U21. საქართველო-ფინეთი 2:2 - არაქართულად, მაგრამ... ქართულად [VIDEO]

საქართველოს ახალგაზრდული ნაკრები უქულოდ აღარაა ევროპის ჩემპიონატის შესარჩევ ციკლში. გია გეგუჩაძის გაწვრთნილებმა მარცხიანი ნავსი ფინეთთან საშინაო მატჩში გატეხეს. რა თქმა უნდა, წაგებას ფრე სჯობია, მაგრამ ამ ქულის გამო ქუდებს ჭერში ნამდვილად ვერ ავტყორცნით. მით უმეტეს, ჩვენი ნაკრების გარჯაში ბევრი შეცდომა და ხარვეზი იყო.

არადა, ეს აშკარად საუკეთესო თამაში იყო გეგუჩაძის გაწვრთნილი გუნდისა მიმდინარე შესარჩევ ციკლში და ამ თამაშში ბევრი იყო როგორც ქართული, ისე არაქართული ელემენტები. ზოგადად, ბოლო დროს იშვიათად გვახსენდება ქართული კლუბი თუ ნაკრები, რომელიც ორჯერ აგებდა და არ წააგო.

მედალს მეორე მხარეც აქვს - ჩვენ მთელ რიგ ეპიზოდებში ვნახეთ ნაკრები, რომელიც თამაშობდა ბოლო ოცწლეულისთვის დამახასიათებელ ქართულ ფეხბურთს, თავისი ბევრი ღირსებითა და კიდევ მეტი ნაკლით.

თამაშის საერთო სურათს თუ შევხედავთ, უნდა მოგვეგო. გავაკეთეთ მეტოქეზე ბევრად მეტი პასი, ბურთი უფრო ხშირად გვქონდა და ჩვენს ფეხბურთს უფრო შინაარსიანი ეთქმოდა, მაგრამ ფინელები სხვა საფეხბურთო სკოლას წარმოადგენენ და მათ ბურთის მცირე ხანს ფლობაც ეყოთ ორი გოლის შესაქმნელად.

მთავარი: საქართველოს ამ ფორმაციის ნაკრებს შეტევაში გვარიანი რესურსი აქვს, მით უმეტეს - ფლანგებიდან. ეგაა, ძალიან უნდა გაგიმართლოს, ასეთი დაცვისა და საყრდენი ზონის პირობებში თამაში რომ მოიგო.

ჩვენი შეტევა კი შევაქეთ, მაგრამ საქართველოს ახალგაზრდული ნაკრები არ არის ბრაზილია, რამდენიც უნდა, იმდენი რომ გაუშვას და გაშვებულზე ერთით მეტი გაიტანოს.

ცხადია, კარგი იქნებოდა, ძირითადში რომ ყოფილიყო გიორგი ბერიძე, ვინც, რაც ითამაშა, მართლა მაგრად ითამაშა და ლუკა ზარანდიასთან ერთად საუკეთესო იყო ქართველთა შორის. ცხადია ისიც, რომ გიორგი არაბიძეს ამ ასაკში მაღალი კლასი აქვს, თუმცა, ვფიქრობთ, რიგ ეპიზოდებში ის როგორღაც ინერტული იყო.

არაბიძისა და, მეტადრე, ბერიძის მინდორზე გასვლამ ქართველთა თამაში გამოაცოცხლა, ზარანდიას კი დღესვე შეუძლია, საქართველოს ეროვნული ნაკრებისთვის სასარგებლო ფეხბურთელი იყოს, ოღონდ, მას მეტი სიზუსტე მართებს დამაგვირგვინებელ ფაზაში და ფიზიკურადაც ბოლომდე უნდა გაძლოს.

გვაკლია გუნდური ბალანსი, რომლის გარეშეც საერთო წარმატებაზე ფიქრი ძალიან რთულია. გეგუჩაძის გაწვრთნილი კლუბები ყოველთვის უხდიდნენ ხარკს შემტევ ფეხბურთს, მაგრამ არც ერთი მათგანი არ ყოფილა ასეთი სუსტი - დაცვით ფაზაში...

სამართლიანობა მოითხოვს, აღინიშნოს, რომ საქართველოს ახალგაზრდულ ნაკრებს ძირითადი შემადგენლობის რამდენიმე ფეხბურთელი აკლდა. მათ შორის, ორი გიორგი - ხარაიშვილი და ჩაკვეტაძე. რომ არა ეს, იქნებ, მოგვეგო კიდეც...

მატჩის სტენოგრამა
9' - გოლი! კუთხურიდან ჩაწოდებულ ბურთზე ვერც ჩვენმა მცველებმა ითამაშეს და ვერც მეკარემ. კელმანმა კი ახლო მანძლიდან უპრობლემოდ გაიტანა - 0:1.
18' - ლუკა ზარანდია მარჯვენა ფლანგიდან შეიჭრა მეტოქის საჯარიმოში და დარტყმაც მოასწრო. ფინელენი მეკარე გადაარჩინა.
27' - ბექა მიქელთაძის დარტყმა ფინელთა კარს ასცდა.
39' - ისევ ზარანდია თამაშობს კარგად. მის მიერ უძლიერესად დარტყმულ ბურთს კეტო იგერიებს.
51' - მიქელთაძე არაზუსტად ურტყამს ფინელთა კარის მიმართულებით.
54' - რომან ჭანტურიას დარტყმა მცირეოდენ არაზუსტია.
59' - გოლი! გიორგი ბერიძის შორეულმა დარტყმამ მიზანს მიაღწია. ფინელთა მეკარეს ხელს მცველი და ჭანტურია უშლიდნენ - 1:1.
69' - გიორგი არაბიძის დარტყმა და კეტო ადგილზეა.
75' - კაირინენმა და ვაისანენმა კარგი საგოლე შანსები გაანიავეს.
79' - აკაკი შულაიას ისევ კეტომ არ გაატანინა.
83' - გოლი! ქართველთა საყრდენი ზონა და დაცვის ცენტრი ჩავარდა. ლაზარე კუპატაძე კაირინენის დარტყმულს კი გაუმკლავდა, მაგრამ კელმანმა დამატებაზე დუბლი მიითვალა - 1:2.
84' - კუპატაძემ იარვინენს არ გაატანინა.
86' - გოლი! შულაიას გადაცემა და ჭანტურიას დასწრებაზე გააქვს - 2:2.

მატჩის შემდეგ
გია გეგუჩაძე: "ველოდით, რომ რთული თამაში იქნებოდა და ასეც მოხდა. ნახევარდაცვაში ბევრი მოთამაშე გვაკლდა. ჩემმა ფეხბურთელებმა ბოლომდე იბრძოლეს. ორჯერ მოვახერხეთ ანგარიშში ჩამორჩენის აღმოფხვრა.გვქონდა არაერთი საგოლე მომენტი, რომელთა გამოყენებაც ვერ შევძელით. ჩემი აზრით, ლოგიკური შედეგი დაფიქსირდა.

ჩვენ ახლა მოვემზადებით ლიტვასთან სათამაშოდ. დრო ცოტაა, მაგრამ ყველაფერს გავაკეთებთ იმისთვის, რომ დღეს დაშვებული შეცდომებიდან შესაბამისი დასკვნები გამოვიტანოთ".

U21. ევროპის ჩემპიონატის საკვალიფიკაციო მატჩი. III ჯგუფი
10.11. თბილისი. მიხეილ მესხი
საქართველო-ფინეთი 2:2
გოლები: 0:1 კელმანი (9), 1:1 ბერიძე (59), 1:2 კელმანი (83), 2:2 ჭანტურია (86)
საქართველო (4-2-3-1): კუპატაძე - შულაია, მარგველაშვილი, ტაბიძე, ჩაბრაძე - მოხევიშვილი (53. ბერიძე), მამუჩაშვილი - ზარანდია (69. კოხრეიძე), კიტეიშვილი, მიქელთაძე (53. არაბიძე) - ჭანტურია.
სათადარიგოები: გოშაძე, ბაშელეიშვილი, კობოური, არველაძე
მწვრთნელი: გია გეგუჩაძე
ფინეთი (4-4-1-1): კეტო - ვაისანენი, პირტიოკი, იენსენი, ჰამალაინენი - ლაპალაინენი (89. ნიკსანენი), დალსტრიომი, კაირინენი, ჰოსტიკა (64. მილიმაკი) - ნისილა (82. იარვინენი) - კელმანი.
სათადარიგოები: ნორდკვისტი, ადე, იარენპალა, მალოლო
მწვრთნელი: იუჰა მალინენი
გაფრთხილება: კაირინენი (55), კიტეიშვილი (67), დალსტრიომი (79)
არბიტრი: ო. დერდო (უკრაინა)

ფარერები-პოლონეთი 2:2
გოლები: 0:1 კოვნაცკი (35-პენ), 1:1 მ. ოლსენი (52-პენ), 2:1 პეტერსენი (80), 2:2 ბარტოში (90)
გაძევება: კოვნაცკი (79. პოლონეთი)

ა გ თ მ ფ წ ბ ქ
1. დანია 4 4 0 0 19-2 12
2. პოლონეთი 4 2 2 0 10-5 8
3. ფარერები 5 1 2 2 6-10 5
4. ფინეთი 4 0 3 1 6-11 3
5. ლიტვა 3 1 0 2 3-8 3
6. საქართველო 4 0 1 3 5-13 1

მომდევნო ტური
14 ნოემბერი
საქართველო-ლიტვა
პოლონეთი-დანია

ყოველდღიური სპორტული გაზეთი "ლელო"
888
მკითხველის კომენტარები / 0 /
მსგავსი ამბები
რუბრიკის სხვა სიახლეები