U21.საქართველოს ნაკრები აზერბაიჯანთან ექსპერიმენტული შემადგენლობით დაიწყებს

საქართველოს 21-წლამდელთა ნაკრები გია ცეცაძის ხელმძღვანელობით პირველად შეიკრიბება. სფფ-ის პრესსამსახურის ცნობით, ჩვენი ქვეყნის ახალგაზრდული ნაკრები 19-დან 24 იანვრამდე შეკრებას თურქეთში გაივლის, სადაც ერთ ამხანაგურ მატჩსაც გამართავს.

ცეცაძის დებიუტი 23 იანვარს, აზერბაიჯანის ნაკრებთან სპარინგში შედგება. მატჩი ქალაქ ლარაში გაიმართება. აღსანიშნავია ისიც, რომ ეს თამაში ფიფას კალენდარში გათვალისწინებული არ არის.

ცეცაძემ უკვე დაასახელა გაფართოებული შემადგენლობა, საიდანაც თურქულ შეკრებაზე წასაყვან ფეხბურთელებს შეარჩევს:

მეკარეები - ლევან შოვნაძე, გიორგი ჩოჩიშვილი, ოთო გოშაძე;

მცველები - რომან ჩაჩუა, ანრი ჭიჭინაძე, დავით კობოური, აკაკი შულაია, გურამ გიორბელიძე, ირაკლი კომახიძე, ლუკა გადრანი, გიორგი ქანთარია, ავთანდილ გუჯაბიძე, ანდრო გიორგაძე;

ნახევარმცველები - დავით სამურკასოვი, პაატა ღუდუშაური, გაბრიელ საღრიშვილი, ნიკოლოზ ბაშელეიშვილი, გიორგი ხარებაშვილი, ლევან მაჭარაშვილი, ლუკა ნადირაძე, ირაკლი რუხაძე;

თავდამსხმელები - ბექა მიქელთაძე, ვატო არველაძე, ბექა ქავთარაძე.

რა თქმა უნდა, რიგი მიზეზების გამო შემადგენლობა ოპტიმალური ვერ არის. ამის მიუხედავად, კონტინგენტი აშკარად საინტერესოა. ნაკრებში თავის გამოჩენის შანსი მიეცემათ არა მხოლოდ უმაღლესი, არამედ პირველი ლიგის ფეხბურთელებსაც.

სიმართლე ითქვას, ამ სანაკრებო სიაში მყოფი ფეხბურთელების თამაში ძალიან გვაინტერესებს და, თქმა რად უნდა, ის აინტერესებს ახალგაზრდული ნაკრების მწვრთნელს, რომელიც დიდი სანაკრებო გზის დასაწყისშია.

საქართველოს ჩემპიონატში მოთამაშე ფეხბურთელებთან ერთად, სიაში რამდენიმე საინტერესო ლეგიონერიცაა. მაგალითად, პრაღის "სლავიას" მეკარე გიორგი ჩოჩიშვილი. ასევე, გვინდა ვნახოთ ანდრო გიორგაძე, ვინც უკვე წარმატებით თამაშობს უკრაინის უმაღლეს ლიგაში.

ახლა ორიოდე სიტყვა ჩვენს მეტოქეზეც ვთქვათ. აზერბაიჯანის ახალგაზრდული ნაკრები ევროპის ჩემპიონატის შესარჩევი ციკლის V ჯგუფში ბოლო, მე-6 ადგილზეა და ჩამორჩება გერმანიას, ირლანდიას, ნორვეგიას, ისრაელსა და კოსოვოს.

ჩვენმა ახალგაზრდა მეზობლებმა 5 შეხვედრაში მხოლოდ 1 ქულა აიღეს.

ცეცაძის არ იყოს, ახალი მთავარი მწვრთნელი ჰყავს აზერბაიჯანის ნაკრებსაც - ეს გახლავთ დამოუკიდებელი აზერბაიჯანული ფეხბურთის ცოცხალი ლეგენდა რაშად სადიგოვი.

თავად არაერთხელ ვყოფილვარ აზერბაიჯანში და შეიძლება ითქვას, 35 წლის დამრიგებელი, ვინც ახლახან დაასრულა საფეხბურთო კარიერა, მართლაც უდიდესი ავტორიტეტით სარგებლობს ამ ქვეყნის საფეხბურთო საზოგადოებაში.

სადიგოვს სხვადასხვა დროს უთამაშია თურქულ სუპერლიგაში, ბოლო დროს კი "ყარაბაღის" ერთ-ერთი ლიდერი გახლდათ. მისი დანიშვნა ახალგაზრდულ ნაკრებში ეროვნული გუნდის დამრიგებლის, გურბან გურბანოვის ინიციატივით მოხდა.

სადიგოვმა უკვე შეარჩია ის ფეხბურთელები, რომლებიც საქართველოს ნაკრების წინააღმდეგ ითამაშებენ:

მეკარეები - კამრან იბრაჰიმოვი (ნეფთჩი), აბდულა სეიდაჰმადოვი (ზირა), აიდინ ბაირამოვი (მოიკი);

მცველები - ბაჰულ მუსტაფაზადე (სუმგაითი), სერკან ტაშკინი (კეშლია), ილიას ზაფარზადე (ქიაფაზი), ანტონ კრივოსტუკი (ნეფთჩი), ელვინ სარკაროვი (ნეფთჩი), ომარ ბუდულოვი (ნეფთჩი), ასკერ ჰუსეინოვი (ყარაბაღი), მურად გაიალი (კეშლია), იუსუფ ჯაფაროვი (ქიაფაზი);

ნახევარმცველები - ფამინ მურადბაილი (საბაილი), გისმეთ ალიევი (გაბალა), ეჰტიმარ შაჰვერდიევი (სუმგაითი), ოზან კოკჩუ (ვალვაიკი), კაიალ ნაჯაფოვი (სუმგაითი), ილკინ მურადოვი (ზირა), რაფაელ მაჰარამილი (კეშლია), მურად კაჩაევი (შახტარი), ჰაჯიაღა ჰაჯი (გაბალა), მურთუზ აბაკოვი (საბაილი), ისმაილ იბრაჰიმი (საბაილი);

თავდამსხმელები - ელჰურ ჯაფაროვი (ნეფთჩი), ფამილ ჯამალოვი (ყარაბაღი), ულვი ისკანდეროვი (სუმგაითი).

აქვე, აზერბაიჯანის მთავარ ნაკრებზეც ვთქვათ. გადაწყდა, რომ 30 იანვარს, საქართველოს ნაკრებთან ამხანაგურ მატჩამდე სამი დღით ადრე, გურბან გურბანოვის გაწვრთნილი გუნდი კიდევ ერთ სპარინგს ჩაატარებს და მისი მეტოქე მოლდოვის უპირველესი გუნდი იქნება.

ყოველდღიური სპორტული გაზეთი "ლელო"
1373
მკითხველის კომენტარები / 0 /
მსგავსი ამბები
რუბრიკის სხვა სიახლეები
;