური (დინამო თბ), ლაშა უგრეხელიძე (სიონი);

ნახევარმცველები - დავით სამურკასოვი, თორნიკე ძებნიაური (ორივე - ლოკომოტივი), პაატა კიტეიშვილი, ლუკა სილაგაძე (ორივე - რუსთავი), ნიკა ნინუა (დინამო თბ), გიორგი კუცია (დილა), გიორგი არაბიძე (ადანასფორი, თურქეთი);

თავდამსხმელები - გიორგი კოხრეიძე (საბურთალო), რევაზ ინჯგია (ლოკომოტივი თბ), ბექა ქავთარაძე (რუსთავი), ნუგზარ სპანდერაშვილი (დილა), ირაკლი ბუღრიძე (ბეერსხოტი, ბელგია), ვატო არველაძე (კორონა, პოლონეთი).

შეგახსენებთ, რომ ჩვენს ჯგუფში ერთი მატჩი ზაფხულში ჩატარდა - ლიხტენშტაინმა შინ 1:0 მოუგო აზერბაიჯანს. შემდეგ მატჩს ჩვენი გუნდი 10 სექტემბერს ბაქოს "დალგა არენაზე" სწორედ აზერბაიჯანთან გამართავს. შეგახსენებთ, რომ საქართველოს ნაკრები მეორე შესარჩევ ჯგუფშია, სადაც საფრანგეთი, შვეიცარია და სლოვაკეთიც მოხვდნენ.

* * * 

ჩავწერეთ ინტერვიუ საქართველოს 21-წლამდელთა ნაკრების მწვრთნელ გია ცეცაძესთან. როგორი იმედებით იწყებს გუნდი ახალ შესარჩევ ციკლს, რა პოტენციალის თაობა გვყავს და რა მიზნები აქვს გუნდს... ცეცაძე ამ და სხვა საინტერესო თემებზე გველაპარაკა...

- ახალი შესარჩევი ციკლი იწყება. როგორ მიდის მზადების პროცესი?
- რამდენიმე დღეა, რაც გუნდი შეიკრიბა და ვმუშაობთ. მზადების პროცესით კმაყოფილი ვარ. მივყვებით დასახულ გეგმას, რომელიც წელიწადნახევარია გრძელდება და მიმაჩნია, რომ გუნდი პროგრესირებს - მთავარიც სწორედ ესაა.

- გუნდი ოპტიმალური შემადგენლობით შეიკრიბა?
- სამწუხაროდ, დანაკლისი გვაქვს - დაგვაკლდა ტრავმირებული გიორგი ქოჩორაშვილი. იმედია, ის ოქტომბერში შვეიცარიასთან შეხვედრისთვის მზად იქნება და დაგვეხმარება. ყველა დანარჩენი მწყობრშია, მზად არიან ბიჭები, ისე დაიცვან ქვეყნის სახელი, როგორც წესი და რიგია.

- პირველ ორ შეხვედრას ლიხტენშტაინსა და აზერბაიჯანთან ჩაატარებთ. ამ ორ მატჩში გუნდს რა მიზანი დაუსახეთ?
- კარგია, რომ შესარჩევ ციკლს აუტსაიდერ ლიხტენშტაინთან ვიწყებთ. თუმცა, ამ გუნდს პატივისცემით ვეკიდებით, რადგან აზერბაიჯანთან, როგორც იტყვიან, ბრჭყალები გამოაჩინა და 1:0 დაამარცხა. ვეცდებით, ამ ორ სასტარტო შეხვედრაში ქულათა მაქსიმუმი დავაგროვოთ და ქართველი გულშემატკივარი გავახაროთ. მოკლედ, 6 ქულა ორ თამაშში - ასეთია ჩვენი მიზანი.

- ეს, რაც შეეხება ამ ორ თამაშს, ზოგადად ჯგუფში რა მიზნები გაქვთ?
- რა მიზანი უნდა გვქონდეს? რა თქმა უნდა, ევროპის ჩემპიონატზე თამაში! აქედან გამომდინარე, ჯგუფში მინიმუმ მეორე ადგილზე გასვლა და პლეი-ოფში მოხვედრა მაინც უნდა შევძლოთ.

- ამ თაობის ნაკრებში რა პოტენციალს ხედავთ?
- მე მიმაჩნა, რომ საქართველოში ფეხბურთის უშრეტი პოტენციალია. ამით ახალს არაფერს ვამბობ, ეს არ არის ჩემი აღმოჩენა. ამ თაობაშიც ძალიან ნიჭიერი და კარგი მოთამაშეები არიან და მჯერა, ამ შესარჩევ ციკლში კარგი გუნდი ჩამოყალიბდება, ბიჭები თავს გამოიჩენენ, რაც თითოეული მათგანის წინსვლის და უკეთეს დონეზე თამაშის წინაპირობა გახდება.

- გორში სტადიონის შევსების იმედი თუ გაქვთ?
- იმედი მაქვს. ეს საქართველოს მეორე ნაკრებია და წესით, ხალხი უნდა მოვიდეს.

ყოველდღიური სპორტული გაზეთი "ლელო"
1266
მკითხველის კომენტარები / 0 /
მსგავსი ამბები
რუბრიკის სხვა სიახლეები
;