U21. საქართველო-ლიტვა 1:0 - პირველი გამარჯვების შუქ-ჩრდილები [VIDEO]

საქართველოს ახალგაზრდულმა ნაკრებმა ევროპის ჩემპიონატის შესარჩევ ციკლში პირველი გამარჯვება მოიპოვა.

მთელი შეხვედრის განმავლობაში გია გეგუჩაძის გუნდის უპირატესობა აშკარა იყო. ლიტველებმა თავიდანვე მოგვცეს ბურთი და იმის საშუალება, რომ მთელი ძალები შეტევისკენ მიგვემართა.

ჩვენმა გუნდმა შეხვედრის მიმდინარეობისას არაერთი საგოლე მომენტი შექმნა, თუმცა მხოლოდ ერთი გაიტანა და ისიც - მოწინააღმდეგის დახმარებით. ლიტველმა ისე მოხდენილად დაარტყა საკუთარ კარში, ბევრ თავდამსხმელს შეშურდებოდა.

საქართველოს ნაკრების წისქვილზე აშკარად დაასხა წყალი ლუქსემბურგელი მსაჯის, ლორენ კოპრივას გადაწყვეტილებამ. ლიტველმა ფეხბურთელმა რატომღაც იუხეშა უბურთო აკაკი შულაიას წინააღმდეგ და მსაჯმა უყოყმანოდ უჩვენა წითელი ბარათი, რასაც სტუმართა დიდი უკმაყოფილება მოჰყვა.

U21 საქართველო
1
U21 ლიტვა
0

გოლები: 1:0 მატულევიჩუსი (56-საკ. კარში)
საქართველო (4-2-3-1): კუპატაძე - შულაია, მარგველაშვილი, ტაბიძე, ჩაბრაძე - მამუჩაშვილი, კიტეიშვილი - ზარანდია, არაბიძე (75. მიქელთაძე), ბერიძე (87. მოხევიშვილი) - ჭანტურია (82. არველაძე)
სათადარიგოები: გოშაძე, ჭიჭინაძე, კობოური, მაჭარაშვილი  
მწვრთნელი: გია გეგუჩაძე
ლიტვა (4-3-3): ადამონისი - ბარაუსკასი, სადაუსკასი (74. ოლბერკისი), სვეიკაუსკასი, შიმკუსი - მატულევიჩუსი, კლონიუნასი (86. მიცკევიჩუსი), იანკაუსკასი - ლასიცკასი, რუზგისი, რომანოვსკისი (61. სილკაიტისი)
სათადარიგოები: კრაპიკასი, ბანიულისი, იანონისი, კორსაკასი
მწვრთნელი: კარიტას ფალშასი
გაფრთხილება: სადაუსკასი (24), იანკაუსკასი (37), რომანოვსკისი (41), არაბიძე (45), ბერიძე (75), ბარაუსკასი (82), ოლბერკისი (84), მიქელთაძე (90)
გაძევება: ლასიცკასი (52. ლიტვა)
არბიტრი: ლორენ კოპრივა (ლუქსემბურგი).

რა თქმა უნდა, ბალტიისპირელებისა გვესმის, მაგრამ სათქმელია ისიც, რომ ლუქსემბურგელმა არბიტრმა ძალიან პედანტურად იმსაჯა. რთული გასახსენებელია, ერთ შეხვედრაში როდის ვიხილეთ ამდენი ყვითელი ბარათი. ამდენად, მას სრული უფლება ჰქონდა, უბურთო ფეხბურთელზე უხეში თამაში წითელ ბარათად შეეფასებინა.

ლიტვის ნაკრები თავიდანვე შეეგუა იმას, რომ ბურთი ძირითადად საქართველოს ნაკრებს უნდა ჰქონოდა და ამას ჩვენს გუნდს განსაკუთრებულ დამსახურებად ვერ ჩავუთვლით. სამაგიეროდ, დავინახეთ არაერთი ნაკლი, რომლის გამოსწორებაზე სამუშაო ძალიან ბევრია.

პირველი, ესაა სენი, რომელიც საქართველოს დიდ ნაკრებსაც სჭირს. ვგულისხმობთ საგოლე მომენტების გამოყენების ძალიან დაბალ პროცენტს. რა თქმა უნდა, უფრო სერიოზული მოწინააღმდეგე ამას არ გვაპატიებს.

მეორე მნიშვნელოვანი ფაქტორი იყო ის, რომ ზოგიერთი ფეხბურთელი აშკარად ზედმეტად ერთობოდა ბურთის ტარებით, რაც აფერხებდა ქართველთა შეტევებს და მეტ სიმწყობრეს სძენდა ლიტველთა დაცვას.

რა თქმა უნდა, ძალიან კარგია, როცა რამდენიმე მოწინააღმდეგის მოტყუება შეგიძლია, მაგრამ ინდივიდუალური ოსტატობა ფეხბურთში ბრილიანტივითაა - ზედმეტად ხშირად ის არ უნდა გამოიყენო, თორემ, შეიძლება, ამით საერთო საქმეს ავნო.

საერთოდ, დღევანდელ ფეხბურთში სათამაშო დისციპლინა უმნიშვნელოვანესი კომპონენტია და ყველას გაუჭირდება, ვინც მას განუხრელად არ იცავს.

თამაშის დასრულების შემდეგ გია გეგუჩაძემ ყურადღება გაამახვილა რამდენიმე წამყვანი ფეხბურთელის არყოფნაზე. ის კმაყოფილი დარჩა შედეგით, თამაშის ხარისხით კი - არა.  აღნიშნა, რომ აქცენტი გაკეთდა შემტევი სტილის მოთამაშეებზე და ამან გაამართლა.

მატჩის სტენოგრამა
10' - რომან ჭანტურია ვარდნაში უშედეგოდ ცდილობდა ლიტველთა კარში ბურთის გადაგზავნას.
12' - აკაკი შულაიამ შესანიშნავად ითამაშა. ფლანგზე მეურვე გააცურა, ცენტრისკენ შეიწია და დაარტყა. ლიტველთა მეკარემ ურთულესი ბურთი მოიგერია.
25' - გიორგი არაბიძის საჯარიმო. ბურთი ოდნავ სცდება ლიტველთა კარს.
32' - ჭანტურიას დარტყმას სიზუსტე დააკლდა და ბადეს გარედან მოხვდა.
34' - ლუკა ზარანდიას შორეული დარტყმა მეკარემ მოიგერია.
43' - ოთარ კიტეიშვილის დარტყმა მცველს მოხვდა და კუთხურზე გადავიდა.
45' - ძალიან რეალური მომენტი. ზარანდიამ შულაიას უპასა, ამან საჯარიმოში შეასრიალა ბურთი, ჭანტურიამ ერთი შეხებით დაარტყა, მაგრამ ლიტველთა მეკარემ კვლავ დიდებულად ითამაშა.
52' - ლასისკასმა უბურთო შულაიას წინააღმდეგ იუხეშა და არბიტრმა პირდაპირ წითელი ბარათი უჩვენა.
55' - გოლი! ჩაბრაძის ჩაწოდების შემდეგ მატულევიჩუსმა ბურთი საკუთარ კარში ჩაჭრა - 1:0.
58' - რომანოვსკისის ჩაწოდების შემდეგ სადაუსკასის თავური არაზუსტია.
76' - ლიტველთა ძალიან კარგი შანსი. რუზგისმა მცველთა უყურადღებობით ისარგებლა და გატანამდე ცოტა დააკლდა.
90' - კიტეიშვილის დარტყმა და მეკარე ადგილზეა.
90' - მოხევიშვილის დარტყმა ოდნავ სცდება ლიტველთა კარს.

U21. ევროპის ჩემპიონატი. საკვალიფიკაციო ეტაპი. III ჯგუფი
პოლონეთი-დანია    3:1

ა გ თ მ ფ წ ბ ქ
1. დანია 5 4 0 1 20-5 12
2. პოლონეთი 5 3 2 0 13-6 11
3. ფარერები 5 1 2 2 6-10 5
4. საქართველო 5 1 1 3 6-13 4
5. ფინეთი 4 0 3 1 6-11 3
6. ლიტვა 4 1 0 3 3-9 3

მომდევნო მატჩები
23 მარტი, 2018
საქართველო-ფარერები
ლიტვა-ფინეთი

27 მარტი
საქართველო-დანია
პოლონეთი-ლიტვა.

ყოველდღიური სპორტული გაზეთი "ლელო"
1086
მკითხველის კომენტარები / 0 /
მსგავსი ამბები
რუბრიკის სხვა სიახლეები
;